Distritong mga Kombensiyon—Panahon sa Malipayong Pagsimba
1. Sa unsang paagi ang mga pista sa Israel susama sa atong mga kombensiyon?
1 Si Jose, Maria, ilang mga anak, ug ang uban pa regular nga moadto sa Jerusalem sa pagtambong sa tinuig nga mga pista. Niining mga okasyona, kalimtan una nila ang ilang adlaw-adlaw nga mga problema ug magsentro sa ilang hunahuna sa mas hinungdanong espirituwal nga mga butang. Panahon sa mga pista sila makapamalandong ug makapakig-estorya sa uban bahin sa pagkamaayo ni Jehova ug sa pagtuon sa iyang Balaod. Ang atong umaabot nga mga kombensiyon maghatag usab kanato ug susamang mga kahigayonan sa pagsimba kang Jehova nga malipayon.
2. Unsay angay natong himoon agig pagpangandam sa umaabot nga kombensiyon?
2 Gikinahanglan ang Pagpangandam: Ang pamilya ni Jesus kinahanglang magbaktas ug mga 200 kilometros idabuwelta gikan sa Nasaret. Bisag wala kita masayod kon pila ang mga manghod ni Jesus, atong mahanduraw nga nangandam gayod pag-ayo si Jose ug Maria. Nakapangandam ka na ba sa pagtambong sa tanang tulo ka adlaw nga kombensiyon? Tingali kinahanglan kang mobakasyon sa trabaho o makigsulti sa imong amo o sa maestra sa imong anak bahin niini. Imo bang matabangan ang imong kakongregasyon nga may linaing panginahanglan aron makatambong?—1 Juan 3:17, 18.
3. Sa unsang paagi ang Hudiyohanong mga pista maoy dakong kahigayonan sa pagdinasigay?
3 Makapadasig nga Panag-ubanay: Ang Hudiyohanong mga pista maoy dakong kahigayonan sa pagdinasigay sa mga isigkamagsisimba! Ang pamilya ni Jesus naghinamhinam gayod nga makita pag-usab ang ilang mga higala. Gipahimuslan usab nila ang kahigayonan nga makahimamat ug bag-ong mga higala taliwala sa mga Hudiyo ug mga kinabig nga moadto usab sa Jerusalem.
4. Sa unsang paagi atong mapabilhan ang atong panag-igsoonay?
4 Ang usa ka rason kon nganong gihikay sa matinumanon ug maalamong ulipon nga motambong kitag kombensiyon imbes patikon na lang ang samang mga impormasyon maoy aron magdinasigay kita sa usag usa. (Heb. 10:24, 25) Busa planoha nga moabot ug sayo sa kombensiyon matag adlaw aron mahimamat ang mga igsoon sa dili pa magsugod ang musika, nga magpaila nga panahon nang molingkod. Imbes mobiya sa giasembliyahan aron mopalit ug pagkaon, kita gidasig sa pagbalon ug simpleng paniudto ug anha mokaon sa awditoryum aron makaila ug maestorya ang mga igsoon. Ang atong panag-igsoonay maoy gasa ni Jehova nga angay natong pabilhan.—Miq. 2:12.
5. Unsay makatabang kanato sa pagpahimulos gayod sa programa?
5 Panahon sa Pagkakat-on: Sukad sa pagkabata, gipahimuslan gayod ni Jesus ang mga pista aron makakat-on siya bahin sa iyang langitnong Amahan. (Luc. 2:41-49) Unsay makatabang nato ug sa atong pamilya sa pagpahimulos gayod sa mga bahin nga ipresentar? Panahon sa sesyon, pabiling naglingkod ug ayaw pagpakig-estorya sa katapad nga wala kinahanglana. Hiposa una ang imong cellphone o ubang elektronikong gamit aron dili kini makabalda nimo ug sa uban. Tan-aw sa mamumulong ug pagnota. Lingkod uban sa imong pamilya aron imong maseguro nga naminaw usab ang imong mga anak. Pagkagabii, paggahin ug panahon nga inyong maestoryahan ang mga punto nga inyong nagustohan.
6. Unsay angay natong hinumdoman bahin sa atong sinina ug pamostura?
6 Sinina ug Pamostura: Ang langyawng mga negosyante dali rang makaila sa pamilya ni Jesus ug sa ubang mga Hudiyo nga nangadto sa Jerusalem alang sa mga pista tungod sa binorlasang mga sidsid nga may asul nga hilo diha sa ilang mga sinina. (Num. 15:37-41) Bisan tuod dili mag-uniporme ang mga Kristohanon, kita mailhan tungod sa atong kasarangan, hinlo, ug hapsay nga mga sinina. Angay natong tagdon ang atong mga hitsura samtang atua sa kombensiyon o magbiyahe paingon ug pabalik didto. Bisan kon mag-ilis kita human sa programa, ang atong mga sinina kinahanglang makahatag gihapon ug kadayeganan kang Jehova ug magtaod gihapon kitag badge card. Pinaagi niini kita makita nga lahi gikan sa mga dili-Saksi ug mahimong makadayeg nato ang uban.
7. Nganong maayo nga kita moboluntaryo panahon sa kombensiyon?
7 Gikinahanglan ang mga Boluntaryo: Gikinahanglan ang daghang boluntaryo alang sa kalamposan sa kombensiyon. Makaboluntaryo ka ba? (Sal. 110:3) Ang mga buluhaton diha sa kombensiyon maoy bahin sa atong pag-alagad kang Jehova ug kini makahatag ug maayong pamatuod. Nakadayeg kaayo ang tagdumala sa usa ka pasilidad nga giasembliyahan tungod sa mga boluntaryo nga nanghinlo, busa siya misulat: “Karon pa lang ko makaeksperyensiya sukad ug okasyon nga sama niini, busa gusto ko kamong pasalamatan. Kanunay kong makadungog nga ang mga Saksi ni Jehova maoy talagsaong mga tawo kinsa ilado sa paghinlo pag-ayo sa pasilidad sa dili pa sila mobiya. Kamo ug ang inyong organisasyon naghimo niini nga pasilidad nga mas maayong dapit alang sa komunidad ug kamo ang labing buotang mga tawo nga among nakaila sukad.”
8. Sa unsang mga paagi kita makasangyaw samtang anaa sa dapit nga giasembliyahan?
8 Kahigayonan nga Makasangyaw: Daghang tawo diha sa giasembliyahan ang makamatikod sa atong desenteng pamostura nga nagsul-ob ug mga badge card, ug mahimong magpakisayod sila bahin niini nga maghatag kanato ug kahigayonan sa pagpakigsulti kanila bahin sa kombensiyon. Ang usa ka kuwatro anyos nga batang lalaki nagdala sa iyang kopya sa bag-ong giluwatan nga basahon ngadto sa restawran human sa programa ug gipakita kini sa silbidora. Kini nakahatag ug kahigayonan sa mga ginikanan sa bata sa pagdapit sa silbidora sa pagtambong sa kombensiyon.
9. Sa unsang paagi atong masundog ang pamilya ni Jesus sa pagpabili sa espirituwal nga mga tagana ni Jehova?
9 Ang mga pista kaniadto maoy malipayong mga okasyon nga gikahinaman sa diyosnong mga Hudiyo. (Deut. 16:15) Ang pamilya ni Jesus andam mosakripisyo aron makatambong ug makapahimulos gayod. Atong gipabilhan usab ang atong mga kombensiyon, nga nag-isip niining gasa gikan sa atong mahigugmaong langitnong Amahan. (Sant. 1:17) Karon na ang panahon sa pagpangandam alang niining tinuig nga kahigayonan sa malipayong pagsimba kang Jehova!
[Kahon sa panid 5]
Mga Pahinumdom sa Distritong Kombensiyon
◼ Oras sa Programa: Ang programa sa Biyernes ug Sabado magsugod sa 8:20 s.b. ug sa Dominggo sa 8:50 s.b. Sa dihang ipahibalo na ang pasiunang musika, kinahanglang manglingkod na kita aron ang programa makasugod nga hapsay. Ang programa sa Biyernes ug Sabado matapos sa 3:55 s.h. ug sa Dominggo sa 3:15 s.h.
◼ Parkinganan: Adunay parkinganan diha sa tanang asembliyahanan, ug ang unang moabot maoy unang makaparking. Kay limitado man ang parkinganan, labing maayong mag-usa na lag sakyanan kon mahimo.
◼ Pagreserbag Lingkoranan: Ang mga lingkoranan ireserba lang para sa mga kauban nimo sa sakyanan o sa balay, ug sa imong mga gitun-an sa Bibliya.
◼ Paniudto: Palihog pagbalon ug paniudto imbes mobiya sa asembliyahanan aron mopalit ug pagkaon. Mahimong gamiton ang gamayng cooler nga ikabutang sa ilalom sa lingkoranan. Ayaw pagdalag dagkong picnic cooler ug mabuak nga mga sudlanan diha sa asembliyahanan.
◼ Donasyon: Atong ikapakita ang atong pagpabili sa mga kahikayan sa kombensiyon pinaagi sa pag-amot para sa tibuok-kalibotang buluhaton diha sa atong mga Kingdom Hall o sa asembliyahanan. Ang mga tseke nga idonar diha sa kombensiyon kinahanglang payable to “Watch Tower.”
◼ Aksidente ug Emerhensiya: Kon may emerhensiya diha sa giasembliyahan, palihog hangyoa ang atendant sa duol nimo sa pagpahibalo niini sa First Aid aron ilang masusi ang kahimtang sa igsoon ug matabangan siya. Kon gikinahanglan, ilang ihatod siya sa duol nga ospital.
◼ Bungol: Sa ubang mga kombensiyon, ang programa madunggan pinaagig FM radio frequency. Aron mapahimuslan kini, kinahanglang duna kay gamayng debaterya nga FM receiver ug earphone.
◼ Pagrekord: Ayaw ikonektar ang bisan unsang mga rekorder diha sa sound system o sa linya sa koryente sa asembliyahanan. Puwede kang magrekord nga dili makabalda sa uban.
◼ Pagkuhag Hulagway: Kon mokuha kag hulagway panahon sa sesyon, palihog ayaw paggamit ug flash ug ayaw salipdi ang uban nga naminaw sa programa.
◼ Follow-Up nga Porma: Palihog isulat diha sa Please Follow Up (S-43) ang mga impormasyon bahin sa mga tawong nasangyawan panahon sa kombensiyon ug nagpakitag interes. Ang mga magmamantala angayng magdalag usa o duha ka porma ngadto sa kombensiyon. Ang napil-apan nga mga porma mahimong ihatag sa Book Room o sa sekretaryo sa inyong kongregasyon kon makauli na kamo.—Tan-awa ang Nobyembre 2009 nga Atong Ministeryo sa Gingharian, p. 4.
◼ Restawran: Pasidunggi ang ngalan ni Jehova pinaagi sa imong maayong panggawi diha sa mga restawran. Sa ubang lugar, ang mga tawo naanad sa paghatag ug 10 porsiyentong tip, depende sa serbisyo.
◼ Badge Card: Palihog itaod ang imong badge kard samtang anaa ka sa asembliyahanan ug samtang magbiyahe paingon ug pauli. Mabatonan lang ang mga badge kard diha sa inyong kongregasyon. Pagkuha dayon niini alang kanimo ug sa imong pamilya.
◼ Bawtismo: Ang mga kandidato sa bawtismo kinahanglang magpahiluna na sa dapit nga gireserba kanila sa dili pa magsugod ang programa sa Sabado sa buntag. Ang matag kandidato kinahanglang magdalag kasarangang humdonon ug tualya. Aron maseguro nga haom ang isul-ob sa mga kandidato, kinahanglang hisgotan kini uban kanila sa mga ansiyano nga maasayn sa pagrepaso sa mga pangutana diha sa librong Organisado.
◼ Pagboluntaryo: Magmalipayon pa gayod kita kon moboluntaryo kita panahon sa kombensiyon. (Buh. 20:35) Ang tanang gustong moboluntaryo angayng moadto sa Volunteer Service Department sa kombensiyon. Ang mga bata nga wala pay 16 anyos makaboluntaryo usab apan kinahanglan silang ubanan sa ilang ginikanan o hamtong nga kaila ubos sa pagtugot sa mga ginikanan.