Andam Ka na ba Alang sa Espirituwal nga Bangkete?
1. Unsa nga pagpangandam ang nalangkit sa usa ka bangkete?
1 Ang usa ka bangkete nagkinahanglag dakong pagpangandam. Ang mga pagkaon kinahanglang andamon, hikayon pag-ayo, ug dayon idalit ngadto sa mga dinapit. Kinahanglang organisado ang pagdalit sa mga pagkaon. Dugang pa, ang dapit nga pagakan-an kinahanglang andamon gayod. Ang mga dinapit angayng mangandam usab, ilabina kon sila maggikan pa sa layo. Bisan pag hago ang pagpangandam, makapalipay ang pagtagamtam sa lamian, makapahimsog nga pagkaon uban sa mga higala ug pamilya. Sa dili madugay, ang mga Saksi ni Jehova sa Pilipinas magkatigom ingong mga grupo aron sa pagpahimulos sa gikahinamang espirituwal nga bangkete—ang “Padayon sa Pagbantay!” nga Distritong Kombensiyon. Dako na ang nahimo sa pag-andam sa programa ug hapit na kining matapos. Kitang tanan gidapit sa pagtambong. Aron makatambong ug makabenepisyo pag-ayo niini, kita usab kinahanglang personal nga mangandam.—Prov. 21:5.
2. Unsa ang kinahanglang buhaton aron matambongan ang enterong kombensiyon?
2 Pahimusli Pag-ayo: Nakapangandam ka na ba aron imong matambongan ang enterong kombensiyon? Kon gikinahanglan, pananghid sa imong amo nga motambong ka sa tanang sesyon sa kombensiyon. Duna ka na bay kasakyan ug kasak-an? Angayng segurohon sa mga ansiyano nga matabangan ang mga tigulang ug ang mga igsoon nga malisdan sa pagtambong tungod sa panglawas ug ang uban pa nga lagmit nanginahanglag tabang.—Jer. 23:4; Gal. 6:10.
3. Nganong kita gidasig sa pagtambong sa atong kaugalingong distritong kombensiyon?
3 Hinumdomi nga ang mga kongregasyon giasayn ngadto sa matag distritong kombensiyon. Sa paghimo niini nga mga kahikayan, gitun-an pag-ayo sa sangang buhatan kon pila ang dapiton, nga nagtagad sa gidaghanon sa mga lingkoranan nga magamit diha sa mga asembliyahanan. Basin maghuot sa asembliyahanan kon ang mga magmamantala motambong sa dili nila kombensiyon.
4. Unsa nga mga pahinumdom ang motabang kanato nga mahimong andam alang sa pagsugod sa programa kada adlaw?
4 Pangandam nga makaabot kag sayo sa kombensiyon kada adlaw aron makakita kag lingkoranan sa dili pa magsugod ang programa. Paggahin ug pipila ka minuto sa dili pa magsugod ang sesyon aron basahon ang gipatik nga programa. Kini makatabang aron maandam ang imong kasingkasing sa mga impormasyon nga ipresentar. (Esd. 7:10) Sa dihang moingon ang tsirman sa sesyon nga magsugod na ang pasiunang musika, paminawa kini pag-ayo ug andama ang imong kaugalingon alang sa pangbukas nga awit ug pag-ampo.
5. Sa unsang paagi makabenepisyo pag-ayo ang atong pamilya sa programa?
5 Kon ang mga membro sa pamilya magtupad sa paglingkod panahon sa kombensiyon, maseguro sa mga ginikanan nga maminaw pag-ayo ang ilang mga anak sa programa. (Deut. 31:12) Ang tanan gidasig nga sundan diha sa ilang kaugalingong Bibliya ang mga tekstong basahon. Ang paghimog mugbong nota makatabang kanimo nga magpatalinghog pag-ayo. Sa ulahi, ang imong mga nota motabang kanimo sa paghinumdom sa pangunang mga punto sa mga pakigpulong. Likayi ang wala kinahanglanang pagpakigsulti panahon sa sesyon o ang pagbiya sa imong lingkoranan. Kon aduna kay cell phone, seguroha nga dili kini makabalda kanimo ug sa uban panahon sa programa. Human sa matag sesyon, nganong dili makigsulti sa uban bahin sa imong gipabilhan sa programa?
6. Unsa ang usa ka talagsaong kahigayonan nga atong matagamtam diha sa mga kombensiyon, ug sa unsang paagi kita makapahimulos pag-ayo niini?
6 Panahon sa distritong kombensiyon, kita adunay kahigayonan nga matagamtam ang usa ka talagsaong panag-ubanay uban sa atong mga igsoon. Wala gayod kini masinatii sa kalibotan. (Sal. 133:1-3; Mar. 10:29, 30) Nganong dili makig-ilaila sa imong mga katapad ug makigsulti kanila sa tingpaniudto? Usa kini sa mga kaayohan kon kita magdalag diyutayng pagkaon ug magpabilin sa asembliyahanan imbes mokaon sa kan-anan sa gawas. Seguroha nga dili nimo masayloan kining maong kahigayonan sa pagdinasigay sa usag usa.—Roma 1:11, 12.
7. Unsa nga mga pagpangandam ang angay natong himoon maylabot sa atong sul-obon sa kombensiyon?
7 Pamesti: Si Jehova nagsugo sa mga Israelinhon nga himoag borlas ang sidsid sa ilang mga besti, nga may asul nga kordon sa ibabaw sa borlas. (Num. 15:37-41) Kini magpahinumdom nga sila lahi sa uban isip mga magsisimba ni Jehova. Karon, ang atong maligdong, makasaranganong pamesti panahon sa kombensiyon magpalahi kanato gikan sa kalibotan. Kini maghatag ug dakong pamatuod ngadto sa uban bisan kon kita mogawas aron mokaon human sa programa. Busa, hunahunaa pag-ayo nga abante kon unsay imong sul-obon sa kombensiyon.
8. Sa unsang paagi kita makahatag ug pamatuod diha sa palibot sa asembliyahanan?
8 Paghatag ug Pamatuod: Kon mangandam daan, kita makahimo sa pagpamatuod sa mga tawo sa palibot sa asembliyahanan. Ang usa ka brader misulod uban sa iyang asawa sa usa ka kan-anan human sa programa. Iyang gipakita sa waiter ang iyang badge sa kombensiyon ug iya kining gipangutana: “Nakakita ka bag daghang tawo nga nagsul-ob ug mga badge sama niini?” Ang waiter miingon nga oo ug natingala siya kon nganong nagsul-ob sila niana. Kini mitultol sa panaghisgot, ug gidapit sa brader ang maong waiter sa kombensiyon.
9. Sa unsang paagi atong mapasundayag nga atong gipabilhan ang Usa nga nagdapit kanato, si Jehova?
9 Bisan tuod ang atong mga igsoon ang mohatag sa mga pakigpulong, interbiyo, ug mga pasundayag, ang atong langitnong Amahan, si Jehova, mao ang mahigugmaong Magtatagana niining maong tinuig nga espirituwal nga bangkete. (Isa. 65:13, 14) Atong mapasundayag ang pagpabili sa Usa nga nagdapit kanato kon kita motambong kada adlaw ug motilaw sa tanang potahe sa espirituwal nga pagkaon nga idalit kanato. Andam ka na ba alang niini?
[Kahon sa panid 5]
Mga Pahinumdom sa Distritong Kombensiyon
◼ Oras sa Programa: Ang programa sa Biyernes ug Sabado magsugod sa alas 8:20 s.b. ug sa Dominggo sa alas 8:50 s.b. Sa dihang patokaron na ang pasiunang musika, kinahanglang manglingkod na kita aron ang programa makasugod sa hapsay nga paagi. Ang programa sa Biyernes ug Sabado matapos sa alas 3:55 s.h. ug sa Dominggo sa alas 4:00 s.h.
◼ Parkinganan: Adunay parkinganan nga gitagana sa tanang asembliyahanan, ug ang unang moabot maoy makauna sa pagparking. Sanglit kasagarang limitado ang parkinganan, dili kinahanglang dad-on ang tanang sakyanan aron dili maghuot sa parkinganan.
◼ Pagreserbag mga Lingkoranan: Ang mga lingkoranan mahimong ireserba lamang para sa mga kauban ninyo sa sakyanan o sa balay.
◼ Paniudto: Palihog pagbalon ug paniudto imbes mobiya sa asembliyahanan aron mopalit ug pagkaon. Mahimong gamiton ang gamayng cooler nga ikabutang ra sa ilalom sa lingkoranan. Ayaw pagdala ug dagkong picnic cooler ug mabuak nga mga sudlanan diha sa asembliyahanan.
◼ Donasyon: Atong ikapakita ang atong pagpabili sa mga kahikayan sa kombensiyon pinaagi sa paghatag ug donasyon diha sa atong Kingdom Hall o sa asembliyahanan alang sa tibuok-kalibotang buluhaton. Ang bisan unsang tseke nga idonar alang sa kombensiyon kinahanglang himoon nga payable to “Watch Tower.”
◼ Aksidente ug mga Emerhensiya: Kon adunay mga emerhensiya diha sa asembliyahanan, palihog hangyoa ang atendant nga anaa sa duol sa pagpahibalo niini ngadto sa First Aid aron ilang makita ang kahimtang sa igsoon ug matabangan siya. Kon gikinahanglan, ila siyang ihatod sa duol nga ospital.
◼ Bungol: Sa pipila ka kombensiyon, ang programa madunggan diha sa asembliyahanan pinaagi sa usa ka FM frequency sa radyo. Aron mapahimuslan kini nga tagana, kinahanglan kang magdala ug gamay nga debaterya nga FM receiver ug earphone.
◼ Pagrekord: Ayaw ikonektar ang bisan unsang mga rekorder nganha sa sound system o sa linya sa koryente sa asembliyahanan. Puwede kang magrekord kon kini dili makabalda sa uban.
◼ Pagkuhag Hulagway: Kon mokuha kag hulagway panahon sa mga sesyon, palihog ayaw paggamit ug flash ug ayawg salipdi ang uban nga naminaw sa programa.
◼ Cell Phone: Angay kining i-adjust sa setting nga dili makabalda sa mga igsoon panahon sa mga sesyon.
◼ Follow-Up nga mga Porma: Ang Please Follow Up (S-43) nga porma kinahanglang gamiton aron sa paghatag ug impormasyon bahin kang bisan kinsa nga magpakita ug interes tungod sa di-pormal nga pagsangyaw panahon sa kombensiyon. Ang mga magmamantala angayng magdalag usa o duha ka porma ngadto sa kombensiyon. Ang napil-apan nga mga porma mahimong ihatag ngadto sa Book Room o sa sekretaryo sa inyong kongregasyon sa dihang mamauli na kamo.—Tan-awa ang Pebrero 2005 nga Atong Ministeryo sa Gingharian, p. 6.
◼ Kan-anan: Pasidunggi ang ngalan ni Jehova pinaagi sa inyong maayong panggawi diha sa mga kan-anan. Sa ubang mga lugar, ang mga tawo naanad na nga mohatag ug 10 porsiyento nga tip, depende sa serbisyo.
◼ Badge Card: Palihog isul-ob ang inyong badge card samtang anaa kamo sa asembliyahanan ug samtang kamo mobiyahe paingon ug pauli. Mabatonan lamang ang mga badge card diha sa inyong kongregasyon. Ayaw paglanganlangan sa pagkuha niini alang kaninyo ug sa mga membro sa inyong pamilya.
◼ Bawtismo: Ang mga kandidato sa bawtismo kinahanglang magpahiluna na sa dapit nga gireserba alang kanila sa dili pa magsugod ang programa sa Sabado sa buntag. Ang matag usa kanila kinahanglang magdalag kasarangang humdonon ug tualya. Aron maseguro nga haom alang sa okasyon ang isul-ob sa mga kandidato, kinahanglang hisgotan kini uban kanila sa mga ansiyano nga maasayn sa pagrepaso sa mga pangutana diha sa librong Organisado.
◼ Panggawi nga Makapasidungog sa Diyos: Kon atong ipasundayag ang bunga sa espiritu, nga mag-amping sa atong sinultihan ug linihokan sa dihang makig-estorya niadtong atong mahibalag diha sa mga kan-anan, hotel, o samtang magbiyahe, makaamot kita sa maayong reputasyon sa mga alagad ni Jehova ug atong malikayan nga mapandol ang uban. (1 Cor. 10:31; 2 Cor. 6:3, 4) Hinaot nga ang inyong pagtambong ug panggawi makapasidungog sa Diyos pinaagi sa pagbuhat niana sa 2009 nga Distritong Kombensiyon!—1 Ped. 2:12.