“Abi Kog ang Abuno sa Dugo Mohatag ug Kinabuhi, Dili Kamatayon”

KANANG mga pulonga gilitok ni Sal Cirella, amahan sa usa ka biktima sa hepatitis, sa programa sa telebisyon sa U.S. nga 20/20 niadtong Disyembre 11, 1986. Ang iyang anak babaye si Tracy gihatagag abuno ingong “polisa sa ospital,” bisan pag kadto supak sa gusto sa ginikanan. (Lain pay ato, sila dili mga Saksi ni Jehova, kinsa dili modawat sa mga abuno tungod sa relihiyosong mga hinungdan.) Siya natakboyan sa hepatitis, ug ang iyang kinabuhi naluwas lamang pinaagi sa transplant sa atay.

Si Tracy giatake sa usa ka matang sa hepatitis nga nailhang non-A/non-B hepatitis. Kining samang programa sa TV mitaho: “Kapin ug 190,000 ka Amerikano ang takboyan niini tungod sa mga abuno sa kada tuig. Kini magpahinabog permanenteng kadaot sa atay o mopatay sa duolag 10,000 ka tawo sa usa ka tuig. Kini hapit nakapatay kang Tracy.”

Ang usa ka siruhano nga nag-opera nga walay dugo diha sa 14,000 ka kaso mipahayag usab: “Akong makita ang mga tawo nga iladong mag-abuno sa mga tawo nga wala gayod magkinahanglan niini, ug magtabon lamang sa ilang mga sayop sa pagkadili pulido sa trabaho, kon walay laing hinungdan, pinaagi sa paggamit sa mga abuno sa dugo. Ug sa akong hunahuna kana bug-os dili dalawaton.” Ang laing doktor, usa ka kanhi opisyal sa U.S. Food and Drug Administration, miingon: “Ako nagtuo nga ang tanang produkto sa dugo nasobrahan sa paggamit. Sa akong hunahuna dunay igong ebidensiya sa pagpaluyo niana. Ang kagawian nga kinahanglang usbon mao ang kagawian sa mga doktor, kon unsay ilang ginaorder alang sa usa ka pasyente. Ug sila nagaorder ug daghan kaayong dugo.”