Nganong Daghan Kaayong Krimen?
“ANG labing daghang krimen maoy batok sa kabtangan,” matud pa sa usa ka brosyor sa kagamhanang Britaniko. Apan, nianang nasora ang mabangis nga krimen batok sa tawo gitaho nga mao “ang labing kusog nga nagatubong matang sa krimen,” bisag gilangkoban kini ug 5 porsiento lamang sa tanang mga kalapasan.
Kining kahimtanga nagapabanaag sa krimen sa tibuok-yutang gilapdon. Ang mga pag-hijack ug mga ayroplano, armadong pagpangawat, panglugos, ug ubang mapintas nga mga buhat maoy kasagarang bahin diha sa mga lindog sa mantalaan sa kalibotan, nga subsob nakadani ug dugang pagtagad kay sa mga taho sa dili-bangis nga krimen. Nan, dayag nga ikaw ug ang imong mga kabtangan mahimong target sa krimen. Apan ngano? Unsay nagpukaw sa mga tawo nga mahimong mga kriminal?
Daghang kriminal maoy mga opurtunista. Ingong resulta, ang mga awtoridad naningkamot nga masanta ang pagdaghan sa krimen pinaagi sa pagdasig sa mga tawo nga dugang magmaalinggaton sa nagakahitabo sa ilang mga kasilinganan. Samtang ang maong mga estratehiya o mga paagi gihimo aron sulayan ang pagsanta sa mga buhat sa kriminal, sila ba nakapahunong sa mga tawo gikan sa pagkahimong kriminal? Wala.
Ang personalidad sa kriminal maoy usa ka ulohan nga gihatagag dugang pagtuki. Makaiikag, ang Pulong sa Diyos, ang Bibliya, mihatag ilhanan sa panlantaw sa kriminal sa dihang nagpasidaan sa batan-ong mga lalaki kinsa mahayloong moingon: “Dali; mangita kitag atong mapatay! Atakehon nato ang inosenteng mga tawo alang sa kalipay niana! Mahimong sila buhi ug malagsik pa dihang sila atong makit-an, apan biyaan nato silang patay inigtapos nato nila! Makaplagan ta ang tanang matang sa manggad ug pun-on nato ang atong mga balay sa mga inagaw! Dali ug uban kanamo, ug bahinon ta ang atong kinawat.” (Proverbio 1:11-14, Today’s English Version) Oo, ang kahakog, kadalo ug ang materyalistikong panghunahuna mao ang nagapukaw sa krimen.
Ang pag-abusar sa droga ug ang hedonismo mao ang nangibabaw sa hunahuna sa daghan niining ika-20ng siglo. Ang kuwarta gikinahanglan aron ibayad alang niini nga pagpatuyang, bisan kon kini nagkinahanglan sa pagsakit ug tawo o sa pagputol sa iyang kinabuhi aron makuha ang salapi. Niining ‘malisod sagubangon nga panahon,’ matuod kini diha sa nagatubong gidaghanon sa mga tawo diin “sila andam mobuhat ug krimen, dili makahulat sa pag-ula ug dugo.”—2 Timoteo 3:1, 3, 4; Proverbio 1:16, The New English Bible.
Ang krimen maoy “usa ka seryosong kalapasan il[abina] batok sa moralidad,” nag-ingon ang Webster’s Ninth New Collegiate Dictionary. Kita nagakinabuhi sa panahong nagakahugno ang moral. Si apostol Pablo mipasidaan sa mga Kristohanon sa Efeso sa mga tawong kinsa “nagalakaw diha sa kawalay-kapuslanan sa ilang mga hunahuna, samtang ang ilang kaisipan anaa sa kangitngitan, ug nahibulag gikan sa kinabuhi nga iya sa Diyos, tungod sa kaburong nga anaa kanila, tungod sa katig-a sa ilang mga kasingkasing. [Sila] nawad-an sa tanang moral nga pagbati.” Sa susama, kita angay magpatalinghog karong adlawa.—Efeso 4:17-19.
Dili ba ang pagdagsa sa sadistikong video tape nga mga rekording, ang paghimaya sa gubat, ug ang hakog nga tinguha sa malaw-ay nga mga kalingawan tanan nakaamot sa pipila nga mahimong mga kriminal samtang ang inosenteng mga tawo gihimong target sa krimen? Apan dunay laing butang pa ang nalangkit niining kriminal nga ingtriga. Unsa kini?
Kini mao si Satanas nga Yawa. Ang iyang kasuko nagduslit sa kalayo sa walay-hunahunang kapintasan ug krimen nga maoy kinaiyahan niining presenteng kalibotan. (1 Juan 5:19; Pinadayag 12:12) Ang iyang tumong mao ang pagpatalikod sa tanang katawhan gikan sa matuod nga Diyos, si Jehova. Bisan tuod siya molampos diha sa daghan, ang Bibliya matagnaong nagpadayag nga siya mapakyas sa pagbungkag sa pagkamaunongon sa matuod nga mga alagad sa Diyos. Sa kataposan, si Satanas pagawagtangon. Apan, bisan pag si Satanas mawala na, kana ba magkahulogan sa kataposan sa krimen? Ug ang kataposan sa krimen karon haduol na ba?