Karon Ako Malipayon nga Nabuhi!

“Naamgohan nimong ikaw mamatay, dili ba?” nangutana ang doktor. Sa kasukwahi, duha ka beses kaniadto, ang kamatayon maoy makapalipay untang kahupayan. Apan dili niining panahona. Pasaysaya ko.

NAGDAKO ako sa sikbit sa Long Island, New York, diin ang akong amahan maoy usa ka popular nga drayber sa sakyanang iglulumba. Siya maoy usa ka perpeksiyonista nga nagkinabuhi diha sa indigay. Siya usab sapoton ug lisod kaayong pahimut-an. Si Mama, sa laing bahin, mas makigdaiton, hilomon nga babaye, nga mahadlok kaayo nga makiglumba si Papa nga dili siya makaako sa pagtan-aw kaniya nga makiglumba.

Ang akong magulang nga lalaki ug ako nakakat-on sa linghod nga panuigon nga dili manghilabot o mobuhat sa mga butang nga makapasuko kang Papa diha sa balay, usa ka butang nga naandan na ni Mama. Apan dili kadto sayon. Kaming tanan nahadlok kang Papa. Kana nag-apektar kanako sa gilapdon nga wala gayod nako batia nga makahimo ako ug husto. Ang akong pagtahod sa kaugalingon misamot pa ka ubos sa dihang, sa akong sayong pagkatin-edyer, usa ka “higala” sa pamilya nag-among-among kanako. Kay dili makasagubang sa akong mga pagbati, gisulayan ko ang paghikog. Mao kadto ang unang higayon nga akong gihunahuna nga ang kamatayon maoy makapalipayng kahupayan.

Mibati akong walay bili ug wala higugmaa ug nakabaton ug suliran sa pagkaon nga komon sa batan-ong mga babaye nga ubos ang pagtamod sa kaugalingon. Ako misugod sa pagsubay sa kinabuhi nga nangitag paukyab, nag-abuso sa droga ug alkoholikong ilimnon, nakighilawas, ug nagpakuha sa makadaghan​—“nangitag gugma diha sa dili-angayng mga dapit,” sumala sa usa ka linya sa alawiton. Nalangkit ako sa pagmotorsiklo, lumba sa sakyanan, ug scuba diving, ug usahay moadto ako sa Las Vegas aron manugal. Nangayo usab ako ug tambag sa usa ka mananag-an sa umaabot ug migamit sa Ouija board alang sa kalingawan, nga wala makaamgo sa mga kapeligrohan sa espiritismo.​—Deuteronomio 18:10-12.

Dugang pa, ang pagpangitag paukyab mitultol sa pagkalangkit sa ilegal nga mga kalihokan sama sa pagbaligyag mga droga ug pagpangawat ug tinda. Ang akong pagpangita ug gugma ug pag-uyon misangpot usab sa daghang hinigugma ug mga trato. Kining tanang hinungdan natingob aron mapatungha ang usa ka estilo sa kinabuhi nga labi pang peligroso kay sa akong naamgohan.

Usa ka gabii, human makainom ug sinagol nga alkoholikong ilimnon ug mga droga diha sa tubilanan sa lumbaanan, sa pagkadili-maalamon gitugotan nako ang akong hinigugma nga ihatod ako sa sakyanan ngadto sa akong balay. Human ako mawad-ig panimuot diha sa lingkoranan sa atubangan, dayag nga nakuyapan usab siya. Ako napugwat sa epekto sa pagkabangga. Naospital ako nga may daghang samad, apan sa ngadtongadto naulian ako nga ang tuong tuhod lamang ang nadaot.

Tinguha sa Usa ka Butang nga Mas Maayo

Bisan tuod diyutay ra ang akong apresasyon sa akong kaugalingong kinabuhi, mahunahunaon ako sa kahilwas ug mga katungod sa kabataan ug kahayopan ug bahin sa pagpanalipod sa kalikopan. Nangandoy ako nga makakita ug mas maayong kalibotan ug, sa paningkamot nga mapatungha kana, ako aktibo diha sa daghang organisasyon. Kining maong tinguha sa mas maayong kalibotan mao ang unang nakapadani kanako sa mga butang nga gipamulong sa usa ka kaubang-trabahante nga usa sa mga Saksi ni Jehova. Kanunay niyang gihisgotan “kining sistemaha” sa makapahigawad nga paagi sa dihang dili maayo ang dagan sa trabaho. Sa dihang gipangutana ko siya kon unsay buot niyang ipasabot, siya misaysay nga sa dili madugay sa umaabot mahanaw na ang tanang kabalaka sa kinabuhi. Sanglit gitahod ko siya pag-ayo, ako namati nga maikagon.

Ikasubo, wala na kami magkita, apan wala ako malimot sa mga butang nga iyang gipahayag. Akong naamgohan nga sa umaabot kinahanglang himoon nako ang dagkong kausaban sa estilo sa kinabuhi aron makapahimuot sa Diyos. Apan dili pa ako andam. Bisan pa niana, kon makigdeyt, akong ipahibalo sa umaabot nga mga kapikas sa kaminyoon nga sa umaabot ako mag-Saksi ug kon dili nila gusto kana, karon mao na ang panahon nga magbulag.

Ingong resulta, ang akong kataposang hinigugma buot masayod ug dugang bahin sa mga butang nga akong nasayran, nga nag-ingon nga kon ako interesado, lagmit nga siya usab. Busa nagsugod kami pagpangita sa mga Saksi. Hinunoa, sila ang nakakaplag kanamo sa dihang miduaw sila sa akong pinuy-anan. Nasugdan ang usa ka pagtuon sa Bibliya, apan ngadtongadto, ang akong hinigugma mipili nga mohunong pagtuon ug mibalik sa iyang asawa.

Ang akong pagtuon sa Bibliya kasagarang dili-regular. Dugay nakong nasabtan ang panglantaw ni Jehova sa pagkabalaan sa kinabuhi. Apan, sa dihang napasibo nako ang akong hunahuna nakita nako ang panginahanglan nga ikanselar ang akong pag-skydiving ug hunongon ang pagpanigarilyo. Samtang ang kinabuhi nahimong labi pang bililhon alang kanako, andam na ako sa pagkinabuhing malinawon ug dili na morisgo sa akong kinabuhi. Niadtong Oktubre 18, 1985, akong gisimbolohan ang akong pahinungod kang Jehova pinaagi sa pagpabawtismo sa tubig. Wala ako masayod nga ang akong kinabuhi sa dili madugay mameligro.

Nangandoy na Usab nga Mamatay

Pipila ka bulan sa ulahi​—sa gabii sa Marso 22, 1986​—diha ako sa atubangan sa akong balay, nga nagkuha sa linabhan gikan sa akong kotse, sa dihang ang nagdagan nga kotse midasmag kanako ug nagguyod kanako ug kapin sa 30 metros! Ako maoy biktima sa aksidenteng midagan ang nakadasmag. Bisan tuod nakaagom ako sa mga samad sa ulo, ako wala mawad-i sa panimuot latas sa maong panahon.

Nga nagduko sa taliwala sa mangiob nga dalan, mahunahuna lamang nako ang kalisang nga madasmagan pag-usab. Grabe kaayo ang kasakit, labi pa kay sa akong maantos. Busa padayon akong nag-ampo kang Jehova nga tugotan na lang akong mamatay. (Job 14:13) Usa ka babaye nga nars ang mipatim-aw. Gihangyo ko siya nga ipasibo ang posisyon sa akong mga bitiis, sanglit nangapiang kini. Gibuhat niya kadto, ug gihimo usab niyang turnike ang usa ka bahin sa iyang sinina, aron pahunongon ang pagdugo gikan sa daghang bali sa usa ka bitiis. Ang akong botas nakaplagan usa ka bloke ang gilay-on, nga puno sa dugo!

Ang mga lumalabay, nga wala makaamgo nga ako naglakaw lang, nagsigeg pangutana kon hain ang akong sakyanan. Kay wala mahibalo kon unsa ka lay-a ako naguyod, ako naghunahuna nga anaa pa ako sa duol niana! Sa pag-abot sa mga paramedik, sila naghunahuna nga ako mamatay. Busa gitawag nila ang mga tiktik sa polis, sanglit ang behikular nga pagpatay mahimong usa ka grabeng krimen. Ngadtongadto nadakpan ang drayber. Ilang gialihan ang maong dapit ingong nahitaboan sa krimen ug nagkuha sa akong sakyanan ingong ebidensiya. Ang duha ka pultahan sa usa ka kilid sa akong sakyanan nangalaksi.

Pag-atubang sa Krisis

Sa kasamtangan, sa pag-abot nako sa lokal nga sentro sa samdan, gisublisubli nako pagsulti, bisan lahos sa maskara nga konektado sa oksiheno: “Walay dugo, walay dugo. Ako usa sa mga Saksi ni Jehova!” Ang kataposang nahinumdoman nako mao ang paggunting sa mga nars sa akong sinina ug ang pagkadungog sa natarantar nga tem sa tig-atiman sa samdan nga nagsinggit ug mga mando.

Sa dihang nakamata ako, natingala ako nga nabuhi. Nawad-an ug naulian ako sa panimuot sa makadaghan. Sa matag panahon nga ako momata, akong gihangyo ang akong pamilya nga kontakon ang magtiayon nga nagtuon sa Bibliya uban kanako. Ang akong pamilya wala malipay nga ako nahimong usa ka Saksi, busa gituyo nila “pagkalimot” ang pagpahibalo kanila. Apan ako milahutay​—mao kadto ang unang butang nga akong gihangyo sa matag higayon nga mobuka ang akong mga mata. Sa kataposan, miepekto ang akong paglahutay, ug usa ka adlaw sa dihang ako nahigmata, diha sila. Pagkadakong kahupayan! Ang katawhan ni Jehova nasayod kon hain ako.

Hinunoa, wala magdugay ang akong kalipay tungod kay ang akong ihap sa dugo misugod pag-us-os ug taas kaayo ang akong hilanat. Ang mga bukog nga gidudahang nakapahinabog impeksiyon gikuha, ug upat ka tubo ang gibutang sa akong bitiis. Apan sa wala madugay mitaas na usab ang akong hilanat, ug milagom ang akong bitiis. Mitakboy na ang gangrena, ug ang kaluwasan nagdepende sa pagputol sa bitiis.

Gipugos nga Magpaabono

Sanglit ang akong ihap sa dugo mius-os pag-ayo, ang pagdisdis giisip nga imposible kon dili magpaabono ug dugo. Ang mga doktor, mga nars, mga membro sa pamilya, ug kanhing mga higala gipatawag aron pugson ako. Unya, may huhongihong diha sa akong pultahan. Nadunggan nako nga ang mga doktor nagplanog usa ka butang, apan dili nako masabtan kon unsa kadto. Ikalipay, usa ka Saksi nga miduaw niadtong panahona nakadungog sa plano nga ipugos ang pag-abono kanako. Gikontak dayon niya ang lokal nga Kristohanong mga ansiyano, kinsa mitabang kanako.

Usa ka sikyatrista ang gibayran aron ipatimbangtimbang ang akong kahimtang sa panghunahuna. Ang tin-awng tumong maoy aron ideklarar ako nga dili-makaarang sa pagdesisyon ug sa ingon dili tumanon ang akong mga hangyo. Napakyas kadtong planoha. Unya, usa ka membro sa klero, nga nagpaabono usab ug dugo, gidala aron kombinsihon ako nga OK lang ang pagpaabono ug dugo. Sa kataposan, mikuha ang akong pamilya ug orden sa korte nga ipugos ang dugo kanako.

Sa mga alas dos sa buntag, usa ka tem sa mga doktor, usa ka estenograpo sa korte, usa ka serip, mga abogado nga naghawas sa ospital, ug usa ka huwes ang misulod sa akong lawak sa ospital. Misugod ang sesyon sa korte. Wala ako pahibaloang daan, walay Bibliya, walay hawas, ug ako gipainom ug daghang tambal alang sa sakit. Ang resulta sa sesyon? Ang huwes nagsalikway sa orden sa korte, nga nag-ingon nga labi pa siyang nakadayeg sa integridad sa mga Saksi ni Jehova kay kaniadto.

Ang usa ka ospital sa Camden, New Jersey, miuyon sa pagkupot sa akong kaso. Sanglit ang administrasyon sa ospital sa New York naglagot, gihikawan nila ako sa tanang pagtambal, lakip sa mga painkiller. Wala usab nila tugoti nga molanding ang helikopter nga magdala nako ngadto sa ospital sa New Jersey. Salamat na lang, nakalabang buhi ako sa pagpadulong didto sakay sa ambulansiya. Sa pag-abot, nadungog nako ang mga pulong nga gihisgotan sa sinugdanan niining maong sugilanon: “Naamgohan nimong ikaw mamatay, dili ba?”

Pagdisdis​—Malamposon

Luya kaayo ko nga ang usa ka nars kinahanglang motabang kanako nga momarka ug X diha sa porma nga naghatag ug pagtugot sa pagdisdis. Ang akong tuong bitiis kinahanglang putlon sa ibabaw sa tuhod. Human niana, ang akong ihap sa hemoglobin mimenos sa 2, ug ang mga doktor nagduda ug grabeng kadaot sa utok. Tungod kini kay wala sila makadungog ug tubag sa dihang gihagawhaw nila sa akong dalunggan ang, “Virginia, Virginia”​—ang ngalan diha sa akong mga papeles sa pagpaadmit sa ospital. Apan sa pagkadungog ug, “Ginger, Ginger,” nga hinayng gihagawhaw sa ulahi, akong gibuka ang akong mga mata ug nakita ang usa ka lalaki nga wala pa nako makita sukad.

Si Bill Turpin maoy sakop sa usa sa lokal nga mga kongregasyon sa mga Saksi ni Jehova sa New Jersey. Nahibaloan niya ang akong angga nga Ginger​—nga niana nailhan ako sa tibuok nakong kinabuhi​—gikan sa mga Saksi sa New York. Naghikay siyag mga pangutana nga akong matubag pinaagi sa pagpamilok, sanglit gitaoran ako ug respirator ug dili gayod makasulti. “Buot ba nimong mopadayon ako sa pagduaw kanimo,” siya nangutana, “ug suginlan ang mga Saksi sa New York bahin kanimo?” Kadaghan ako namilok! Si Brader Turpin nangarisgar sa pagyuhot ug sulod sa akong kuwarto, sanglit ang akong pamilya nagbaod nga dili ako magpaduaw sa mga Saksi.

Human sa unom ka bulan sa ospital, ang mahimo lamang nako mao ang pasikaranang adlaw-adlaw nga mga kalihokan, sama sa pagpakaon sa akong kaugalingon ug pagsepilyo sa akong ngipon. Ngadtongadto, nakadawat ako ug artipisyal nga bitiis ug nakalakawlakaw ginamit ang abag sa paglakaw. Sa dihang migawas ako sa ospital niadtong Septiyembre 1986 ug mipauli sa akong apartment, sulod sa laing unom ka bulan, usa ka health aide ang nagpabilin uban kanako sa balay aron sa pagtabang kanako.

Tabang Gikan sa Among Panag-igsoonay

Bisan sa wala pa ako mopauli, ako nakaapresyar gayod kon unsay kahulogan sa pagkahimong bahin sa Kristohanong panag-igsoonay. (Marcos 10:29, 30) Ang mga igsoong lalaki ug babaye mahigugmaong nag-atiman dili lamang sa akong pisikal nga mga panginahanglan kondili sa akong espirituwal nga panginahanglan usab. Uban sa ilang mahigugmaong tabang, nakahimo ako sa pagtambong pag-usab sa Kristohanong mga tigom ug, sa ngadtongadto, bisan sa pagpakig-ambit sa oksilyare payunir nga ministeryo.

Ang sibil nga kiha batok sa drayber sa sakyanan, nga kasagarang dangtag labing menos lima ka tuig aron lang maeskedyul ang husay sa korte, nahusay sulod sa pipila ka bulan​—sa kahibulong sa akong abogado. Ginamit ang salapi gikan sa danyos, nakahimo ako sa pagbalhin ngadto sa mas duol nga puy-anan. Dugang pa, mipalit ako ug usa ka van nga nasangkapan sa makina nga mobutad sa silyang-may-ligid ug mga kontrol sa kamot. Busa, niadtong 1988, miapil ako sa grupo sa mga regular payunir, nga naggugol ug labing menos 1,000 ka oras sa buluhatong pagsangyaw kada tuig. Latas sa katuigan, nakapahimulos ako sa pagsangyaw sa mga teritoryo sa mga estado sa North Dakota, Alabama, ug Kentucky. Nakabiyahe na ako ug 150,000 kilometros sa akong van, nga kadaghanan niana diha sa Kristohanong ministeryo.

Daghan akog makalingawng mga kasinatian sa paggamit sa akong elektrik nga tuloy-ligid nga motor. Kaduha nabalintong ko kini samtang nagsangyaw uban sa mga asawa sa nagapanawng mga magtatan-aw. Kas-a, sa Alabama, nasayop ako sa paghunahuna nga makalukso ako sa usa ka gamay nga sapa sakay niana ug mitugpa sa yuta, nga nabulit sa lapok. Bisan pa niana, ang pagkamailahon sa mga butang nga makapahimuot ug ang dili paghunahuna ug sobra sa akong kaugalingon nakatabang kanako nga mamentinar ang positibong tinamdan.

Gipalig-on sa Usa ka Tinuod nga Paglaom

Usahay ang mga suliran sa panglawas hilabihan ka bug-at. Kinahanglang mohunong ako sa pagpayunir sa duha ka higayon pipila ka tuig kanhi tungod kay morag ang akong usa ka bitiis kinahanglang putlon. Ang hulga nga mawad-an sa akong bitiis maoy kanunay karon, ug sa milabayng lima ka tuig, kanunay akong anaa sa silyang-may-ligid. Niadtong 1994, nabali ang akong bukton. Nagkinahanglan ako ug tabang sa pagkaligo, pagsinina, pagluto, ug paglimpiyo ug kinahanglang may sakyanan bisan asa. Bisan pa niana, tungod sa tabang sa mga igsoon, nakapadayon ako sa pagpayunir latas nianang maong babag.

Sa tibuok kong kinabuhi gipangita nako ang daw mga paukyab, apan karon akong naamgohan nga haduol na ang labing makapaukyab nga mga panahon. Ang akong pagtuo nga ang Diyos mag-ayo sa tanang presenteng mga kaluyahon sa iyang nagkaduol na kaayong bag-ong kalibotan mao ang nakapalipay kanako nga nabuhi karon. (Isaias 35:4-6) Nianang bag-ong kalibotan, ako nangandoy nga maglangoylangoy uban sa mga balyena ug mga lumod, magsuhid sa kabukiran uban sa usa ka leyon ug sa iyang mga itoy, ug magbuhat sa usa ka butang nga ingon ka sayon sa paglakaw diha sa baybayon. Makapahimuot kanako ang paghanduraw sa pagbuhat sa tanang butang nga gilalang sa Diyos aron atong kahimut-an sa maong Paraisong yuta.​—Sumala sa giasoy ni Ginger Klauss.

[Hulagway sa panid 21]

Sa dihang ang panugal nahimong bahin sa akong kinabuhi

[Hulagway sa panid 23]

Mga saad sa Diyos nagpalig-on kanako