Pangutana

◼ Unsang sukdanan sa panapot ug pamostura ang angay natong sundon sa dihang mobisita sa mga puy-anang Bethel ug mga pasilidad sa sanga?

Sa dihang mobisita kita sa Bethel aron mag-tour sa pasilidad o mobisita sa mga membro sa pamilyang Bethel, “ang atong senina, pamostura ug pamatasan kinahanglang susama nianang gidahom kanato sa dihang motambong kitag mga tigom alang sa pagsimba didto sa Kingdom Hall.” (om 131) Apan, namatikdan nga sa dihang mobisita sa mga sangang buhatan, ang ubang mga igsoong lalaki ug babaye mahilig nga hilabihan ka kaswal sa ilang panapot. Dili kana angay sa dihang mobisita niining mga pasilidara. Ang atong panagway kinahanglang sulondan, hapsay, ug kasarangan, nga nagbanaag sa kaligdong ug dignidad nga angay sa mga alagad ni Jehova nga Diyos.​—1 Tim. 2:​9, 10.

Kini ilabinang hinungdanon sa dihang mobisita sa mga puy-anang Bethel ug mga pasilidad sa sanga tungod kay makadani kini sa pagtagad sa daghang di-Saksi nga mga maniniid. Ang maong mga maniniid mahimong makamugnag mga opinyon bahin sa katawhan sa Diyos ug sa iyang organisasyon pinasukad sa ilang naobserbahan. Maoy tukma kon sultihan ang mga estudyante sa Bibliya ug ang uban nga mahimong mobisita sa pagpahinumdom kanila bahin sa kahinungdanon sa paghatag ug pagtagad sa tukmang panapot ug pamostura. Ang pamilyang Bethel mapasalamaton sa imong pagbuhat niini.

Ingong Kristohanong mga ministro, kita kinahanglang mag-amping nga ang atong panagway dili maghatag ug bisan unsang hinungdan sa pagkapandol. (2 Cor. 6:​3, 4) Hinunoa, pinaagi sa atong hustong pamatasan, hinaot kita kanunayng “makadayandayan sa pagtulon-an sa atong Manluluwas, ang Diyos, sa tanang butang.”​—Tito 2:10.