Pangutana

◼ Unsa nga pamesti ang haom sa dihang moduaw sa mga pasilidad nga gigamit sa pag-alagad kang Jehova?

Sa tibuok kalibotan, ang mga Kingdom Hall, Assembly Hall, puy-anang Bethel, ug mga pasilidad sa sanga nailhan ingong espesyal nga mga dapit nga napahinungod alang sa pag-alagad kang Jehova. Kining mga dapita maoy hapsay, hinlo, ug maayong pagkaatiman, nga nagbanaag sa kaligdong. Sa pagkatinuod, dako gayod kinig kalainan sa kasagaran natong makita sa sistema sa mga butang ni Satanas. Kadtong mga moduaw sa mga dapit alang sa pag-alagad kang Jehova angay usab nga mailhang gipanag-iya ni Jehova, kinsa nagabuhat sa iyang kabubut-on.

Ingong mga Kristohanon, atong ‘ginarekomendar ang atong kaugalingon nga mga ministro sa Diyos’ sa tanang paagi, lakip sa atong haom, hapsay nga pamesti ug pamostura. (2 Cor. 6:3, 4) Gidahom usab nga atong huptan ang maayong pamatasan. Sa tanang panahon ang atong pamesti ug pamostura angay nga magbanaag sa kaligdong ug dignidad nga haom sa mga alagad ni Jehova nga Diyos. Ilabinang himoon nato kini sa dihang moduaw kita sa mga pasilidad sa hedkuwarter sa New York ug sa mga sanga sa tibuok kalibotan.

Sa paghisgot sa kahinungdanon sa haom nga pamesti ug pamostura, ang librong Organisado Aron Buhaton ang Kabubut-on ni Jehova nagkomento bahin sa panginahanglan sa pisikal nga kahinlo, makasaranganong pamesti, ug maayong pamostura sa dihang kita mosangyaw ug motambong sa mga tigom. Dayon, sa panid 138, parapo 3, kini nag-ingon: “Hinumdomi nga ang ngalang Bethel nagkahulogang ‘Balay sa Diyos.’ Busa, ang atong besti, pagpamostura, ug panggawi angay nga mahisama sa kon unsay gidahom kanato sa dihang kita motambong sa mga tigom alang sa pagsimba diha sa Kingdom Hall.” Kining hataas nga sukdanan angayng sundon sa mga magmamantala nga moduaw sa Bethel, gikan man sila sa duol o lagyong mga dapit. Pinaagi niini, atong mapasundayag ang nahiangay nga apresasyon ug pagtahod.—Sal. 29:2.

Ang atong pamesti angayng ‘magpaila nga kita masimbahon sa Diyos.’ (1 Tim. 2:10) Ang haom nga pamesti ug pamostura adunay maayong epekto sa panglantaw sa uban bahin sa matuod nga pagsimba kang Jehova. Apan, namatikdan nga sa dihang mobisita sa mga pasilidad nga gigamit sa pag-alagad kang Jehova, ang pipila ka igsoon hilabihan ka kaswal, lago, o nagsul-ob ug mga sinina nga halos nagladlad na sa mga parte sa lawas. Kini dili haom sa mga Kristohanon sa bisan unsang panahon. Diha sa atong pamesti ug pamostura, ug sa tanang ubang bahin sa atong Kristohanong kinabuhi, gitinguha natong huptan ang hataas nga mga sukdanan nga magpalahi sa katawhan sa Diyos gikan sa kalibotan, nga himoon ang tanang butang alang sa kahimayaan sa Diyos.—Roma 12:2; 1 Cor. 10:31.

Busa, sa dihang mobisita sa hedkuwarter ug sanga sa New York o sa ubang mga sanga, giplano man kana nga pagbisita o samtang nagbakasyon, pangutan-a ang imong kaugalingon: ‘Ang ako bang pamesti ug pamostura magbanaag sa pagkamakasaranganon, kahinlo, ug kaligdong sa dapit nga akong adtoan? Kini ba magbanaag gayod sa Diyos nga akong gisimba? Ang uban ba mabalda o masilo sa akong panagway? Pinaagi sa atong pamesti ug pamostura, hinaot nga kanunay kitang ‘magdayandayan sa pagtulon-an sa atong Manluluwas, ang Diyos, sa tanang butang’!—Tito 2:10.