Gikan sa Among mga Magbabasa
Mga Dulang Kompiyuter Kinse anyos ako, ug buot kong pasalamatan kamo tungod sa artikulong “Mga Batan-on Nangutana . . . Angay ba Akong Magdulag mga Dula sa Kompiyuter ug sa Video?” (Agosto 22, 1996) Kana nagpadayag gayod sa daotang bahin sa maong mga dula, ug motabang kana sa mga Kristohanon sa pagtulotimbang sa positibo ug negatibong mga kinaiyahan sa pagdula kanila.
F. R., Indonesia
Desisiyete anyos ako, ug niadto gusto ko ang mabangisong mga dula sa kompiyuter. Abi nakog wala ako maapektahi niana, apan ako nagiyan kaayo sa maong mga dula—ilabina ang mabangisong matang nga inyong gibatbat. Karon giguba ko ang tanan kong mga disk sa kompiyuter nga nalangkit sa kabangisan ug madugoon. Ang resulta? Labi pang maayo ang akong panimati, ug ako dunay mas daghang panahon aron gugolon sa pagtuon, pagkat-on, ug pagpakigsulti bahin kang Jehova nga Diyos.
S. A., Gresya
Pagkaulay Salamat kaninyo tungod sa mubo apan talagsaong artikulo nga nag-ulohang “Pagkaulay—Ngano?” (Agosto 22, 1996) Niining adlawa ug panahona nga ang mga tawo maghunahuna nga ikaw maot mao nga mipalabing ulay, usa ka dakong pagdasig ang pagkakitag batan-on, matahom nga mga tawong naglaban sa mga sukdanan ni Jehova. Salamat pag-usab!
R. D., Tinipong Bansa
Amerikanong mga Indian Buot nakong ipahayag ang akong pasalamat alang sa seryeng “Amerikanong mga Indian—Unsay Ilang Kaugmaon?” (Septiyembre 8, 1996) Gihurot nakog basa ang mga artikulo ug basahon ko kana pag-usab. Ang kabahin sa pagkabanhaw ang ilabinang nakapatandog kanako.
S. B., Italya
Kining mga artikuloha nakapatandog kanako nga walay ingon. Kini nakatabang kanako sa pagkaamgo nga ang akong hunahuna bahin sa mga Indian maoy mapihigon ug wala mahiuyon sa diyosnong mga prinsipyo. Sukad sa panahon sa akong pag-eskuyla, ako naghunahunang ang mga Indian mao lamay mabangis nga mga luog. Ang mga libro sa kasaysayan yanong wala maghatag kanatog tin-awng panghunahuna sa kalibotan alirong nato. Ang inyong mga artikulo mitabang kanako sa pagkasabot sa makapasubong kahimtang sa mga Nitibong Amerikano—laing panig-ingnan sa ‘tawo nga nagamando sa tawo sa iyang kadaotan.’—Ecclesiastes 8:9.
M. M., Tinipong Bansa
Ingong usa ka kaliwat sa mga Nitibong Amerikano, gibasa nako ang inyong mga artikulo nga may dakong kahinam. Nakahilak ako sa pagkabasa sa pag-antos nga naagoman sa usa ka katawhan nga adunay dakong gugma sa kalalangan. Gipangandoy ko gayod ang adlaw sa dihang ipahinabo sa Diyos ang pagbalit-ad sa mga inhustisya nga nahimo ngadto sa tanang tawo ug kita mag-uban pagpahimulos sa usa ka paraisong yuta.
N. S., Tinipong Bansa
Pompeii Bag-o pa nakong nabasa ug bug-os nakaangay sa inyong artikulong “Pompeii—Kon Diin Mipondo ang Panahon.” (Septiyembre 8, 1996) Halos sama kadtog didto ako! Apan gusto nako ang katin-awan sa usa ka punto. Ang artikulo nag-ingong si bisan kinsang moduaw sa Pompeii “makakita gihapon sa mga galingan sa mais.” Tul-ira ako kon nasayop man ako, apan dili ba ang mais lumad man sa Amerikanhong kontinente nga wala mailhi sa mga Uropanhon hangtod sa mga adlaw ni Christopher Columbus?
R. D., Tinipong Bansa
Sori kon nakapahinabo kamig kalibog bahin niini. Maayo pa unta nga ingnong ang mga galingan ug “lugas” makita didto. Makaiikag, ang Ingles nga pulong nga “corn” mahimong magkahulogan sa yano “ang mga liso sa usa ka tanom nga sereales,” sama sa trigo o sebada.—ED.
Sukad sa pagkabata ako naikag sa karaang kasaysayan. Ang kasaysayan sa Pompeii ilabina nakadani sa kanunay kanako. Sa pagbasa nako sa artikulo, akong gibati nga samag ako mipanaw agi sa siyudad. Kahibulongan! Nahibaloan ko ang daghang detalye nga bag-o kanako. Nagustohan usab nako ang pagtandi nga gihimo sa panahon sa kataposan sa atong adlaw. Salamat sa pagtabang kanako nga mahibaloan ang mga dapit nga dili nako mabisita.
J. S. A., Brazil