Magmabalaan sa Tanan Ninyong Panggawi
1. Nganong hinungdanon nga magmabalaan sa tanan natong panggawi?
1 Ingong mga alagad sa balaan nga Diyos, si Jehova, kita maningkamot nga magmabalaan sa tanan natong panggawi. (1 Ped. 1:15, 16) Nagkahulogan kini nga kita maningkamot sa pagbayaw sa mga sukdanan ni Jehova diha sa tanang bahin sa atong mga kinabuhi. Ang distritong kombensiyon niining tuiga maghatag kanatog linaing kahigayonan sa pagpakita sa atong balaang panggawi.
2. Sa pagpangandam alang sa distritong kombensiyon, nganong angay natong hatagan ug pagtagad ang atong panagway?
2 Maligdong Personal nga Panagway: “Ang mga Saksi ni Jehova mao ang kinamaayohan! Ang inyong mga membro buotan ug hapsay ug mga sinina, ug sila matinahoron kaayo.” Mao kanay giingon sa usa ka hawas sa hotel panahon sa distritong kombensiyon sa miaging tuig. Sa laing kombensiyon, usa ka trabahante sa hotel miingon: “Klaro nga ang inyong mga membro manapot nga makapahimuot sa Diyos.” Oo, ang mga delegado sa kombensiyon namatikdan sa uban. Busa kita angayng magsapot “sa paaging takos sa maayong balita.”—Filip. 1:27.
3. Nganong usa ka hagit ang pagpanapot ug pagpamostura sa kaugalingon sa ligdong nga paagi?
3 Ang pagbanaag ug kaligdong maylabot sa atong panagway mahimong usa ka hagit. Ang imoral nga kalibotan ni Satanas nag-impluwensiya sa mga tawo sa pagsagop ug di-makasaranganon, mahilayon, ug katingad-an nga mga estilo nga dili nahiangay. (1 Juan 2:15-17) Busa, sa atong pagpanapot kinahanglan natong ‘isalikway ang pagkadili-diyosnon ug ang kalibotanong mga tinguha ug magkinabuhi uban ang maayong panghunahuna taliwala niini nga sistema sa mga butang.’ (Tito 2:12) Dili gayod nato hasolon ang uban pinaagi sa atong panagway, ato man silang mga igsoon, kawani sa hotel o restawran, o uban pang mga maniniid.—1 Cor. 10:32, 33.
4. Unsang mga pangutana ang motabang kanato sa pagsusi sa atong personal nga panagway?
4 Kasarangan, Hapsay nga Sinina: Sa dihang mangareglar kita para sa kombensiyon, suknaa ang kaugalingon: ‘Kasarangan ba ang akong sinina, o makapukaw kaha kinig wala-kinahanglanang pagtagad kanako? Nagpakita ba kinig pagtahod sa mga pagbati sa uban? Abli ra ba kaayo ang dapit sa dughan o mubo ra kaayo ang blusa? Ang ako bang mga sinina seksi o hugot kaayo? Ang ako bang mga sinina haom alang sa usa ka delegado nga magsul-ob ug badge card? Maulaw ba akong mosangyaw sa di-pormal nga paagi tungod sa akong gisul-ob nga sinina panahon sa paglulinghayaw?’—Roma 15:2, 3; 1 Tim. 2:9.
5. Sa unsang paagi ang uban makatabang kanato sa pagpakita ug ligdong nga panagway?
5 Kita makabenepisyo gikan sa pag-obserbar sa hamtong nga mga Kristohanon. Ang mga asawa angayng mangutana sa ilang mga bana kon unsa kahay pagtan-aw sa uban bahin sa ilang gisul-ob. Ang diyosnong mga ginikanan makatabang sa ilang tin-edyer nga mga anak niining bahina. Dugang pa, ang diyosnong may-edad nang mga igsoong babaye ‘makapasig-uli sa batan-ong mga babaye sa ilang kaamgohan sa pagbaton ug maayong panghunahuna, putli’ sa ilang panagway “aron ang pulong sa Diyos dili mapasipalahan.” (Tito 2:3-5) Ang atong mga basahon naghatag ug mapuslanong mga ilustrasyon nga nagpakita ug kasarangan, hapsay nga sinina.
6. Naglakip sa unsa ang maayong panggawi didto sa dapit sa kombensiyon?
6 Magmahunahunaon sa Uban: Ang atong maayong panggawi angayng makita ilabina didto sa dapit sa kombensiyon. Palihog pakigkooperar sa direksiyon sa mga atendant, diha sa mga parkinganan ug sa awditoryum. (Heb. 13:17) Ang mga pamilya angayng mag-uban sa paglingkod imbes tugotan ang mga bata, lakip na ang mga tin-edyer, nga manglingkod duyog sa mga grupo sa ubang mga batan-on. Ang bisan unsang mga rekorder dili gayod ikonektar sa sistema sa elektrisidad o sound diha sa pasilidad ug mahimo lamang kining gamiton sa paagi nga dili makadisturbo sa uban. Kon gusto nimong magkuhag mga hulagway, ayaw paggamit ug flash panahon sa mga sesyon. Ang mga pager ug mga cell phone kinahanglang adyason aron dili makadisturbo.
7. Sa unsang paagi ang atong panggawi didto sa mga kombensiyon maghimaya sa Diyos?
7 Ang atong panggawi magpalahi kanato gikan sa uban ug maghimaya sa atong Diyos. (1 Ped. 2:12) Didto sa kombensiyon, ang mga lihok sa mga Saksi ni Jehova makita sa publiko. Busa, magmadeterminado nga magmabalaan sa tanan ninyong panggawi.
[Kahon sa panid 5]
Ipakita ang Balaang Panggawi
◼ Pagsul-ob ug sinina nga nahiangay sa usa ka Saksi
◼ Bantayi pag-ayo ang mga bata
◼ Magmahunahunaon sa uban