Usa ka Panahon nga Walay Krimen
MAKAHANDURAW ka ba sa usa ka kalibotan nga walay krimen? Lagmit dili kon ikaw nakabasag mga balita nga sama sa makita sa Alemang pamantalaan nga Süddeutsche Zeitung: “Ang mga eksperto sa kriminolohiya naghisgot mahitungod sa usa ka bag-ong kinaiyahan sa krimen. Ang ilang pinulongan punog panagna sa kadaotan ug ang hulagway nga ilang gihubit makatalagmanon.”
Sumala sa usa ka surbi sa 1995 sa libolibong mga Uropanhon, halos ang tanan nabalaka nga mabiktima sa krimen. Sa Alemanya, Netherlands, Polandia, Rusya, ug United Kingdom, ang krimen nag-una sa listahan sa labing gikahadlokan sa mga tawo. Ang kahadlok sa krimen giklasipikar nga ikaduha sa Denmark, Pinlandia, ug Switzerland ug ikatulo sa Gresya, Italya, ug Pransiya. Sa 12 ka nasod nga gisurbi, Espanya lang ang wala maglista sa krimen nga lakip sa nag-unang tulo ka hinungdan sa kahadlok.
Ang gidaghanon sa krimen miusbaw pag-ayo sa Sidlakang Uropa. Sa ubay-ubay niining mga nasora, ang pag-usbaw maoy tali sa 50 ug 100 porsiyento, samtang sa ubang mga nasod, kini naglainlain gani nga gikan sa 193 ngadto 401 porsiyento!
Bisan pa, sa usa ka panahon, dihay usa ka kalibotan nga walay krimen. Kanus-a ba kadto, ug sa unsang paagi kadtong kalibotana nadaot?
Diin Magsugod ang Krimen?
Ang krimen, nga gihubit ingong “usa ka dakong paglapas sa balaod,” nagsugod sa kalibotan sa mga espiritu. Ang unang mga tawo, si Adan ug Eva, wala lalanga uban ang kriminal nga mga kiling, ni sila ang bug-os nga hinungdan sa pagsulod sa krimen sa tawhanong katilingban. Gitugotan sa usa ka hingpit nga espiritung anak sa Diyos nga ang daotang mga hunahuna motubo sa iyang kasingkasing, nga, sa dihang gipalambo, nanganak sa krimen. Siya ang nakaingon sa pagkadaot sa orihinal walay-krimen nga kalibotan. Tungod sa paglapas sa balaod sa Diyos, gihimo niya ang iyang kaugalingon nga kriminal, ug gipaila siya diha sa Bibliya ingong Satanas nga Yawa.—Santiago 1:13-15; Pinadayag 12:9.
Kay nasugdan ang pagsubay sa dalang masupakon ngadto sa Diyos diha sa dili-makitang kalangitan, si Satanas determinado nga ipakaylap ang kriminal niyang mga dalan ngadto sa katawhan sa yuta. Ang asoy sa Bibliya kon giunsa kini paghimo sa Yawa maoy mubo ug yano, apan tinuod nga panghitabo. (Genesis, mga kapitulo 2-4) Si Adan ug Eva, kay napasalaag niining malansison, labaw-tawhanong kriminal, wala mosunod sa mga sukdanan sa Diyos. Nahimo silang mga kriminal tungod sa pagsupak sa Diyos. Sa ulahi, walay duhaduhang mingislo sila sa kalisang sa dihang ang panganay nilang anak lalaki, si Cain, naghikaw pa sa igsoon niyang si Abel sa iyang labing bililhong kabtangan, ang kinabuhi mismo!
Sa ingon, sa unang upat ka tawong nabuhi sa yuta, ang tulo nahimong mga kriminal. Tungod niana si Adan, Eva, ug Cain nawad-an sa ilang kahigayonan nga mopuyo sa walay-krimen nga kalibotan. Nganong, sa paglabay nianang tanang panahon, makapaneguro kita nga karon haduol na kanang kalibotana?