Gikan sa Among mga Magbabasa
Pagkamatinugoton Nag-edad ako ug 22 anyos, ug buot kong pasalamatan kamo sa serye nga “Pagkamatinugoton—Naghinobra ba ang Kalibotan?” (Enero 22, 1997) Kinahanglang atubangon sa batan-ong mga Kristohanon ang daghang kalisod. Kining mga artikuloha nagdasig kanakong dili maghinobra ug nagpalig-on sa akong determinasyon sa pag-alagad kang Jehova luyo sa mga pagpig-ot sa kalibotan.
M. B., Italya
Ang “Raven” Nalingaw gayod ako sa impormatibong artikulo nga “Ang ‘Raven’—Unsay Nakapalahi Niini?” (Enero 8, 1997) Nag-edad ako ug 18 anyos ug bag-o pa lamang gikuha ingong di bug-os panahong naturalista sa usa ka lokal nga narseriya. Lakip sa mga hayop nga among gihalwa mao ang duha ka matahom nga mga raven. Akong nakaplagan silang ingon gayod sa paghubit sa inyong artikulo—intelihente kaayo. Nagplano akong ipaambit ang artikulo sa akong mga kaubanan sa trabaho.
J. C., Tinipong Bansa
Tinuod ug makapainteres kaayo ang impormasyon nga inyong gitagana. Ang kamatuoran nga ang mga langgam sa pamilya sa uwak maoy banggiitang mga kawatan nasayran na kaayo sa kampus sa unibersidad nga akong gitunghaan sa Ghana. Nabaniog nang ang mga uwak dinhi mangawat ug bisan unsa—gikan sa isda ngadto sa sabon. Gikataho pa ngani nga ang mga uwak nanghuong sa mga kaserola sa mga estudyante ug gikaon ang ilang pagkaon!
F. A. A., Ghana
Kalingawan sa Kusina Salamat sa artikulong “Ang Kusina Mahimong Makalingaw.” (Enero 8, 1997) Nakabenepisyo usab ako sa mga kabildohay diha sa kusina. Samtang magpanit ug mga sibuyas ug mga patatas, tudloan ako sa akong inahan sa paghigugma kang Jehova ug magdasig kanako sa pag-alagad kaniya sa bug-os. Kining mga kabildohay sa kusina napamatud-ang hinungdanon kaayo sa panahon sa kalisod diin ang akong amahan misupak kanamo sa relihiyosong paagi. Karon nalipay kami sa akong inahan sa paglantaw sa akong amahan nga nahimong alagad ni Jehova. Usab, akong nakat-onan kon unsaon pagluto ang daghang lamiang mga potahe!
A. M. M., Italya
Nagtrabaho ako ingong kusinera diha sa panimalay sa usa ka amo nga anaa sa industriya sa kalingawan. Busa daghan akog kahigayonan sa pagpaambit sa espirituwal nga pagkaon uban sa mga bisita—lakip na sa pipila ka iladong tawo—samtang nagaluto sa kusina. Nagtipig ako ug pipila ka literatura sa Bibliya diha sa hunos sa kusina. Sa usa ka higayon nakapakighisgot ako sa Bibliya uban sa usa ka bisita. Sa ulahi mibalik siya sa kusina alang sa dugang panaghisgot. Samtang puliki ako sa pagpritog manok, mibasa siyag kusog gikan sa akong kopya sa librong Pinadayag—Hingpit nga Sangkoanan Niini Haduol Na! Oo, husto kamo. Ang kusina mahimong makalingaw!
A. R., Tinipong Bansa
Pagsugid sa mga Sala Nag-alagad ako ingong ansiyano sa kongregasyon, ug buot kong ipahayag ang akong apresasyon sa artikulong “Mga Batan-on Nangutana . . . Isugid Ko ba ang Akong Sala?” (Enero 22, 1997) Kining artikuloha nagtukmod sa daghang batan-on sa pagsugid sa seryosong mga kalapasan nga nahimo sa miagi. Makapalipay ang pagkakita nga human madawat ang mahigugmaong tabang, kining mga batan-ona nahibalik sa ilang relasyon uban kang Jehova. Determinado sila sa pagpabiling hinlo sa ilang kaugalingon.
O. B., Italya
Ang artikulo nakatabang kanako sa pagkaamgo nga ang pagpakahilom makadaot kaayo. Ang pagsugid hayan makapaulaw ug makalipaghong, apan kon isugid mo ang imong sala ngadto kang Jehova ug sa imong mga ginikanan, masinati mo ang mas lig-on, mas suod nga relasyon uban kanila.
B. K., Guyana
Ang artikulo midangat sa tukmang panahong kini akong gikinahanglan. Nakatabang kini kanako sa pagsabot nga kinahanglang suginlan ko ang akong mga ginikanan ug ang mga ansiyano sa kongregasyon sa akong nahimo. Gibati kong maorag ang artikulo gisulat alang kanako. Dihang sa kataposan ako silang gisuginlan sa akong mga suliran, mibati ako ug kahupayan!
A. A., Tinipong Bansa