Gikan sa Among mga Magbabasa

Mga Rinyon Buot kong sultihan kamo nga ako natandog pag-ayo sa artikulong “Imong mga Rinyon​—Usa ka Tigsala sa Kinabuhi.” (Agosto 8, 1997) Gisultihan ako sa akong doktor nga ako adunay sakit sa rinyon. Tungod sa artikulo, ako karon mibating wala na mag-inusara sa akong sakit.

V. M., Tinipong Bansa

Ako adunay sakit sa rinyon nga tungod niana ako naospital sulod sa upat ka bulan. Ang pagbasa sa inyong artikulo mitabang kanako nga makaamgo sa akong pagkawalay-alamag sa akong lawas. Karon ako makapatin-aw nag mas maayo sa akong sakit ngadto sa uban.

S. H., Hapon

Kini nga artikulo miabot sa panahon dihang ang akong asawa gisultihan nga siya adunay kanser sa rinyon. Bisan tuod ang dayagnos nakapakugang kanamo, among nasabtan pag-ayo ang lainlaing mga trabaho sa rinyon sa dihang kini gipatin-aw kanamo sa siruhano. Ang akong asawa gikuhaan ug usa ka rinyon pinaagig operasyon ug nagpaayo na karon gikan sa operasyon.

G. S., India

Ang Estorya sa Magkukulit Nakapadasig kanako ang pagbasa sa “Mas Maayo kay sa Pagkainila sa Kalibotan,” ang kasinatian ni Celo Pertot. (Agosto 22, 1997) Sa wala pa ako mahimong usa ka Kristohanon, nagapangab-ot ako sa usa ka karera sa musika ug teatro. Sa gabii una pa sa akong bawtismo, nakadawat ako ug tawag sa telepono gikan sa mga magsusulat sa usa ka popular nga seryal sa telebisyon. Sa dihang gisultihan ko sila nga ako dili na usa ka tiglingaw, sila miingon, “Nabuang ka ba?” Sama ni Celo Pertot, akong gibati nga si Jehova nagpanalangin sa akong desisyon sa dakong paagi.

R. F., Tinipong Bansa

Rusong Teologo Salamat kaayo sa pagpatik sa artikulong “Mga Saksi ni Jehova sa Rusya.” (Agosto 22, 1997) Dako kaayo ang akong pagtahod ug pagdayeg kang Sergei Ivanenko tungod sa pagbaton ug kaisog ug tinguha sa pagpatik sa kamatuoran mahitungod sa mga Saksi ni Jehova.

S. M., Tinipong Bansa

Pagdumot Ang seryal nga “Nganong Naghingapin ang Pagdumot? Nganong Nihit Kaayo ang Gugma?” (Septiyembre 8, 1997) nakabaton sa usa sa labing maanindot nga mga hapin nga inyong napatik sukad. Ang mga artikulo nagtabang kanako nga susihon pag maayo kon nganong ang mga tawo walay pagsalig sa mga estranghero ug sa mga tawo nga lahi ug mga kultura.

J. M., Tinipong Bansa

RSD​—Masakit nga Balatian Gibati ko nga akong obligasyon ang pagsulat kaninyo human sa pagbasa sa artikulong “RSD​—Usa ka Makalibog, Masakit nga Balatian.” (Septiyembre 8, 1997) Sa Enero, akong nahibaloan nga ako adunay RSD. Misulay ako sa pagpangita ug pipila ka impormasyon bahin niana. Mao nga nanglugmay ang akong mga luha sa dihang akong nakita kini nga artikulo. Kadto maoy praktikal, ug nagtubag sa daghan sa akong pangutana.

W. B., Inglaterra

Ako nag-antos sa RSD sulod sa upat ka tuig. Salamat sa inyong pagpaningkamot sa paghimo ug bug-os nga pagtuki niini nga ulohan. Kini nagpakita gayod ug gugma sa silingan sa inyong bahin.

G. S., Alemanya

Ang akong bana nag-antos sa RSD, ug nalisdan kaayo kami sa pagpatin-aw sa maong sakit ngadto sa ubang tawo. Karon nga kini gisaysay nag maayo sa artikulo, kini nahimong mas sayon na alang kanamo. Gipasa usab namo kini nga materyal ngadto sa mga doktor ug mga buhatan sa rehabilitasyon. Ang pagbasa sa asoy sa pakigbisog ni Karen Orf sa RSD sama ra nga nagabasa sa kinabuhi sa akong bana! Sama kang Karen, kami naglantaw sa unahan sa bag-ong kalibotan, diin wala nay kasakit.

K. P., Australia

Ako nagpasalamat kang Karen sa iyang estorya. Anaa siya sa akong mga hunahuna ug mga pag-ampo, ug ako naglaom nga siya padayong mouswag. Ang RSD nag-apektar sa akong likod ug mga bitiis hangtod sa mga lapalapa sa akong mga tiil. Ang paglingkod sa mga tigom ug paglakaw diha sa pag-alagad sa kanataran nakahatag kanako ug dakong kalisod ug kasakit. Bisan pa niana, uban sa pagpaluyo ni Jehova, kini wala makapugong kanako.

C. K., Inglaterra