Sunda si Kristo Pinaagi sa Pagpasundayag ug Kaligdong
1. Sa unsang paagi ang tema sa kombensiyon niining tuiga nalangkit sa pagpasundayag ug dignidad o kaligdong?
1 Ang Bibliya naghubit sa Soberano sa Uniberso, si Jehova, nga gibestihan ug dignidad o kaligdong. (Sal. 104:1) Si Jesus kanunayng nagsulti ug naglihok sa paagi nga nagpasidungog sa iyang Amahan ug sa Iyang mga kahikayan. (Juan 17:4) Kitang tanan adunay kahigayonan sa pagsundog kang Jesus ug sa paghimaya kang Jehova panahon sa atong umaabot nga “Sunda si Kristo!” nga Distritong Kombensiyon.
2. Unsang mga pagpangandam ang angay natong himoon aron makatambong sa tanang sesyon ug sa ingon mapasidunggan si Jehova?
2 Ligdong nga Pagsimba: Kita makapasidungog kang Jehova pinaagi sa pagpaningkamot nga makatambong sa espirituwal nga kombira nga iyang giandam kanato. Nananghid na ba ka sa imong amo ug nahikay mo na ba ang imong mga kalihokan aron makatambong ka sa tanang adlaw sa kombensiyon, lakip ang Biyernes? Nakaplano na ba ka sa pag-abot ug sayo aron makapangitag kalingkoran ug makaduyog sa pangbukas nga awit ug pag-ampo? Nakaplano na ba ka kon unsay imong balonon sa paniudto aron makakaon ka uban sa mga igsoon diha sa giasembliyahan? Sa dihang dapiton na kita sa tsirman sa paglingkod inigsugod sa sesyon, kinahanglang putlon dayon nato ang atong panag-estoryahay ug molingkod alang sa pagsugod sa programa.
3. Sa unsang paagi ang atong pagpaminaw pag-ayo sa programa makapasidungog kang Jehova?
3 Ang pagpaminaw pag-ayo sa programa magpasidungog usab sa atong langitnong Amahan. Human maobserbahi ang usa ka distritong kombensiyon, usa ka reporter misulat nga ang mga tigpaniid madani gayod sa “maayong pamatasan sa mga nanambong, samtang sila hilom nga naminaw pag-ayo nga nagpaila sa ilang dulot nga interes sa espirituwal nga mga butang.” Mikomento usab siya bahin sa “daghan kaayong kabataan . . . , nga halos tanan nagpuyo lang ug kanunayng nagpakli sa mga teksto sa Bibliya.” Samtang magpadayon ang programa, dili kini panahon sa pag-estoryahanay, pag-text, pagkaonkaon, o paglakawlakaw. Ang mga bata kinahanglang molingkod tupad sa ilang mga ginikanan aron matabangan sila nga makabenepisyo sa programa. (Deut. 31:12; Prov. 29:15) Ang maong mga paningkamot magpakitag pagtahod sa uban ug pagpabili sa gitagana nga hinungdanong espirituwal nga pagkaon.
4. Nganong angay kitang magpasundayag ug ligdong nga panagway panahon sa kombensiyon?
4 Ligdong nga Panagway: Daghan ang nakaapresyar sa mga pahinumdom diha sa usa ka pakigpulong sa distritong kombensiyon sa miaging tuig nga nag-ulohang “Ipasundayag ang Kristohanong Dignidad sa Tanang Panahon,” nga nagpasiugda nga ang mga alagad sa Diyos kinahanglang maningkamot sa pagpasundayag ug kaligdong diha sa ilang pagpamesti ug pagpanghindik. Niining tuiga atong hatagan pag-usab ug seryosong pagtagad kining butanga. Ang atong panagway magpadayag sa atong pagbati bahin kang Jehova ug sa atong pribilehiyo ingong iyang mga Saksi. Angay kitang mamesti kanunay sama niadtong “nagpaila nga masimbahon sa Diyos.”—1 Tim. 2:9, 10.
5. Sa unsang paagi atong ikapasundayag ang ligdong nga panagway sa dihang kita manuroy sa siyudad nga giasembliyahan?
5 Magpasundayag lang ba kitag ligdong nga panagway panahon sa mga sesyon? Hinumdomi nga daghan ang makakita kanato nga adunay mga badge card samtang anaa sa siyudad nga giasembliyahan. Kinahanglan nga ligdong kitang tan-awon kon itandi sa kadaghanang tawo sa kalibotan. Busa, bisan panahon sa pagpanuroy, sama sa pagpangaon human sa sesyon sa hapon, angay kitang mamesti nga nahiangay sa mga ministro nga nanambong sa kombensiyon, ug dili kita angayng magsul-ob ug kaswal nga mga besti sama sa maong, purol, o tisirt. Pagkadakong pamatuod ang mahatag niini diha sa maong dapit! Si Jehova malipay kon ang atong panagway magbanaag sa atong pagkaministro.
6. Unsay maayong mga resulta kon kita magpasundayag ug kaligdong?
6 Makalilipay nga mga Resulta: Ang pagpasundayag ug kaligdong panahon sa atong mga kombensiyon mahimong magbukas ug mga kahigayonan sa pagsangyaw nga di pormal ug lagmit makadayeg ang mga tawo nga makakita kanato. Pagkahuman sa usa ka kombensiyon, usa ka opisyal miingon: “Karon pa kami makakitag mga tawo nga sama niini ka buotan. Kamo ang mga tawo nga nagtuman sa kabubut-on sa Diyos.” Ang pagpasundayag ug kaligdong nagpakita nga kita may pagtahod ug gugma sa usag usa ug naghimaya kang Jehova. (1 Ped. 2:12) Kini nagpasundayag sa atong diyosnong kahadlok ug sa atong pagpabili sa pribilehiyo nga matudloan sa atong Amahan. (Heb. 12:28) Hinaot maningkamot kita sa pagpasundayag ug kaligdong samtang kita mahinamong nagpaabot sa “Sunda si Kristo!” nga Distritong Kombensiyon niining tuiga.
[Kahon sa panid 5]
Mga Pahinumdom sa Distritong Kombensiyon
◼ Oras sa Programa: Ang programa magsugod sa alas 8:20 s.b. sa tibuok tulo ka adlaw. Sa dihang patokaron na ang pasiunang musika, kinahanglang manglingkod na kita nianang tungora aron ang programa makasugod sa ligdong nga paagi. Ang programa matapos sa alas 4:05 s.h. sa Biyernes ug Sabado, ug sa alas 4:10 s.h. sa Dominggo.
◼ Parkinganan: Sanglit kasagarang limitado ra ang parkinganan sa atong mga asembliyahanan, mas maayong mag-uban kamo sa usa ka sakyanan kay sa usa o duha lang ka tawo sa usa ka sakyanan.
◼ Pagreserbag Lingkoranan: Ang mga lingkoranan mahimong ireserba lamang sa mga kauban nimo sa sakyanan o sa balay.
◼ Paniudto: Palihog pagbalon ug paniudto imbes mobiya sa giasembliyahan aron mokaon o mopalit didto sa restawran o sa mga namaligya sa gawas. Mahimong gamiton ang gamayng balonan nga ikabutang ra sa ilalom sa lingkoranan. Ayaw pagdala ug dagkong pangpamilya nga mga picnic cooler, mabuakong mga sudlanan, ug makahubog nga mga ilimnon diha sa giasembliyahan.
◼ Donasyon: Ang paghikay ug distritong kombensiyon nagkinahanglan ug dakodakong salapi. Atong ikapakita ang atong pagpabili pinaagi sa paghatag ug donasyon ngadto sa tibuok-kalibotang buluhaton diha sa atong Kingdom Hall o sa giasembliyahan. Ang bisan unsang tseke nga idonar sa kombensiyon kinahanglang himoon nga payable to “Watch Tower.”
◼ Pagrekord: Ayawg ikonektar ang bisan unsang mga rekorder nganha sa sound system o sa linya sa koryente sa giasembliyahan ug mahimo lang kining gamiton nga dili makabalda sa uban.
◼ Follow-Up nga mga Porma: Ang Please Follow Up (S-43) nga porma kinahanglang gamiton aron sa paghatag ug kasayoran bahin kang bisan kinsa nga magpakitag interes tungod sa di-pormal nga pagsangyaw panahon sa kombensiyon. Ang mga magmamantala kinahanglang magdalag usa o duha ka porma ngadto sa kombensiyon. Ang napil-apan nga mga porma mahimong ihatag ngadto sa Book Room o sa sekretaryo sa inyong kongregasyon sa dihang makauli na kamo.—Tan-awa ang Pebrero 2005 nga Atong Ministeryo sa Gingharian, p. 6.