Magpadayon sa Pagpaabot Kang Jehova
1. Unsay tema sa kombensiyon, ug nganong haom kini?
1 “Si Jehova usa ka Diyos sa paghukom,” misulat si Isaias. “Malipayon kadtong tanan nga nagapaabot kaniya.” (Isa. 30:18b) Dunay daghang asoy ang Bibliya bahin sa pagpahamtang sa Diyos ug paghukom sa iyang mga kaaway ug pagluwas sa iyang matinumanong mga alagad. Unsang mga leksiyon ang gitudlo sa maong mga asoy ngadto sa mga magsisimba ni Jehova karon? Unsay atong mahimo karon sa pagpangandam alang sa “dako ug makalilisang nga adlaw ni Jehova”? (Joel 2:31, 32) Ang atong umaabot nga “Ang Kaluwasan Haduol Na!” nga Distritong Kombensiyon magpalihok kanato sa pagpalandong nianang mga pangutanaha ug sa pagsusi sa kaugalingon. Kini motabang kanato nga magpadayon sa pagpaabot kang Jehova.
2. Sa unsang paagi atong ikapakita ang pagpabili sa atong distritong kombensiyon?
2 Nakahimo ka na bag mga kahikayan sa pagtambong aron makapahimulos sa tibuok tulo ka adlaw nga kombensiyon? Pananglitan, giestorya mo na ba ang imong amo nga mobakasyon ka aron makatambong? Ayaw kinig ipamasin. Iampo kini. Dayon hangyoa ang imong amo. (Neh. 2:4, 5) Sa samang paagi, ayaw langana ang paghikay sa imong kasakyan, kapuy-an, ug uban pang kinahanglanong mga butang. Ang maong maayo nga pagplano magpakita sa atong lalom nga pagpabili sa espirituwal nga mga tagana ni Jehova. Ang mga ansiyano kinahanglang magmaabtik usab sa pag-abag niadtong nanginahanglag tabang sa ilang pagtambong sa kombensiyon, ilabina sa mga tigulang diha sa kongregasyon.—Gal. 6:10.
3. Unsang mga hiyasa ang angayng ipasundayag sa katawhan ni Jehova diha sa dapit nga giasembliyahan?
3 Ang Maayong Panggawi Makapasidungog sa Diyos: Sa dihang kita magkatigom sa kombensiyon diin daghan ang manambong, ang atong maayong panggawi magsilbing pamatuod sa komunidad. Unsay angay natong buhaton? Kon kita anaa sa mga restawran ug uban pang mga negosyohanan sa dapit nga giasembliyahan, kadtong atong pakiglabotan angayng malipay tungod sa atong Kristohanong mga hiyas, sama sa hataas nga pailob, kalulot, pagpugong-sa-kaugalingon, ug pagkamakataronganon. (Gal. 5:22, 23; Filip. 4:5) Kitang tanan angayng magpasundayag sa gugma nga “dili bastos, dili mangita sa kaugalingong kaayohan niini, dili mapasuko.” Bisag motungha ang mga problema o kahasol, kita buot ‘mohimo sa tanang butang alang sa kahimayaan sa Diyos.’—1 Cor. 10:31; 13:5.
4. Sa unsang paagi matabangan sa mga ginikanan ang ilang mga anak sa paggawi nga makahatag ug kadayeganan kang Jehova?
4 Human sa usa ka kombensiyon, nakadayeg kaayo ang usa ka manedyer sa hotel sa panggawi ug hitsura sa atong mga batan-on nga siya miingon nga gusto niyang “mga Saksi ni Jehova kanunay ang mga bisita sa iyang hotel.” Pagkamakapalipay! Kini tungod sa pagbansay ug pag-atiman ninyong mga ginikanan. Dili gayod maalamon alang sa mga ginikanan nga pasagdan lang ang ilang mga anak nga magpabilin diha sa hotel nga walay magbantay. Ang mga bata kinahanglang bantayan gayod kanunay. (Prov. 29:15) Hinaot ang ilang maayong panggawi makahatag ug kadayeganan kang Jehova ug makapalipay sa iyang kasingkasing!—Prov. 27:11.
5. Sa unsang paagi kita makapasidungog kang Jehova pinaagi sa atong pamesti ug pamostura?
5 Kasarangan nga Pamesti ug Pamostura: Kitang tanan makaamot sa katibuk-ang impresyon nga gihatag diha sa kombensiyon pinaagi sa paglikay sa pamesti ug pamostura nga makiuso, maghinobra, dili makasaranganon, o kaswal ra kaayo. Kini mapadapat sa dihang magbiyahe ngadto-nganhi sa giasembliyahan, samtang nagtabang sa pag-andam sa asembliyahanan, ug samtang nagtambong sa mga sesyon. Ingong mga alagad sa Diyos, una natong hatagag pagtagad ang ngalan ug kadungganan ni Jehova, dili ang atong personal nga kagustohan o kahayahay. Ang mga ulo sa pamilya maoy responsable sa pagseguro nga ang pamesti ug pamostura sa ilang pamilya magbanaag ug makasaranganon ug maayong panghunahuna sa tanang panahon.—1 Tim. 2:9.
6. Nganong kinahanglan natong huptan ang samang ligdong nga panagway panahon sa sesyon sa kombensiyon sa dihang magsuroysuroy na kita?
6 Hinungdanon usab ang paghupot ug ligdong nga panagway sa dihang magsuroysuroy diha sa mga tindahan ug mga restawran. Labing maayo kon kita magsul-ob sa atong besti sa kombensiyon kon kita mangaon sa gawas human sa sesyon. Ang pagtaod sa badge card sa kombensiyon maghatag ug kahigayonan kanato sa pagsangyaw sa di-pormal nga paagi.—2 Cor. 6:3, 4.
7. Sa unsang paagi kita makaamot sa kahapsay ug kalipay sa kombensiyon? (Tan-awa ang “Mga Pahinumdom sa Distritong Kombensiyon.”)
7 Si Isaias nagtagna: “Si Jehova magpadayon sa pagpaabot nga pakitaan kamog pabor, ug busa siya motindog aron pakitaan kamog kaluoy.” (Isa. 30:18a) Ang pagkamapasalamaton sa kaluoy ug dili-takos nga kalulot ni Jehova magtukmod kanato sa pagpasidungog kaniya pinaagi sa atong panggawi ug panagway samtang kita magkatigom panahon sa mga kombensiyon. Hinaot nga “Ang Kaluwasan Haduol Na!” nga Distritong Kombensiyon maghimaya sa atong Diyos ug motabang kanato sa pagpaabot kanunay kaniya!
[Kahon sa panid 5]
Mga Pahinumdom sa Distritong Kombensiyon
◼ Oras sa Programa: Ang programa magsugod sa alas 8:30 s.b. sa tibuok tulo ka adlaw. Pipila ka minutos sa dili pa magsugod ang sesyon, ang tsirman molingkod sa plataporma samtang patokaron ang pasiunang musika sa Gingharian. Kitang tanan kinahanglang manglingkod na nianang tungora aron ang programa makasugod sa ligdong nga paagi. Ang programa matapos sa alas 4:15 s.h. sa Biyernes, ug alas 4:05 s.h. sa Sabado, ug alas 4:10 s.h. sa Dominggo.
◼ Parkinganan: Paningkamotan namo ang paghikay ug parkinganan diha sa tanang kombensiyonan. Ang tanang may sakyanan kinahanglang mosunod sa direksiyon sa mga atendant sa parkinganan aron dili malisdan ang uban. Sanglit ang parkinganan sa atong mga asembliyahanan limitado ra, mas maayong mag-uban kamo sa usa ka sakyanan kay sa usa o duha lang ka tawo sa usa ka sakyanan.
◼ Ireserbang Lingkoranan: Ang mga lingkoranan mahimong ireserba lamang alang sa mga nagbiyahe uban kanimo sa samang sakyanan o nagpuyo uban kanimo sa samang balay.
◼ Paniudto: Palihog pagbalon ug paniudto imbes molakaw gikan sa giasembliyahan aron mokaon o mopalit didto sa restawran o sa mga namaligya diha sa aseras sa tingpaniudto. Mahimong gamiton ang gamayng cooler nga ikabutang ra diha sa ilalom sa lingkoranan. Ayaw pagdala ug dagkong pangpamilya nga mga picnic cooler, mabuakong mga sudlanan, ug alkoholikong mga ilimnon diha sa asembliyahanan.
◼ Donasyon: Ang paghikay ug distritong kombensiyon nagkinahanglan ug dakodakong salapi. Kita makapakita sa atong pagpabili pinaagi sa paghatag ug donasyon ngadto sa tibuok-kalibotang buluhaton diha sa atong Kingdom Hall o sa giasembliyahan. Ang bisan unsang tseke nga idonar sa kombensiyon kinahanglang himoon nga payable to “Watch Tower.”
◼ Aksidente ug Emerhensiya: Kon dunay medikal nga emerhensiya diha sa giasembliyahan, palihog tawga ang kinadul-ang atendant, nga maoy mopahibalo dayon sa First Aid Department aron masuta sa takos nga igsoon ang kaseryoso sa kahimtang ug matabangan siya.
◼ Rekording: Ayawg ikonektar ang bisan unsang mga rekorder nganha sa sound system o elektrisidad sa pasilidad ug mahimo lamang kining gamiton nga dili makabalda sa uban.
◼ Pagkuhag Hulagway: Kon magkuha kag hulagway panahon sa sesyon, palihog ayaw paggamit ug flash.
◼ Pager ug Cell Phone: Kini angayng patyon o ibutang sa silent mode aron dili makabalda.
◼ Follow-Up nga mga Porma: Ang Please Follow Up (S-43) nga porma kinahanglang gamiton aron sa paghatag ug kasayoran bahin kang bisan kinsa nga nagpakitag interes tungod sa di-pormal nga pagsangyaw panahon sa kombensiyon. Ang mga magmamantala kinahanglang magdalag usa o duha ka porma ngadto sa kombensiyon. Ang napil-apan nga mga porma mahimong ihatag ngadto sa Book Room o sa sekretaryo sa inyong kongregasyon sa dihang makauli na kamo.—Tan-awa ang Pebrero 2005 nga Atong Ministeryo sa Gingharian, p. 6.
◼ Badge Card: Palihog itaod kanunay ang mga badge card panahon sa kombensiyon ug samtang nagbiyahe sa pagpaingon ug sa pagpauli gikan sa kombensiyon. Kini mahimong makuha gikan sa inyong kongregasyon. Ayaw hulata nga pipila na lang ka adlaw sa dili pa ang kombensiyon ayha ka pa mangayog mga kard alang kanimo ug sa imong pamilya.
◼ Bawtismo: Ang mga kandidato sa bawtismo kinahanglang manglingkod diha sa gigahin nga lingkoranan sa dili pa magsugod ang programa sa Sabado sa buntag. Ang matag usa kinahanglang magdalag kasarangan nga humdonon ug tualya. Aron maseguro nga haom ang ilang pamesti, ang mga ansiyano nga magrepaso sa mga pangutana diha sa librong Organisado kinahanglang maglakip niini sa ilang panaghisgot.