Mahapsay nga Sinina Nagabutyag sa Pagkamasimbahon sa Diyos
1. Sa unsang paagi atong ikapahayag ang atong pagpabili sa atong taliabot nga distritong kombensiyon?
1 Sa di madugay kita makapribilehiyo nga mahimong mga dinapit ni Jehova sa 2003-2004 “Himayaa ang Diyos” nga Distritong Kombensiyon. Pagkamapasalamaton nato kang Jehova tungod sa pagdapit kanato ngadto sa maong dagayang espirituwal nga bangkete! Atong mapasundayag ang atong pagkamasimbahon kaniya ug ang atong pagpabili sa iyang espirituwal nga mga tagana pinaagi sa atong pagsinina ug pagpamostura.—Sal. 116:12, 17.
2. Nganong hinungdanon nga kita hinlo ug hapsay ang pamostura?
2 Hinlo ug Hapsay: Ang atong panagway angayng magbanaag sa mga sukdanan sa atong Diyos, kinsa hinlo ug hapsay. (1 Cor. 14:33; 2 Cor. 7:1) Ang atong kaugalingon, buhok, ug mga kuko kinahanglang mahinlo, ug ang atong panagway mahapsay gayod. Ang nagkato nga pamostura maoy komon karon. Apan, dili rason alang sa usa ka Kristohanon nga magkato tungod lang kay ang usa ka artista sa pelikula o hawod sa esports nagkato tan-awon. Kon mosunod kita sa uso, malisdan ang mga tawo sa pag-ila sa kalainan tali niadtong nag-alagad sa Diyos ug niadtong wala mag-alagad kaniya.—Mal. 3:18.
3. Sa unsang paagi atong maseguro nga ang atong panagway mahiuyon sa tambag nga makaplagan sa 1 Timoteo 2:9, 10?
3 Sinina nga Nahiangay sa Kristohanong mga Ministro: Sa dihang si apostol Pablo nagsulat ngadto sa Kristohanong magtatan-aw nga si Timoteo, iyang gidasig nga “ang mga babaye magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna, . . . sa paagi nga nahiangay sa mga babaye nga nagpaila nga masimbahon sa Diyos, sa ato pa, pinaagi sa maayong mga buhat.” (1 Tim. 2:9, 10) Aron maseguro nga ang atong sinina mahapsay nagkinahanglag maayo gayong paghunahuna. Ang sinina angayng hapsay, limpiyo, ug kasarangan—dili mapagawalon, mahilayon, o makapapukaw sa gana sa sekso.—1 Ped. 3:3.
4, 5. Unsang mga pasidaan ang angayng patalinghogan sa Kristohanong mga lalaki ug babaye?
4 Nagpasidaan usab si Pablo batok sa paghinobra sa “mga estilo sa pagsalapid sa buhok ug bulawan o sa mga perlas o sa mahalon kaayong sapot.” (1 Tim. 2:9) Ang pagkabalanse sa paggamit ug mga alahas, mek-ap, ug uban pang mga dayandayan maoy maalamong dalan nga angayng sundon sa Kristohanong mga babaye.—Prov. 11:2.
5 Ang prinsipyo sa tambag ni Pablo nga gitumong ngadto sa Kristohanong mga babaye mapadapat usab ngadto sa Kristohanong mga lalaki. Ang mga igsoong lalaki angayng maglikay sa mga estilo nga magbanaag sa uso sa kalibotan. (1 Juan 2:16) Pananglitan, diha sa ubang mga nasod ang lawlaw, dagko kaayong mga sinina maoy popular, apan kining matanga sa estilo dili makahatag ug haom nga panagway alang sa usa ka ministro sa Diyos.
6. Nganong angay natong huptan ang hataas nga sukdanan sa atong sinina ug pamostura sa dihang mobiyahe sa pagngadto-ngari sa kombensiyon, samtang anaa sa kombensiyon, ug human sa mga sesyon matag adlaw?
6 Panahon sa Paglingawlingaw: Sa dihang motambong sa programa, kadaghanan sa mga igsoong lalaki ug babaye naghatag ug maayo kaayong panig-ingnan maylabot sa sinina ug pamostura. Bisan pa niana, ang mga taho nagpaila nga ang pipila nagpasagad sa dihang nagabiyahe sa pagngadto-ngari sa kombensiyon o sa dihang naglingawlingaw human sa mga sesyon. Sa pagkatinuod, ang atong personal nga panagway—panahon man sa programa o sa ubang mga panahon—makaimpluwensiya kon unsaon paglantaw sa uban ang katawhan sa Diyos. Sanglit isul-ob man nato ang atong mga badge kard sa kombensiyon, kita angayng magsinina sa paagi nga nahiangay sa Kristohanong mga ministro. Kini sagad magtukmod sa uban sa pagdayeg kanato ug magpaarang kanato sa paghatag ug pamatuod.—1 Cor. 10:31-33.
7. Unsay mahimong epekto sa atong hapsay nga sinina ug pamostura ngadto sa uban?
7 Maingon nga ang malulotong pahiyom makapasanag sa atong nawong, mao usab ang hapsay nga sinina ug pamostura makahatag ug dignidad sa mensahe nga atong dala ug sa organisasyon nga atong gihawasan. Ang pipila nga mag-obserbar kanato panahon sa “Himayaa ang Diyos” nga Distritong mga Kombensiyon niining tuiga mahimong matukmod sa pagpakisayod kon nganong kita lahi ug sa ngadtongadto moingon: “Mouban kami kaninyo, kay kami nakadungog [ug nakaobserbar] nga ang Diyos nagauban kaninyo.” (Zac. 8:23) Hinaot ang matag usa kanato magpasundayag sa atong pagkamasimbahon kang Jehova pinaagi sa atong sinina ug pamostura.
[Kahon sa panid 5]
Ipakita ang Maligdong nga Panagway
▪ Sa dihang magbiyahe
▪ Didto sa kombensiyon
▪ Panahon sa paglingawlingaw