Pangutana

● Nganong kinahanglang hatagan sa linaing pagtagad ang atong pagpamiste ug pamostura sa dihang nagaduaw sa mga sangang opisina sa Sosyedad?

Ang atong panapot ug pamostura sa tanang panahon kinahanglang magsumbaliksilaw sa dignidad nga angay sa mga alagad ni Jehova. Kini ilabinang tinuod sa dihang moduaw sa Bethel. Ang Organisado sa Pagtuman sa Atong Ministeryo nagakomento sa panginahanglan alang sa pisikal nga kahinlo ug kasarangang pananina sa dihang mosangyaw ug anaa sa mga tigom. Dayon, sa panid 131, parapo 2, kini nag-ingon: “Mao usab ang himoon sa dihang moduaw sa puy-anan sa Bethel sa Brooklyn o sa bisan haing sangang opisina sa Sosyedad. Hinumdomi, ang ngalang Bethel nagakahulogang ‘Balay sa Diyos,’ mao nga ang atong senina, pamostura ug pamatasan kinahanglang susama nianang gidahom kanato sa dihang motambong kitag mga tigom alang sa pagsimba didto sa Kingdom Hall.”

Si Pablo miingon nga kita “usa ka talan-awon sa kalibotan.” (1 Cor. 4:9) Busa ang atong senina ug pamostura kinahanglang adunay positibong impluwensiya sa uban maylabot sa matuod nga pagsimba. Apan, namatikdan na nga ang ubang mga igsoon, sa dihang nagaduaw sa Bethel, daw sobra ra ka kasuwal sa ilang senina. Ang maong senina dili angay sa dihang moduaw sa mga pasilidad sa sanga. Niining butanga, gitinguha ta nga mentinahon ang hataas nga mga sukdanan nga magpaila sa katawhan sa Diyos ingong lahi gikan sa kalibotan pinaagig pagbuhat sa tanang butang alang sa himaya sa Diyos. (Roma 12:2; 1 Cor. 10:31) Maoy maayo usab sa pagsulti sa atong mga estudyante sa Bibliya ug sa uban pa nga hayan moduaw sa Bethel sa unang higayon nga pahinumdoman sila sa paghatag ug pagtagad sa hustong pamiste ug pamostura.

Mao nga kon moduaw sa mga pasilidad sa Sosyedad, pangutan-ang kaugalingon: ‘Ang ako bang senina ug pamostura maoy kasarangan? (Miq. 6:8) Kini ba nagabanaag ug maayo sa Diyos nga akong ginasimba? Ang uban ba mahinaway sa akong panagway?’ Hinaot nga kita kanunay “nagadayandayan sa pagtulon-an sa atong Manluluwas, ang Diyos, diha sa tanang butang” pinaagig atong pananina ug pamostura.​—Tito 2:10.