Usa ka Malipayong Okasyon sa Espirituwal nga Bangkete
1. Sa unsang paagi si Jehova nagtagana sa espirituwal nga panginahanglan sa iyang mga alagad?
1 Si Jehova mahigugmaong nagtagana sa espirituwal nga panginahanglan sa iyang mga alagad. Kadaghanan sa mga tawo sa kalibotan kulang kaayog espirituwal nga pagkaon, apan kita buhong kaayo niini. (Isa. 65:13) Ang atong tinuig nga distritong mga kombensiyon maoy usa sa mga paagi ni Jehova sa pagpakaon kanato. Ikaw ba nangandam aron makatambong sa tanang sesyon sa nagsingabot nga “Giniyahan sa Espiritu sa Diyos” nga Distritong Kombensiyon? Sa maong kombensiyon, gihikay ang lamian ug makapahimsog-sa-espirituwal nga bangkete.
2. Unsay imong himoon karon agig pagpangandam sa kombensiyon?
2 Pagplano nga Abante: “Ang mga plano sa kugihan mosangpot gayod sa kaayohan.” (Prov. 21:5) Busa, aron makompleto nimo pagtambong ang tulo ka adlaw nga kombensiyon, mas maayo kon karon pa lang mananghid ka na sa imong amo bahin niini. Kon layo ang asembliyahanan, nangita ka na bag kasak-an? Maayo usab kon imong ilakip sa pagplano ang paniudto aron didto na kamo mangaon sa asembliyahanan uban sa mga igsoon. Planoha usab nga makaabot ug sayo sa kombensiyon aron makalingkod kamog tarong ug makaapil sa pangbukas nga pag-awit ug pag-ampo.
3. Unsang matanga sa sinina ang atong isul-ob sa kombensiyon?
3 Tinoon gayod nato nga ang atong sinina hapsay ug makasaranganon. (1 Tim. 2:9, 10) Ang distritong mga kombensiyon maoy kahigayonan diin makahatag kitag maayong pamatuod ngadto sa mga tawo. Kon atong itaod ang atong badge ug huptang desente ang atong panagway, makita sa mga tawo nga kita lahi sa uban ug sila modayeg kanato.
4. Unsay makatabang kanato ug sa atong pamilya aron makabenepisyo sa programa?
4 Pamati Pag-ayo: Niining espirituwal nga bangkete, dili gayod nato gusto nga aduna kitay masayloan sa mga butang nga hisgotan! (Prov. 22:17, 18) Busa atong isentro ang atong pagtagad sa programa ug likayan ang mga kabaldahan. Mahimo nato kana kon atong sundan pagbasa ang mga teksto nga hisgotan sa mamumulong ug maghimog mugbong mga nota. Dayon pagkagabii, atong magamit ang atong mga nota aron hisgotan ang pangunang mga punto sa programa. Sa milabayng mga tuig, namatikdan nga ang mga batan-on magtapok-tapok panahon sa sesyon nga magsigeg estorya o magsigeg text. Kon kita adunay mga anak, gagmay man o tin-edyer na, mas maayo nga itupad nato sila inay tugotan nga makigtupad sa ubang batan-on.
5. Unsay atong himoon aron mas magmalipayon kita panahon sa kombensiyon?
5 Pahimusli ang Pagpakig-uban sa mga Igsoon: Mas ganahan kang mokaon sa lamiang pagkaon kon kauban nimo ang imong mga higala. (Prov. 15:17) Sa samang paagi, ang pagpakig-uban sa atong mga igsoon makahatag kanatog dugang kalipay diha sa kombensiyon. Busa, sa dili pa o human sa matag sesyon, maayo gayod nga pahimuslan nato ang higayon aron ila-ilahon ang mga igsoon. (Sal. 133:1) Kon hangyoon na kita sa tsirman sa paglingkod sa dili pa sugdan ang musika, mohunong kita sa pagpakig-estorya ug mobalik na sa atong lingkoranan.
6. Pag-asoy ug personal nga kasinatian nga nagpakita kon sa unsang paagi kita makasangyaw sa dapit diin ipahigayon ang kombensiyon.
6 Magmaandam sa Pagsangyaw: Panahon sa kombensiyon, kita sagad adunay maayong mga kahigayonan sa pagsangyaw. Human sa programa, daghang igsoon ang mangaon sa restawran ug mamatikdan sa mga waiter ang ilang badge mao nga mangutana sila bahin niini. Busa, ang mga igsoon nakahatag ug maayong pamatuod bahin sa kamatuoran. Dihay pipila kanila nga mitambong sa kombensiyon sa dihang sila giimbitar.
7. Nganong kinahanglan kitang motambong sa nagsingabot nga distritong kombensiyon?
7 Dako kaayong panahon ang gigugol sa pag-andam sa mga programa ug sa asembliyahanan, sa lainlaing departamento sa kombensiyon, ug sa mga bahin. Kining tinukmod-sa-gugma nga paghago alang niining espirituwal nga bangkete nagpaila sa mahigugmaong pag-atiman ni Jehova sa iyang katawhan. Hinaot nga kitang tanan motambong gayod aron pahimuslan kini nga mga tagana! Kon ato kining himoon, dili sama sa mga tawo sa kalibotan, kita ‘malipay gayod tungod sa maayong kahimtang sa kasingkasing.’—Isa. 65:14.
[Kahon sa panid 5]
Mga Pahinumdom sa Distritong Kombensiyon
◼ Oras sa Programa: Ang programa sa Biyernes ug Sabado magsugod sa alas 8:20 s.b. ug sa Dominggo, alas 8:50 s.b. Sa dihang patokaron na ang pasiunang musika, kinahanglang manglingkod na kita aron ang programa makasugod sa hapsay nga paagi. Ang programa sa Biyernes ug Sabado matapos sa alas 3:55 s.h. ug sa Dominggo, alas 4:00 s.h.
◼ Parkinganan: Sa mga asembliyahanan diin kitay modumala sa parkinganan, kamo makahimo sa pagparking nga walay bayad. Ang unang moabot maoy makauna sa pagparking. Ang inyong mga badge card maoy tan-awon sa mga atendant aron kamo tugotan sa pagparking.
◼ Pagreserbag Lingkoranan: Ang mga lingkoranan mahimong ireserba lamang para sa mga kauban ninyo sa sakyanan o sa balay.
◼ Paniudto: Palihog pagbalon ug paniudto imbes mobiya sa asembliyahanan aron mopalit ug pagkaon sa gawas. Mahimong gamiton ang gamayng cooler nga ikabutang ra sa ilalom sa lingkoranan. Ayaw pagdala ug dagkong picnic cooler, mabuak nga mga sudlanan, ug makahubog nga mga ilimnon diha sa asembliyahanan.
◼ Donasyon: Atong ikapakita ang atong pagpabili sa kombensiyon pinaagi sa paghatag ug donasyon diha sa atong Kingdom Hall o sa asembliyahanan alang sa tibuok-kalibotang buluhaton. Ang bisan unsang tseke nga idonar alang sa kombensiyon kinahanglang himoon nga payable to “Watch Tower.”
◼ Aksidente ug mga Emerhensiya: Kon adunay mga emerhensiya sa asembliyahanan, palihog hangyoa ang atendant nga anaa sa duol sa pagpahibalo niini ngadto sa First Aid aron ilang makita ang kahimtang sa igsoon ug matabangan siya. Kon gikinahanglan, ila siyang ihatod sa duol nga ospital.
◼ Pagrekord: Ayaw ikonektar ang bisan unsang mga rekorder nganha sa sound system o sa linya sa koryente sa asembliyahanan. Mahimo lang gamiton ang mga rekorder kon dili kini makabalda sa uban.
◼ Pagkuhag Hulagway: Kon mokuha mog hulagway panahon sa mga sesyon, palihog ayaw paggamit ug flash.
◼ Cell Phone: Kinahanglang palongon o i-silent kini aron dili mabalda ang mga igsoon panahon sa mga sesyon.
◼ Follow-Up nga mga Porma: Ang Please Follow Up (S-43) nga porma kinahanglang gamiton aron sa paghatag ug kasayoran bahin kang bisan kinsa nga magpakitag interes tungod sa di-pormal nga pagsangyaw panahon sa kombensiyon. Ang mga magmamantala kinahanglang magdalag usa o duha ka porma ngadto sa kombensiyon. Ang napil-apan nga mga porma mahimong ihatag ngadto sa Book Room o sa sekretaryo sa inyong kongregasyon sa dihang makauli na kamo.—Tan-awa ang Pebrero 2005 nga Atong Ministeryo sa Gingharian, p. 6.
◼ Kan-anan: Pasidunggi ang ngalan ni Jehova pinaagi sa inyong maayong panggawi diha sa mga kan-anan. Sa ubang lugar, ang mga tawo naanad na nga mohatag ug 10 porsiyento nga tip, depende sa serbisyo.
◼ Badge Card: Palihog isul-ob ang inyong badge card samtang anaa kamo sa asembliyahanan ug samtang kamo mobiyahe paingon ug pauli. Mabatonan lamang ang badge card diha sa inyong kongregasyon. Ayaw paglanganlangan sa pagkuha niini alang kaninyo ug sa mga membro sa inyong pamilya.
◼ Bawtismo: Ang mga kandidato sa bawtismo kinahanglang magpahiluna na sa dapit nga gireserba alang kanila sa dili pa magsugod ang programa sa Sabado sa buntag. Ang matag usa kanila kinahanglang magdalag kasarangang humdonon ug tualya. Aron maseguro nga haom alang sa okasyon ang isul-ob sa mga kandidato, kinahanglang hisgotan kini uban kanila sa mga ansiyano nga maasayn sa pagrepaso sa mga pangutana diha sa librong Organisado.