Ang Hunahuna sa Bibliya

Imong Panapot ug Pamostura—Hinungdanon ba Kini sa Diyos?

“Maingon nga ang indise magbutyag sa kaundan sa libro, . . . mao man usab ang panggawas nga panagway ug mga besti, sa lalaki o babaye, maghatag kanatog timailhan sa panghunahuna.”​—Ingles nga magsusulat-ug-dula nga si Philip Massinger.

SA IKATULONG siglo K.P., ang magsusulat sa simbahan nga si Titus Clemens naghikay ug taas nga listahan sa mga lagda nga nagmando sa panapot ug pamostura. Ang mga dayandayan ug maluho o mabulokong mga panapton gidili. Ang mga babaye dili gayod magpatina sa ilang buhok ni “hugawhugawan ang ilang mga nawong sa makapalit-ag nga mga galamiton sa pagpanglimbong,” nga mao, “ang pagkolorete sa nawong.” Ang mga lalaki gisugo nga magpatupi tungod kay “ang mubong buhok . . . magpakita sa usa ka lalaki nga ugdang tan-awon,” apan ang bungot dili gayod hilabtan, kay kini “maghatag sa nawong ug dignidad ug amahanong awtoridad.”a

Kasiglohan sa ulahi ang Protestanteng lider nga si John Calvin naghimog mga balaod nga nagtino sa kolor ug matang sa sinina nga mahimong isul-ob sa iyang mga sumusunod. Ang alahas ug engkahe wala uyoni, ug ang usa ka babaye mahimong bilanggoon tungod sa paghuping sa buhok sa “imoral nga gitas-on.”

Ang maong naghingaping mga panghunahuna, nga gipaluyohan sa relihiyosong mga lider latas sa katuigan, nakapahibulong sa sinserong mga tawo, Hinungdanon ba gayod sa Diyos kon unsay akong isul-ob? Supak ba siya sa pipila ka uso o sa paggamit sa mek-ap? Unsay gitudlo sa Bibliya?

Usa ka Personal nga Butang

Makaiikag, sumala sa gisulat sa Juan 8:​31, 32, si Jesus miingon sa iyang mga tinun-an: “Kon mopabilin kamo sa akong pulong, . . . inyong mahibaloan ang kamatuoran, ug ang kamatuoran magpagawas kaninyo.” Oo, ang katuyoan sa mga kamatuoran nga gitudlo ni Jesus mao ang pagpagawas sa mga tawo gikan sa madaogdaogong mga palas-anon nga mitungha tungod sa tradisyon ug bakak nga mga pagtulon-an. Kini gidisenyo sa pagpalagsik niadtong “nagabudlay ug nabug-atan.” (Mateo 11:28) Si Jesus ni ang iyang Amahan, si Jehova nga Diyos, wala magtinguha sa pagkontrolar sa mga kinabuhi sa mga tawo sa gilapdon nga ang mga tawo dili na makapili nga kinaugalingon ug makapangatarongan bahin sa personal nga mga butang. Buot ni Jehova nga sila mahimong hamtong nga mga tawo nga “pinaagi sa pagginamit nakabansay sa ilang kagahom sa pag-ila nga mailhan ang husto ug ang sayop.”​—Hebreohanon 5:14.

Busa, ang Bibliya wala magtagana ug detalyadong mga balaod nga nagmando sa panapot ug pamostura o sa paggamit ug mga kosmetiko, gawas sa pipila ka espesipikong mga balaod maylabot sa panapot nga gipatuman ngadto sa mga Hudiyo sa Moisesnong Balaod, nga gituyo aron matabangan sila nga malahi gikan sa mga nasod sa palibot ug sa ilang imoral nga impluwensiya. (Numeros 15:​38-41; Deuteronomio 22:5) Sulod sa Kristohanong kahikayan, ang panapot ug pamostura sa paninugdan maoy butang nga pilion sa matag usa.

Apan, wala kana magpasabot nga ang Diyos dili-manumbaling kon unsay atong isul-ob o dawaton ang bisan unsa. Sa kasukwahi, ang Bibliya naundan sa makataronganong mga lagda nga nagbanaag sa hunahuna sa Diyos bahin sa panapot ug pamostura.

“Uban ang Kaligdong ug Pagkamabuot sa Hunahuna”

Si apostol Pablo misulat nga ang Kristohanong mga babaye “magdayandayan sa ilang kaugalingon sa mahapsay nga sinina, uban ang kaligdong ug pagkamabuot sa hunahuna, dili pinaagi sa mga estilo sa pagsalapid sa buhok ug bulawan o mga perlas o mahalon kaayo nga sapot.” Sa susama, si Pedro nagtambag batok sa “panggawas nga pagsalapid sa buhok ug sa pagsul-ob ug mga pahiyas nga bulawan.”​—1 Timoteo 2:​9; 1 Pedro 3:3.

Gipakita ba ni Pedro ug Pablo nga ang Kristohanong mga babaye ug lalaki kinahanglang maglikay sa pagpaarang-arang sa ilang panagway? Dili gayod! Sa pagkatinuod, ang Bibliya naghisgot sa matinumanong mga lalaki ug babaye nga naggamit ug alahas o kosmetikong mga lana ug mga pahumot. Una pa sa iyang pag-atubang kang Haring Ahasuero, si Ester miagi ug dugay nga rehimen sa pagpatahom nga naglakip sa humot nga mga lana ug masahe. Ug si Jose gisul-oban ug mga besti sa pinong lino ug kulentas nga bulawan.​—Genesis 41:​42; Exodo 32:​2, 3; Ester 2:​7, 12, 15.

Ang prase nga “pagkamabuot sa hunahuna,” sumala sa paggamit ni Pablo, motabang kanato sa pagsabot sa tambag. Ang orihinal nga Gregong pulong nagkahulogan ug pagkakasarangan ug pagpugong sa kaugalingon. Nagpasabot kini ug paghunahuna sa kaugalingon sa makasaranganong paagi, nga dili magbutad ug dili-angayng pagtagad. Ang ubang mga hubad sa Bibliya nagbadbad niining pulonga ingong “pagkamaalamon,” “masinabtanon,” “dalisay,” o “uban sa pagpugong-sa-kaugalingon.” Kining maong hiyas maoy hinungdanong kinahanglanon alang sa Kristohanong mga ansiyano.​—1 Timoteo 3:2.

Busa, sa pagsulti kanato nga ang atong panapot ug pamostura kinahanglang ligdong ug hapsay, ang Kasulatan nagdasig kanato nga likayan ang bisan unsang hinobrang estilo nga makapayugot sa uban ug magdaot sa atong reputasyon ug nianang sa Kristohanong kongregasyon. Inay butaron ang pagtagad sa ilang panagway pinaagi sa pisikal nga dayandayan, kadtong nag-angkon nga nagtahod sa Diyos kinahanglang magpasundayag ug pagkamabuot sa hunahuna ug maghatag gibug-aton sa “natago nga pagkatawo sa kasingkasing diha sa dili-madunoton nga sapot sa malinawon ug malumong espiritu.” Kini, mihinapos si Pedro, “dakog bili sa mga mata sa Diyos.”​—1 Pedro 3:4.

Ang mga Kristohanon maoy “talan-awon sa teatro alang sa kalibotan.” Kinahanglang magbantay sila kon unsay hunahuna sa uban kanila, ilabina kon tagdon ang sugo nga kinahanglang isangyaw nila ang maayong balita. (1 Corinto 4:​9; Mateo 24:14) Busa dili nila tugotan ang bisan unsa, lakip ang ilang panagway, nga makalinga sa uban gikan sa pagpamati nianang hinungdanong mensahe.​—2 Corinto 4:2.

Bisan tuod magkalainlain ang mga estilo sa matag dapit, ang Bibliya naghatag sa mga tawo ug tin-aw, makataronganong mga lagda nga makapaarang kanila sa pagpili nga maalamon. Basta sundon sa mga tawo kining mga prinsipyoha, ang Diyos dagaya ug mahigugmaong magtugot sa tanan sa pagpili sa ilang panapot ug pamostura.

[Footnote]