Pagtanyag sa Maayong Balita—Pinaagig Pagpahimulos sa Kahigayonan sa Paghimog Impormal nga Pagpamatuod
1 Gisugo ni Jesus ang iyang mga tinun-an sa pagpasanag sa ilang kahayag. (Mat. 5:14-16) Niining bahina, si Jesus maoy modelo, ingon sa gipakita sa dihang iyang gipahimuslan ang higayon sa pagsulti ngadto sa babayeng Samaritana sa atabay didto sa Sicar. (Juan 4:5-30) Komosta man kita? Ato bang gipahimuslan ang maong mga kahigayonan sa pagpamatuod?
2 Mahimong adunay mga okasyon hapit kada adlaw nga kita makaarang sa pagpamatuod. Sa unsang paagi? Pinaagig impormal nga pagpamatuod. Kon kita alisto sa pag-ila sa mga kahigayonan ug unya manlimbasog, daghan pang katawhan ang maabot sa kamatuoran.
NGADTO KANG KINSA NGA KITA MAKASANGYAW?
3 Dugang pa sa pormal nga pagpamatuod, kita makasangyaw man sa atong mga kaubanan sa trabaho, mga eskolmet, mga kaubanan sa negosyo, mga paryente ug ubang mga kaila sa impormal nga paagi. Sa dihang nagabiyahe sa bus, tren o ayroplano, mahimong makaarang kita sa pag-abli sa panaghisgot kanilang kaubanang nagabiyahe. Sa dihang nagabakasyon kita makapaambit man sa maayong balita sa mga trabahante sa hotel, mga nagabantay sa gasolinahan ug mga nagatrabaho sa restawrant. Kita makapakigsulti man sa uban samtang nagahulat diha sa opisina sa doktor. Samtang anaa sa balay kita tingali makapamatuod sa mga silingan, mga ahente, o mga tawong nagahatod ug mga butang. Bisan kon kita anaa sa ospital, makasangyaw man kita sa mga doktor, mga nars, ug ubang mga pasyente.
KON UNSAON SA PAGSUGOD
4 Kon sayod kita nga madugaydugay gayod sa paghulat sa maong adlaw, kita makadala man ug kinaulahiang mga magasin ingong pasukaranan sa panaghisgot. O magamit ta ang usa ka ‘tract’ o brosyur sa pagsugod ug panaghisgot. Ang pipila nagahimog matukbilong pulong nga binase sa kinabag-ohang hitabo ug dayon mangutana sa reaksiyon sa maong tawo. Nakaplagan sa uban nga ang pagpangutana sa nagapalihok-hunahuna nga pangutana sa kinabag-ohang hitabo motultol ngadto sa maayong pagpamatuod. Sa tanang hitabo, ang paninguha gikinahanglan aron pahinaboon ang mga butang.
PAGPAMATUOD SA TRABAHOANAN
5 Kadtong adunay sekular nga mga trabaho makapahimulos sa mga kahigayonan sa pagpamatuod ngadto sa mga kaubanan sa trabaho. Duha ka sister sa Georgia naghimog listahan sa mga kaubanan sa trabaho nga gihunahuna nilang interesado. Sa pagpakigsulti kanila, sila nakaarang sa pagpahimutag kapin sa 65 ka librong Revelation ug nakaugmad sa dakong interes.
6 Ang laing igsoong lalaki mitino nga siya mosangyaw sa unang tawo nga molingkod sa duol niya sulod sa iyang 15-minuto nga pahulay sa trabaho. Ang tawo nga iyang gisultihan miingon nga siya nahibalo sa kamatuoran pero wala makagusto nga ipadayon kana. Bisan pa niana, ang igsoong lalaki mibilin sa literatura sa dapit nga daling mapudyot sa maong tawo. Sulod sa unom ka bulan ang maong tawo ug ang iyang pamilya pulos bawtismado na.
7 Kon kita alisto ug mahinangop sa pagpaambit sa atong paglaom, kita, sama kang Jesus, dili mopakyas sa mga kahigayonan sa pagpamatuod ingong ‘mga magdadan-ag diha sa kalibotan.’—Juan 8:12; Filip. 2:15, 16.