Natandog ang Iyang Kasingkasing

“Trese kaming mga anak sa pamilya,” nagsulat si Gloria Adame, “4 ang lalaki ug 9 ang babaye. Kadto maoy 1984. Si Papa mipauli sa balay sa Mexico ug nasayod nga samtang siya nagtrabaho sa halayo sa Tinipong Bansa, ang among pamilya nagsugod sa pagtuon sa Bibliya uban sa mga Saksi ni Jehova. Wala gayod siya mahimuot, ug siya misugod sa pagsupak kanamo. Morag sa matag adlaw nga molabay, nagkatig-a ang iyang kasingkasing.

“Gihigugma gayod namo ang among amahan, ug buot namong makabaton siyag kaayohan gikan sa nagahatag-kinabuhing kahibalo nga among ginadawat. Matag adlaw, kami kinasingkasing nga nag-ampo kang Jehova, naghangyo kaniya nga buksan ang dalan alang namo nga makasulti kang Papa bahin sa mga katuyoan ni Jehova. Gidungog ni Jehova ang among pangamuyo tungod kay gihatagan niya kami ug kaisog nga magkatapok matag gabii diha sa sala, diin si Papa mogugol kada gabii sa pagtan-aw ug telebisyon. Didto, ang akong inahan ug kaming mga babaye magtapok sa pagbasa sa inadlaw nga teksto sa Bibliya.

“Si Mama ang magdumala sa panaghisgot, ug human mabasa ang mga komento, magpulipuli kami sa pag-ampo. Sa dihang ang among kinamanghorang babaye nga si Marie, nga singko anyos lamang, ang miampo, siya kinasingkasing nga mangamuyo: ‘Jehova, palihog lukmaya ang kasingkasing ni Papa aron siya usab mahimong imong Saksi.’ Morag wala magapamati si Papa, kay iyang pakusgan ang gikusgon sa TV. Bisan pa niana, sa lakat sa panahon, siya misugod sa pagpahinay sa gikusgon, hangtod usa ka gabii niana gipatay niya kana sa bug-os.

“Nianang gabhiona, ingon sa naandan namo, si Mama nangutana kon kansang turno ang pagbasa sa teksto. Sa among dakong kahibulong, si Papa miingon: ‘Akong turno.’ Kami nahibulong apan walay gisulti. Si Mama wala motutol o misuknag mga pangutana apan nagtunol kaniya sa bokletang Pagsusi sa Kasulatan sa Adlaw-Adlaw. Human niya dumalaha ang panaghisgot sa teksto sa Bibliya, si Mama nangutana kon kansang turno ang pag-ampo. ‘Akong turno,’ si Papa miingon.

“Kami naamang. Sa tungatunga sa pag-ampo, dili na namo mapugngan ang among mga luha. Nakahilak usab si Papa, ug siya naghangyo kang Jehova nga pasayloon siya tungod sa pagpasipala Kaniya. Gihangyo usab niya si Mama nga pasayloon siya tungod sa pagsupak kanamo.

“Busa sa 1986 nahunong ang pagsupak gikan sa among amahan. Sa 1990 ang among pamilya mibalhin sa Texas sa Tinipong Bansa. Sa ulahi, si Papa nagpahinungod sa iyang kinabuhi kang Jehova ug nagpasimbolo niini pinaagig bawtismo sa tubig, sama sa gibuhat sa pito kanamong managsoong babaye. Sa Abril 1997, si Papa natudlo isip usa ka Kristohanong ansiyano. Hangtod niining adlawa, ang pagtagad sa inadlaw nga teksto sa Bibliya ingong usa ka pamilya hinungdanon gayod kanamo, ug ang pag-ampo kang Jehova maoy patukoranan sa among pamilyahanong kinabuhi.”

[Hulagway sa panid 31]

1. Upat ka anak babaye nga nagpayunir sa Mexico. Si Marie maoy anaa sa atubangan

2. Si Juanita ug Isaac Adame, uban sa pipila sa ilang mga anak. Si Gloria maoy atua sa halayong tuo