Mahimong Panig-ingnan sa Maayong mga Buhat
1. Nganong kita ilabinang kinahanglang magmahunahunaon sa atong panggawi didto sa distritong kombensiyon?
1 Kon daghan kita nga magkatigom didto sa distritong mga kombensiyon, ang atong linihokan ug kon sa unsang paagi atong gitagad ang uban mahimong ilabinang mamatikdan sa mga maniniid. Busa ang matag usa kanato kinahanglang maghatag ug linaing pagtagad sa tambag sa Bibliya: “Pagbaton ug maayong panghunahuna, nga sa tanang butang magpakita sa imong kaugalingon nga panig-ingnan sa maayong mga buhat.” (Tito 2:6, 7) Mahimong gikinahanglan ang dugang paningkamot sa ‘pagtan-aw, dili lamang sa personal nga interes sa mga butang labot sa atong kaugalingon, kondili sa personal nga interes usab sa uban.’ (Filip. 2:4) Tagdon nato ang pipila ka bahin diin atong mapadapat kini didto sa atong taliabot nga “Himayaa ang Diyos” nga Distritong Kombensiyon.
2. Unsay angay natong hinumdoman mahitungod sa mga kahikayan sa pagkaon?
2 Mga Kahikayan sa Pagkaon: Kita magpakitag maayong mga buhat kon kita magdala ug simpleng paniudto ug dili magdisturbo niadtong duol sa atong mga gilingkoran sa dihang magkaon sa atong paniudto. Kini maoy pagpakitag konsiderasyon kon likayan natong mayabo ang tubig o juice samtang magkaon ug, kon mahitabo man kini nga wala tuyoa, ato dayon kining limpiyohan. Sa dili pa mobiya sa kombensiyonan, angay natong seguroon nga walay basura nga mahibilin diha o duol sa atong mga gilingkoran, sa ingon magbiya sa tigomanan nga hinlo sama sa atong pag-abot sa buntag.
3. Sa unsang paagi kita ‘magabuhat ug maayo ngadto sa tanan’ pinaagi sa pagkooperar sa mga atendant?
3 Parking ug mga Atendant: Kon duna kay sakyanan, pakigkooperar sa bug-os sa mga atendant sa parking, nga mosunod sa ilang mga instruksiyon kon asa moparking, bisan pag kini dili kaayo kombenyente alang kanimo. Sunda ang direksiyon sa mga atendant maylabot sa mga lingkoranan, nga maghinumdom nga ang pipila ka lingkoranan kasagarang gireserba alang sa mga tigulang ug maluyahon. Gawas pa, sa dihang magkuhag bag-ong mga basahon nga luwatan, ayaw pagdalidali bisag wala pa mahuman ang sesyon aron maoy makauna, kondili mapailobong maghulat hangtod matapos ang sesyon ug dayon sunda ang mga instruksiyon sa tsirman sa sesyon ug sa mga atendant. Niining paagiha kita ‘magabuhat ug maayo ngadto sa tanan.’—Gal. 6:10.
4, 5. Sa unsang paagi ang mga bata makahatag ug kadayeganan kang Jehova, ug unsay responsabilidad sa mga ginikanan?
4 Mga Ginikanan ug mga Anak: Diha sa kalibotan diin daghang batan-on ang walay batasan, ang atong mga anak mamatikdan nga lahi, ug kini makahatag ug kadayeganan kang Jehova ug sa iyang organisasyon. Apan, usahay may mga problema nga motungha sa dihang ang mga bata dili maayong pagkadumala. (Prov. 29:15) Dili angayng pasagdan sa mga ginikanan ang ilang mga anak nga walay magbantay panahon sa mga intermisyon.
5 Sa dili pa ang kombensiyon nakaplagan sa pipila ka ginikanan nga mapuslanon ang pagrepaso uban sa mga bata sa matang sa kagawian nga gidahom kanila. (Efe. 6:4) Ilang tabangan ang mga bata sa pagsabot nga ang tinuod nga Kristohanong gugma “dili bastos” o “mangita sa kaugalingong kaayohan niini.” (1 Cor. 13:5) Ang distritong kombensiyon maoy panahon nga gigahin aron matudloan ni Jehova, ug ang mga bata maingon man ang mga hamtong makapakitag pagtahod niining kahikayana pinaagi sa ilang panggawi didto sa dapit sa kombensiyon ug bisan asa.—Isa. 54:13.
6. Unsay mahimong epekto sa atong maayong panggawi ngadto sa uban?
6 Ang atong maayong panggawi dakog mahimo sa pagtul-id sa sayop nga mga hunahuna ug makadani sa mga tawo ngadto sa matuod nga pagsimba. (Mat. 5:16; 1 Ped. 2:12) Hinaot ang tanan nga atong ikahibalag didto sa atong distritong kombensiyon makadawat ug maayong pamatuod pinaagi sa atong linihokan ug kon sa unsang paagi atong gitagad sila. Niining paagiha kita ‘magpakita sa atong kaugalingon nga panig-ingnan sa maayong mga buhat’ ug maghimaya kang Jehova.—Tito 2:7.
[Kahon sa panid 4]
Magmahunahunaon sa Uban
▪ Limpiyohi ang inyong dapit nga gilingkoran sa dili pa mobiya
▪ Magpailob sa dihang mokuhag bag-ong mga basahon nga luwatan
▪ Pakigkooperar sa mga atendant
▪ Dumalaha pag-ayo ang inyong mga anak