Ang Dalang Emmy Zehden—Ang Sugilanon Luyo sa Ngalan

NIADTONG Mayo 1992, usa ka dalan sa siyudad sa Berlin, Alemanya, ginganlan sa ngalan ni Emmy Zehden, usa sa mga Saksi ni Jehova.

Si Emmy natawo niadtong 1900. Siya naminyo sa usa ka Hudiyo nga negosyante, si Richard Zehden, nga namatay sa kampo konsentrasyon sa Auschwitz sa panahon sa rehimeng Nazi. Si Richard ug Emmy may sinagop nga anak nga lalaki, si Horst Schmidt. Si Horst ug duha pa ka laing Saksi ni Jehova napugos sa pagtago sa dihang sila gitawag aron moserbisyo sa militar.

Si Emmy nagtagana ug balay alang kang Horst ug sa iyang duha ka kauban. Apan, sa ulahi sila nadiskobrehan. Silang upat gihukman nga patyon​—ang tulo ka batan-ong lalaki gumikan sa pagdumili nga moserbisyo sa militar ug si Emmy tungod sa pagtago kanila. Ang duha ka kauban ni Horst gipunggotan ug ulo. Si Emmy miaplay ug parol, apan gidid-an. Siya gipunggotan ug ulo sa Plötzensee sa Berlin niadtong Hunyo 9, 1944.a Si Horst Schmidt naluwas sa paglutos sa Nazi ug sa ulahi naminyo sa usa ka Saksi nga naluwas sa kampo konsentrasyon.

Niadtong Mayo 7, 1992, usa ka dalan sa Berlin ginganlan sa ngalan ni Emmy Zehden. Sa usa ka pakigpulong nga gihatag sa usa ka opisyal nga Aleman, siya gidayeg tungod sa iyang kaisog ug gihisgotan ingong panig-ingnan sa daghang ‘nakalimtang mga biktima’ sa gubat.

[Footnote]