Pagkaon—Butang nga Kabalak-an

“LAKAW, kan-a ang imong pagkaon uban ang kasadya,” matod sa Bibliya sa Ecclesiastes 9:7. Ang pagkaon, sa tinuoray, dili lamang usa ka kinahanglanon kondili usa usab sa kinalabwang mga kalingawan sa kinabuhi.

Tagda ang 34-anyos nga si Thomas. Ganahan siyag karne. Ug mokaon siya niini kada adlaw​—kasagaran daghang beses sa usa ka adlaw. Ang naandan niyang pamahaw naglakip sa gatas, ubay-ubayng mga itlog, tinapay o tostado nga pinahirag mantekilya, ug soriso o bacon. Sa mga tindahag pagkaon nga daling mahikay, siya moorder ug mga cheeseburger, French fries, ug mga hilada nga may gatas. Kon mokaon sa gawas, iyang palabihon ang bistik ingong pangunang potahe. Ang paborito niyang restawran magdulot ug 680 gramos nga istik ug hinurnong patatas nga gipaugdohan ug aslom nga krema, sa paaging gusto gayod niya. Ang tsokolet keyk nga gipaibabwan ug tsokolet nga sorbetes mao ang paborito niyang panam-is.

Si Thomas maoy 178 sentimetros sa gihabogon ug may timbang nga 89 kilos; sobra siyag 9 kilos, sumala sa 1995 nga kalagdaan sa pagkaon sa gobyerno sa T.B. “Wala ako mobatig kalisdanan sa akong timbang,” nag-ingon si Thomas. “Ekselente ang akong panglawas. Wala ako makapaltag usa ka adlaw nga trabaho sa miaging 12 ka tuig. Kadaghanan sa panahon, maayo ug abtik ang akong paminaw​—gawas, siyempre, human sa pagkaon ug 680 gramos nga istik.”

Ugaling, ang pagkaon ni Thomas nagdaot ba kaniya, nga sa inanay naghimo kaniyang kandidato sa atake sa kasingkasing? Sa iyang librong How We Die, si Dr. Sherwin Nuland naghisgot bahin sa ‘mga paagi sa pagkinabuhi nga mahikogon’ ug nalakip niana ang pagkaon nga may ‘pulang karne, dagkong mga hiwa sa bacon, ug mantekilya.’

Sa unsang paagi ang pipila ka pagkaon mosangpot sa sakit sa kasingkasing diha sa daghan? Unsay anaa kanila nga magpameligro? Sa dili pa hisgotan kining mga pangutanaha, susihon natog maayo ang mga risgo diha sa panglawas sa pagkasobrag timbang.

[Hulagway sa panid 3]

Nganong ang maong pagkaon maoy butang nga kabalak-an?