Kami Maoy Dili-Magkabulag nga Managhigala

SI Tracy mao ang akong giya nga iro, usa ka diyes-anyos nga itom nga Labrador retriever. Tungod kaniya makalihoklihok ako sa normal kaayong paagi. Ginakuyogan usab niya ako ug ginahupay. Busa dili ikahibulong nga nakakat-on ako sa pagmahal pag-ayo kaniya ug nga kami maoy dili-magkabulag nga managhigala.

Usahay, nga wala tuyoa, ang mga tawo makapahigawad sa paagi nga wala gayod mabuhat ni Tracy. Usa ka adlaw, pananglitan, gibilin nako si Tracy sa balay ug milakaw kauban sa usa ka higala. Kami malipayong nag-estoryahanay sa dihang sa kalit lang natumba ako. Ang akong higala nalimot nga ako usa ka buta, ug wala niya ako pasidan-i bahin sa ali sa kanal. Dili unta kadto mahitabo kon diha pa si Tracy sa akong kiliran.

Kas-a, si Tracy aktuwal nga nagluwas sa akong kinabuhi. Naglakaw ako sa karsada sa dihang usa ka trak ang kalit nga nawad-an ug preno ug nagpadulong kanako. Nadungog ko ang makina niana apan, siyempre, wala makakita kon hain kadto nagpadulong. Nakakita si Tracy ug nakasabot sa kapeligrohan ug mibutad dayon kanako sa luwas nga dapit.

Buta, Apan Makakita

Natawo ako niadtong 1944 sa habagatang Sweden, ug buta ako sukad sa pagkatawo. Gipadala ako ngadto sa usa ka eskuylahang may dormitoryo alang sa mga batang buta, diin ako nakakat-on sa pagbasa ug pagsulat sa Braille. Ang musika nahimong hinungdanong bahin sa akong kinabuhi, ilabina ang pagpiano. Human mograduwar sa hayskul, mipadayon ako sa pagtuon ug mga pinulongan ug musika sa University of Göteborg.

Apan, ang akong kinabuhi nausab sa walay kataposan sa dihang duha ka Saksi ni Jehova miduaw kanako sa akong lawak diha sa nataran sa eskuylahan. Sa wala madugay misugod ako sa pagtambong sa mga tigom sa mga Saksi ug misugod gani pagpakig-ambit sa uban sa akong nakat-onan. Sa 1977, akong gisimbolohan ang akong pahinungod kang Jehova nga Diyos pinaagig bawtismo sa tubig. Bisan tuod ako buta sa pisikal, pinaagi sa pagtuon sa Pulong sa Diyos, ako nakadawat ug usa ka butang nga dako kaayog bili​—espirituwal nga panan-aw.

Karon akong giisip ang akong kaugalingon nga mas maayog kahimtang kay niadtong makakita sa pisikal apan buta sa espirituwal. (Itandi ang Juan 9:39-41.) Ako nalipay nga nakabaton ug tin-aw nga handurawan sa bag-ong kalibotan sa Diyos diin, sumala sa iyang saad, ang mga mata sa mga buta makakita​—oo, diin ang tanang pisikal nga mga kaluyahon mamaayo ug diin bisan ang mga patay mabanhaw!​—Salmo 146:8; Isaias 35:5, 6; Buhat 24:15.

Bisan tuod ako dili-minyo ug buta sa pisikal, uban kang Tracy ingong akong maunongong kauban, maayo ra ang akong kahimtang. Pahubita ko ninyo kon sa unsang paagi siya motabang kanako sa akong sekular nga trabaho ug sa paghimo sa akong ministeryo ingong usa sa mga Saksi ni Jehova. (Mateo 24:14; Buhat 20:20; Hebreohanon 10:25) Apan sa dili pa, aniay dugang impormasyon bahin kang Tracy mismo.

Gipili Alang sa Linaing Pagbansay

Sa dihang si Tracy walo pa lamang ka bulan, siya gisulayan aron masuta kon siya mokuwalipikar ingong usa ka giya nga iro. Siya napamatud-ang kalmado, daling tudloan, ug dili dayon mahadlok sa kalit lanog nga mga kasaba. Busa, siya gibutang dayon sa usa ka balay uban sa usa ka pamilya sulod sa pipila ka panahon aron sa pagkat-on kon sama sa unsa ang normal nga pamilyahanong kinabuhi. Human niana, sa dihang siya hamtong na, gipadala siya sa usa ka eskuylahan nga bansayanan alang sa giya nga mga iro.

Niining maong eskuylahan si Tracy nakakat-on kon unsay gikinahanglan sa usa ka giya nga iro, nga mao ang pagtabang sa iyang umaabot nga agalon nga makatultol sa mga pultahan, hagdanan, mga ganghaan, ug mga agianan. Nakakat-on usab siya kon unsaon paglakaw diha sa puliki nga mga aseras ug unsaon pagtabok sa mga dalan. Gitudloan usab siya nga mohunong diha sa ali sa kanal, nga motuman sa mga signal sa trapiko, ug molikay sa peligrosong mga babag. Human sa mga lima ka bulan nga pagbansay, siya andam nang motrabaho. Mao kadto ang higayon nga gipailaila si Tracy kanako.

Kon Unsay Buhaton ni Tracy Alang Kanako

Kada buntag pukawon ako ni Tracy aron ako siyang mapakaon. Unya mangandam kami aron motrabaho. Ang akong opisina maoy mga 20 minutos kon lakwon gikan sa among apartment. Siyempre, nahibalo ko sa dalan apan ang trabaho ni Tracy mao ang pagtabang kanako nga makaabot didto nga dili mabangga sa mga sakyanan, mga tawo, mga poste sa suga, o bisan unsa. Sa pag-abot namo, siya molubog sa ilalom sa akong lamesa. Unya, panahon sa akong tingpaniudto, kasagarang mopaseyo kami.

Sa gabii, human mopauli sa balay gikan sa trabahoan, ang kinamaayohang bahin sa among adlaw magsugod. Mao kini ang panahon nga si Tracy maggiya kanako diha sa buluhatong pagsangyaw sa balay-ug-balay ug ngadto sa mga balay diin ako nagdumala ug mga panagtuon sa Bibliya. Daghang tawo ang mahigalaon kaniya, nga magpikpik kaniya ug maghalog kaniya ug usahay hatagan ako ug lamiang pagkaon para kaniya. Motambong usab kami ug Kristohanong mga tigom kada semana. Human niini ang mga bata gustong motimbaya ug mohalog kang Tracy, sa iyang hilabihang kahimuot.

Akong naamgohan nga si Tracy usa lamang ka iro ug moabot ang adlaw nga siya mamatay. Kana nagkahulogan nga mokuha na usab ako ug laing giya nga iro. Apan, sa kasamtangan, kami maoy usa ka tem ug kami nagkinahanglan sa usag usa. Sa dihang wala si Tracy, mahimo akong dili gayod masaligon sa kaugalingon, ug siya daling-matugaw ug dili-mahimutang kon dili siya makagiya kanako.

Panginahanglan sa Pagsabot

Katingad-an, usahay ang mga tawo mosulay sa pagbulag kanamo. Ilang isipon si Tracy nga usa lamang ka ordinaryong iro o ginalam nga hayop ug wala makasabot sa among suod nga relasyon. Kining mga tawhana kinahanglang makasabot nga alang kanako si Tracy maoy sama sa usa ka silyang-may-ligid alang sa usa ka paralisado. Ang pagbulag kanamo sama rang gikuha ang akong mga mata.

Kon mas masabtan sa uban ang relasyon tali nako ug ni Tracy, mas diyutay ang mga suliran. Ang usa ka silyang-may-ligid, pananglitan, gidawat dayon apan, ikasubo, dili kanunayng dawaton ang usa ka giya nga iro. Ang pipila ka tawo mahadlok sa mga iro, o sila dili lang gayod gusto kanila.

Ang impormasyon nga makaplagan diha sa usa ka brosyur mahitungod sa giya nga mga iro, nga gipatik sa Swedish Association for the Visually Handicapped, makatabang pag-ayo. Kini nag-ingon: “Ang giya nga iro mao ang nagalihok nga tabang alang sa buta. Oo, labaw pa niana. Kana usa ka buhi nga tabang. . . . Kana maoy usa ka higala nga dili gayod magpahigawad kanimo.”

Sa pagkamatuod, si Tracy nagsilbing akong mga mata diha sa kangitngit, ug siya nagtabang kanako nga magkinabuhing normal kutob sa mahimo karon. Apan, ako kombinsido nga sa dili madugay, sa gisaad sa Diyos nga bag-ong kalibotan, makakita ako sa tanang makalilisang nga mga kahibulongan sa kalalangan. Busa, determinado ako karon nga mentinahon ang akong espirituwal nga panan-aw.

Busa, kauban ni Tracy nga nag-unlan sa akong paa, andam na kami karon sa pagpamati sa rekording sa kinabag-ohang isyu sa magasing Bantayanang Torre.​—Sumala sa giasoy ni Anne-Marie Evaldsson.