Tulo ka Adlaw nga Makapabaskog sa Espirituwal
1. Unsang benepisyo ang atong mabatonan sa distritong kombensiyon niining tuiga?
1 Niining kalibotan ni Satanas nga umaw sa espirituwal, si Jehova padayong nagpabaskog sa iyang mga alagad. (Isa. 58:11) Ang usa sa mga tagana ni Jehova nga makapabaskog kanato mao ang tinuig nga distritong kombensiyon. Samtang nagsingabot ang kombensiyon niining tuiga, sa unsang paagi kita mangandam aron kita mabaskog ug makapabaskog sa uban sa espirituwal nga paagi?—Prov. 21:5.
2. Unsang pagpangandam ang angay nimong himoon?
2 Kon wala pa ka makapangandam, hikaya na karon ang imong eskedyul sa personal ug sa trabaho aron makatambong ka sa tulo ka adlaw nga kombensiyon. Nabanabana mo na ba kon pila ka oras ang biyahe paingon sa asembliyahanan aron makaabot ka ug makakitag lingkoranan una pa magsugod ang programa? Dili gayod nato gustong masayloan ang bisan unsang espirituwal nga pagkaon nga giandam ni Jehova alang kanato! (Isa. 65:13, 14) Nahikay na ba nimo ang imong kasak-an ug kasakyan?
3. Unsang mga sugyot ang makatabang kanato ug sa atong pamilya aron bug-os makapahimulos sa programa?
3 Unsay makatabang aron dili maglatagaw ang imong hunahuna panahon sa sesyon? Kon posible, tulog ug sayo kada gabii panahon sa kombensiyon. Ipokus ang imong mga mata sa mamumulong. Basaha ang matag teksto nga gisitar diha sa imong Bibliya. Pagsulat ug mugbong nota. Maayo nga ang mga pamilya mag-uban sa paglingkod aron ang mga ginikanan makatabang sa ilang anak nga makapamati pag-ayo. (Prov. 29:15) Tingali inyong hisgotan ingong pamilya ang mga punto sa programa kada gabii. Aron padayong mabaskog ang inyong pamilya bisan human sa kombensiyon, kamo makahisgot panahon sa inyong Pamilyahanong Pagsimba ug espesipikong mga punto nga inyong ikapadapat.
4. Sa unsang paagi makatabang ka sa uban aron sila mabaskog sa espirituwal?
4 Tabangi ang Uban nga Mabaskog: Gusto usab nato nga ang uban mabaskog sa espirituwal. Duna bay tigulang nga mga magmamantala o uban pa sa kongregasyon nga nagkinahanglag tabang aron makatambong sa kombensiyon? Makatabang ka ba kanila? (1 Juan 3:17, 18) Angayng tinoon sa mga ansiyano, ilabina sa magtatan-aw sa grupo, nga ang maong mga igsoon matabangan.
5. Sa unsang paagi atong ipanagtag ang mga imbitasyon sa kombensiyon? (Tan-awa ang kahon sa ubos.)
5 Sama sa nangagi, tulo ka semana una pa sa kombensiyon, kita managtag ug mga imbitasyon. Ang mga kongregasyon angay nga magbatog tumong sa pagpanagtag sa ilang mga imbitasyon ug kon posible kobrehan ang tibuok nilang teritoryo. Kon dunay mabiling imbitasyon human sa kampanya, kini angayng dad-on ngadto sa kombensiyon aron inyong magamit sa di-pormal nga pagsangyaw. Adunay dugang impormasyon bahin niini sa programa sa Biyernes. Ang mga imbitasyon, nga sa inyong hunahuna dili na ninyo magamit samtang tua sa dapit sa kombensiyon, angayng ihatag ngadto sa atendant pag-abot ninyo sa asembliyahanan. Palihog pagbilig kopya kay kini magamit sa kataposang pakigpulong sa Dominggo.
6. Sa unsang mga paagi makapakita kitag maayong pamatasan panahon sa kombensiyon?
6 Ang Maayong Pamatasan Makapadasig: Niining panahona karon nga daghan ang ‘mahigugmaon sa ilang kaugalingon’ ug walay pagtagad sa pagbati sa uban, pagkamakapadasig nga makauban ang mga igsoon nga naningkamot sa pagpasundayag ug maayong pamatasan! (2 Tim. 3:2) Kita makapakitag maayong pamatasan pinaagig hilom ug hapsay nga pagsulod sa asembliyahanan kada adlaw ug sa pagreserbag lingkoranan alang lamang sa atong mga kauban sa balay o sakyanan o sa atong ginatun-an sa Bibliya. Atong sundon ang tsirman sa dihang hangyoon niya kita nga molingkod na ug mamati sa pasiunang musika sa pagsugod sa matag sesyon. Pagpakita usab ug maayong pamatasan nga i-silent ang cell phone, ug angay nga kita dili makig-estorya, magtext, magkaon, o maglakawlakaw panahon sa sesyon aron dili madisturbo ang uban.
7. Sa unsang paagi kita mahimong madasig ug makadasig sa uban samtang makig-uban sa mga igsoon?
7 Makapadasig nga Pag-ubanay: Ang mga kombensiyon maghatag kanatog taas nga panahon nga matagamtam ang makapadasig nga Kristohanong panaghiusa ug panag-igsoonay. (Sal. 133:1-3) Nganong dili ka manguna sa ‘pagpasangkad’ ug makig-ilaila sa mga igsoon sa ubang kongregasyon? (2 Cor. 6:13) Himoang tumong nga makig-ilaila, bisan usa lang ka igsoon o pamilya kada adlaw. Ang tingpaniudto maoy maayong higayon sa paghimo niini. Busa pagbalon ug simpleng paniudto ug pahimusli ang pagpakig-uban sa mga igsoon diha mismo sa asembliyahanan inay mogawas aron mopalit ug pagkaon o kaha mokaon sa duol nga restawran. Pinaagi niini, lagmit makakaplag kag bag-o ug malungtarong mga higala.
8. Nganong angay kitang moboluntaryo sa kombensiyon, ug sa unsang paagi mahimo nato kana?
8 Makapalagsik gayod ang pagbuhat kauban sa atong mga igsoon diha sa sagradong pag-alagad! Makaboluntaryo ka ba sa usa ka departamento o makatabang sa inyong kongregasyon sa asaynment sa paghinlo? (Sal. 110:3) Kon wala ka pay asaynment, palihog palandonga ang pagduol sa Volunteer Service Department sa kombensiyon. Kon ang boluntaryo daghan, ang trabaho makapalipay ug gaan.
9. Nganong angay natong tagdon ang atong panggawi ug panagway panahon sa kombensiyon?
9 Ang Atong Panggawi Makapadasig sa mga Maniniid: Kita mga delegado sa kombensiyon sulod sa tulo ka adlaw, dili lang panahon sa sesyon. Ang uban diha sa dapit sa kombensiyon nga naniid kanato makamatikod nga kita lahi sa mga dili-Saksi. (1 Ped. 2:12) Ang atong pamesti ug pamostura samtang anaa sa kombensiyon, sak-anan, ug kan-anan angayng magpasidungog kang Jehova. (1 Tim. 2:9, 10) Kon magtaod tag lapel badge, ang mga tawo makaila nga kita mga Saksi ni Jehova. Pinaagi niini, makahigayon kita sa pagsulti kanila bahin sa atong kombensiyon ug sa pagsangyaw.
10. Unsay atong himoon aron ang mga trabahante sa hotel ug restawran makadayeg sa atong kombensiyon?
10 Ang pipila kanato tingali moestar sa hotel panahon sa kombensiyon. Sa unsang paagi makakooperar kita sa mga trabahante sa hotel ug restawran? Angayng mosunod kita sa mga lagda sa hotel kon pila lang ka tawo ang makaestar sa matag kuwarto. Angay usab nga dili kita magbanha aron dili madisturbo ang uban. Kon ang hotel puliki panahon sa atong pag-check in o pag-check out, angay natong ipakita ang pailob ug maayong pamatasan. (Col. 4:6) Angay tang mohatag ug tip sa mga tigsilbi sa restawran ug mga trabahante sa hotel nga moalsa sa atong mga bag, molimpiyo sa atong kuwarto, o mohimog uban pang serbisyo.
11. Unsang mga kasinatian ang nagpakita nga ang atong Kristohanong panggawi makahatag ug maayong pamatuod?
11 Unsay komento sa uban bahin sa atong maayong panggawi panahon sa kombensiyon? Sumala sa usa ka mantalaan, ang manedyer sa usa ka pasilidad nga gigamit sa kombensiyon miingon: “Maayo silag pamatasan. Malipay mi nga dinhi sila magkombensiyon kada tuig.” Sa miaging tuig, may dili-Saksi nga nawad-ag pitaka diha sa hotel diin miestar usab ang mga delegado. Sa dihang ang pitaka ug ang tanang sulod niini giuli ngadto sa manedyer sa hotel, ang manedyer miingon sa tag-iya: “Maayo kay may kombensiyon ang mga Saksi ni Jehova sa duol, ug giokupar nila ang hotel. Kon wala pa, lagmit dili na mabalik nimo ang imong pitaka.”
12. Samtang nagkaduol ang kombensiyon, unsay atong tumong, ug ngano?
12 Ang kombensiyon niining tuiga nagkaduol na. Dakong panahon ug paningkamot ang gigugol aron ang programa ug ang katibuk-ang kombensiyon makapabaskog. Himoang tumong nga makatambong sa tulo ka adlaw, ug mahimong andam alang sa tagana ni Jehova ug sa iyang organisasyon. Tinguhaa gayod nga pabaskogon ang uban pinaagi sa imong maayong pamatasan, malipayong pagpakig-uban, ug maayong panggawi. Nan, ikaw ug ang uban lagmit mobati sama sa gibati sa usa sa mga delegado sa miaging tuig kinsa misulat, “Kini ang labing makapatagbaw nga kasinatian!”
[Blurb sa panid 3]
Sama sa nangagi, tulo ka semana una pa sa kombensiyon, kita managtag ug mga imbitasyon
[Blurb sa panid 4]
Ang atong pamesti ug pamostura samtang anaa sa kombensiyon, sak-anan, ug kan-anan angayng magpasidungog kang Jehova
[Blurb sa panid 4]
Tinguhaa gayod nga pabaskogon ang uban pinaagi sa imong maayong pamatasan, malipayong pagpakig-uban, ug maayong panggawi
[Kahon sa panid 3]
Unsaon Nato Pagtanyag ang Imbitasyon?
Aron makobrehan ang atong teritoryo, angayng mubo lang ang presentasyon. Mahimong moingon kita: “Maayong adlaw. Nakigbahin mi sa tibuok-kalibotang pagpanagtag niini nga imbitasyon. Kini ang imong kopya. Mabasa nimo ang dugang detalye diha sa imbitasyon.” Ang atubangan nga bahin sa imbitasyon makapainteres, busa itunol kini sa tagbalay sa paagi nga makita niya kana. Magmadasigon sa pagtanyag. Sa dihang magtanyag ug imbitasyon sa Sabado ug Dominggo, itanyag usab ang mga magasin kon itugot sa kahimtang.
[Kahon sa panid 5]
Mga Pahinumdom sa 2011 Distritong Kombensiyon
◼ Oras sa Programa: Ang programa magsugod sa 8:20 s.b. sa Biyernes ug Sabado, ug 8:50 s.b. sa Dominggo. Sa pagpahibalo sa pasiunang musika, ang tanan kinahanglang manglingkod na aron ang programa makasugod nga hapsay. Ang programa matapos sa 4:00 s.h. sa Biyernes ug Sabado ug sa 3:15 s.h. sa Dominggo.
◼ Parkinganan: Sa parkinganan sa asembliyahanan, ang unang makaabot maoy unang makaparking. Kay limitado man ang parkinganan, labing maayo nga mag-uban sa sakyanan ang mga igsoon imbes magdalag iyaiyang sakyanan.
◼ Pagreserbag Lingkoranan: Ang mga lingkoranan ireserba lang para sa mga kauban sa balay, sa sakyanan o, sa imong mga gitun-an sa Bibliya.—1 Cor. 13:5.
◼ Paniudto: Palihog pagbalon ug paniudto imbes mobiya aron mopalit ug pagkaon. Mahimong magdalag gamayng sudlanan sa pagkaon nga ikabutang sa ilalom sa lingkoranan. Ayaw pagdalag dagkong cooler ug bildong mga sudlanan diha sa asembliyahanan.
◼ Donasyon: Atong ikapakita ang atong pagpabili sa mga kahikayan sa kombensiyon pinaagi sa pag-amot para sa tibuok-kalibotang buluhaton diha sa atong Kingdom Hall o sa asembliyahanan. Ang mga tseke nga idonar diha sa kombensiyon kinahanglang payable to “Watch Tower.”
◼ Aksidente ug Emerhensiya: Kon may emerhensiya diha sa asembliyahanan, palihog duola ang usa ka atendant, kinsa magpahibalo dayon niini sa First Aid aron ilang masusi ang kahimtang sa igsoon ug matabangan siya. Kon gikinahanglan, ilang ihatod siya sa duol nga ospital.
◼ Tambal: Kon nagtomar kag gireseta nga tambal, palihog tinoa gayod nga magdala kag igong suplay kay walay mabatonan diha sa kombensiyon.
◼ Sapatos: Kada tuig daghan ang madisgrasya tungod sa sapatos. Maayo nga magsul-ob ug kasarangan, sigo sa tiil nga sapatos aron luwas kang makalakaw sa rampa, agianang puthaw nga may lungag-lungag, hagdanan, ug uban pa.
◼ Pagrekord: Ang mga rekorder dili angayng ikonektar diha sa sound system o sa linya sa koryente sa asembliyahanan ug kini mahimo lamang gamiton sa paagi nga dili makabalda sa uban.
◼ Pagletrato: Kon mokuha kag letrato panahon sa sesyon, palihog ayaw paggamit ug flash o ayawg salipdi ang uban nga naminaw sa programa.
◼ Please Follow Up (S-43) nga Porma: Palihog isulat diha sa Please Follow Up nga porma ang impormasyon bahin sa mga tawong nagpakitag interes nga imong nasangyawan sa di-pormal nga paagi panahon sa kombensiyon. Ang mga magmamantala angayng magdalag usa o duha ka porma. Ang napil-apan nga mga porma mahimong ihatag sa Book Room o sa sekretaryo sa inyong kongregasyon inig-uli ninyo.—Tan-awa ang Nobyembre 2009 nga Atong Ministeryo sa Gingharian, p. 4.
◼ Restawran: Pasidunggi ang ngalan ni Jehova pinaagi sa imong maayong panggawi diha sa mga restawran. Paghatag ug tip kon mao kini ang naandan.
◼ Badge Card: Palihog itaod ang imong badge card panahon sa kombensiyon ug sa pagngadto-nganhi sa dapit sa kombensiyon. Ang mga badge card mabatonan lang diha sa inyong kongregasyon. Pagkuha dayon niini alang kanimo ug sa imong pamilya.
◼ Bawtismo: Ang mga kandidato sa bawtismo kinahanglang magpahiluna na sa dapit nga gireserba kanila sa dili pa magsugod ang programa sa Sabado sa buntag. Ang matag kandidato kinahanglang magdalag kasarangang humdonon ug tualya. Aron maseguro nga haom ang isul-ob sa mga kandidato, kinahanglang hisgotan kini uban kanila sa mga ansiyano nga maasayn sa pagrepaso sa mga pangutana sa librong Organisado.
◼ Pagboluntaryo: Mas magmalipayon pa kita kon kita moboluntaryo panahon sa kombensiyon. (Buh. 20:35) Ang tanang gustong moboluntaryo angayng moadto sa Volunteer Service Department sa kombensiyon. Ang mga bata nga wala pay 16 anyos makaboluntaryo usab kon ubanan sa ginikanan o sa laing hamtong ubos sa pagtugot sa ginikanan.