Gikan sa Among mga Magbabasa
Aksidente o Gidisenyo? Mao pay pagkatapos nako pagbasa sa seryeng “Sa Unsang Paagi Kita Mitungha Dinhi? Pinaagi ba sa Aksidente o Gidisenyo?” (Mayo 8, 1997) Kini nakapaikag kanako tungod sa daghang katarongan: (1) Ang pagkayano nga niana gitanyag ninyo ang maong lalom, komplikadong ulohan sama sa ebolusyon, ingon man ang pagtuo nga niana inyong gidepensahan ang hunahuna sa Bibliya bahin sa atong sinugdanan. (2) Ang mga ilustrasyon nga gigamit ninyo aron makab-ot ang inyong dalayegong tumong. Usa ako ka tigdukiduki ug estudyante sa usa ka dakong tunghaan labot sa mga komunikasyon. Ang maong mga artikulo nagpamatuod nga kamo KANUNAYNG nagahimog makuting panukiduki sa dili pa kamo magpatik. Kana sa walay duhaduha maoy katarongan kon nganong ang akong kaubang mga magsusulat, mga editor, ug mga tigdukiduki ngatanan regular nga nagabasa ug nalingaw sa Pagmata!
D. S. T., Cameroon
Nganong Masakiton Kaayo? Nasinati ko ang tanang emosyon nga gipahayag ni Jason sa artikulong “Mga Batan-on Nangutana . . . Nganong Masakiton Kaayo Ako?” (Abril 22, 1997) Matag panahong basahon ko ang artikulo, bation ko nga ako nakig-estorya sa usa nga nakasabot, nagpabili, ug nagatagad sa akong kahimtang. Daghan kaayong salamat sa pagpagaan sa akong palas-anon. Nahibalo ako nga si Jehova nagatagad ug nga sa iyang tinudlong panahon, wad-on niya ang tanang balatian.
O. A., Ghana
Ako narekonosir nga may mga pag-atake duha ka semana una pa migula kining artikuloha. Ako bag-o pang nag-18 anyos, ug ang pagkamasakiton kusog nga nagpamenos sa tanang kagawasan nga bag-o lang nakong nabatonan. Adunay daghan kaayong panagana nga himoon ug mga pildoras nga hinumdoman. Nakahatag usab kanag dakong pag-antos sa akong mga ginikanan, nga namatyan na ug laing duha ka anak. Ang artikulo nakatandog gayod nako sa paaging kana nakapahilak kanako. Kini naghisgot sa mismong mga hunahuna nga akong gipukgo, ug gibati ko nga daw normal na usab. Nakita kong adunay uban nga may susamang mga problema ug mga kabalaka. Pinaagi sa iyang organisasyon, gipapatik ni Jehova ang impormasyon nga akong gikinahanglan aron makapabiling malig-on sa espirituwal.
D. S., Tinipong Bansa
Sa dihang gibasa ko ang artikulo, naamgohan ko nga ang akong sakit nagpahinabog dugang pag-antos sa akong mga ginikanan kay kang bisan kinsa. Gisultihan nila ako nga ang akong sakit napanunod, ug kini nakapasubo kanila. Sa dihang makita ko sila nga ingon niana, bation ko ang hilabihang kaluoy kanila.
Y. H., Hapon
Sa pagkabata napahimuslan ko ang maayong panglawas. Apan, sa akong pagkatin-edyer naagoman ko ang daghang sakit. Misulod ako sa bug-os panahong ministeryo, ug sa unang duha ka bulan, wala nako makuha ang akong mga tumong tungod sa dili maayong panglawas. Ako naguol pag-ayo, (sayop) nga naghunahunang ako may daotang nabuhat batok kang Jehova ug gisilotan ug sakit. Ang artikulo nakatabang nako nga makapasibo sa husto sa akong kahimtang ug madasig.
C. K., Ghana
Ang akong nuybe-anyos nga anak babaye may depekto sa pagkakat-on ug paralisis sa utok. Utokan kaayo siya ug nahibalo nga ang iyang mga depekto naglimite sa normal nga kalihokan. Bisan pa sa iyang naandang masadyaon, malipayong panghunahuna, sa matag karon ug unya, nakapaguol kini kaniya ug diyutay. Kining artikuloha nakapadasig kaniya pag-ayo, uban sa kada gabii nga mga panaghisgot nga iyang napahimuslan uban sa iyang papa bahin sa umaabot nga Paraiso diin siya mahisama na unya sa ubang kabataan.
Y. P., Tinipong Bansa
Sulod sa mga napulo ka tuig na, ako nakigbisog batok sa ‘dili makitang sakit,’ usa nga nagaapektar sa akong sistema sa paghilis. Tungod niana, kinahanglang mohunong ako sa bug-os panahong ministeryo. Sa pagbasa niini nga artikulo, gibati nako, sa unang higayon, nga daw adunay nakasabot sa akong pakigbisog. Usa ka kahupayan nga mahibalo nga wala ako mag-inusara. Morag usa ka dakong palas-anon ang gikuha gikan kanako. Dili ko gayod kamo igong mapasalamatan. Kining makapadasig ug tukma sa panahong mga artikulo nagpalig-on kanamo niining daang sistema.
L. C., Canada