Atong mga Distritong Kombensiyon—Dakong Pamatuod sa Kamatuoran
1. Unsang mga kamatuoran ang mapamalandong ug mahisgotan sa mga Israelinhon sa ilang regular nga mga pista?
1 Ang karaang mga Israelinhon nagtigom katulo sa usa ka tuig alang sa ilang regular nga mga pista. Bisag mga lalaki lang ang kinahanglang motambong, tibuok nga mga pamilya ang sagad mopanaw ngadto sa Jerusalem aron pahimuslan kining malipayong mga kombensiyon. (Deut. 16:15, 16) Kadto naghatag ug kahigayonan sa pagpamalandong ug paghisgot sa hinungdanong mga kamatuoran. Unsay pipila niini? Ang usa mao nga si Jehova madagayaon ug mahigugmaong Magtatagana. (Deut. 15:4, 5) Ang lain mao nga siya masaligan alang sa giya ug panalipod. (Deut. 32:9, 10) Mapamalandong usab sa mga Israelinhon nga sila maoy katawhan alang sa ngalan ni Jehova ug busa kinahanglang magkinabuhi sila uyon sa iyang matarong nga mga dalan. (Deut. 7:6, 11) Karon, ang atong tinuig nga mga distritong kombensiyon makahatag kanatog susamang mga benepisyo.
2. Sa unsang paagi ang programa sa distritong kombensiyon maghatag ug kahayag sa kamatuoran?
2 Ang Programa Maghatag ug Kahayag sa Kamatuoran: Sa mga distritong kombensiyon, mapahimuslan nato ang mga pakigpulong, drama, demonstrasyon, ug interbiyo nga maghatag ug kahayag sa hinungdanong mga kamatuoran sa Bibliya. (Juan 17:17) Ang organisasyon ni Jehova nag-andam ug usa ka programa nga gidisenyo sa pagtagana sa mga panginahanglan karon sa katawhan sa tibuok kalibotan. (Mat. 24:45-47) Naghinamhinam ka na bang motan-aw ug mamati sa programa?
3. Unsay kinahanglan natong buhaton aron makabenepisyo sa programa?
3 Siyempre, kita makabenepisyo lamang kon motambong ta ug mamatig maayo sa tanang tulo ka adlaw. Maayo nga abante kang mananghid sa imong amo nga mobakasyon ka sa trabaho. Paneguroa nga magbatog igong pahulay kada gabii aron dili ka magduka panahon sa sesyon. Nakita sa daghan nga ang pagpokus sa ilang mata sa mamumulong ug pagnota nakatabang nila nga magpabiling atentibo. I-adjust ang imong cell phone sa setting nga dili makadisturbo. Likayi ang pagpakig-estorya, pagtext, pagkaonkaon, o pag-inom panahon sa sesyon.
4. Sa unsang paagi ang mga ginikanan makatabang sa ilang mga anak nga makabenepisyo sa kombensiyon?
4 Sa mga tuig sa Igpapahulay, dihang ang mga pamilyang Israelinhon magtigom aron mamati sa pagbasa sa Balaod panahon sa Pista sa mga Balongbalong, giuban nila ang ilang “mga bata . . . aron sila mamati ug aron sila makakat-on.” (Deut. 31:12) Makapadasig gayod nga makitang ang mga pamilya nag-uban sa paglingkod panahon sa kombensiyon ug ang mga bata namati pag-ayo ug wala mangatulog! Di ba maayo nga kada gabii tan-awon ninyo ang inyong nota ug hisgotan ang mga punto sa programa nga nagustohan ninyo pag-ayo? “Ang mga binuang nabugkos sa kasingkasing sa usa ka bata,” busa maayong bantayan sa mga ginikanan ang ilang mga anak, apil ang mga tin-edyer na, sa tingpahulay sa udto ug samtang anaa sa sak-anan, inay ‘pasagdan’ lang sila.—Prov. 22:15; 29:15.
5. Sa unsang paagi ang atong panggawi, pamesti ug pamostura makadayandayan sa kamatuoran samtang anaa sa dapit sa kombensiyon?
5 Atong Maayong Panggawi Makadayandayan sa Kamatuoran: Ang atong maayong panggawi diha sa dapit sa kombensiyon makadayandayan sa kamatuoran. (Tito 2:10) Kon itaod nato ang badge sa kombensiyon, kini dili lang mag-anunsiyo sa kombensiyon ug magpaila kanato sa ubang delegado kondili kini usa usab ka pamatuod ngadto sa mga naniid kanato. Makita sa mga tawo sa dapit sa kombensiyon nga kadtong nagtaod ug badge nagbestig hapsay ug desente, dili sa mga estilo nga seksi ug binugoy nga komon sa kalibotan. (1 Tim. 2:9, 10) Busa, angayng tagdon nato ang atong besti ug pamostura panahon sa kombensiyon. Bisag ang kombensiyon ipahigayon sa way-bungbong nga estadyum, ang atong besti angayng ligdong. Kon human sa programa kita mag-ilis ug moadtog restawran, angayng hinumdoman nga kita mga delegado gihapon sa kombensiyon ug ang atong besti kinahanglang dili sobra ka kaswal.
6 Panahon sa regular nga mga pista, ang mga Israelinhon nagpahimulos sa makapalig-ong pag-ubanay sa isigkamagsisimba gikan sa ubang bahin sa nasod ug sa kalibotan, ug kadto nakaamot sa panaghiusa. (Buh. 2:1, 5) Panahon sa mga distritong kombensiyon, ang atong talagsaong Kristohanong panag-igsoonay bug-os nga mapasundayag. Ang mga maniniid sagad makadayeg niining makalilipayng bahin sa atong espirituwal nga paraiso. (Sal. 133:1) Inay mobiya sa asembliyahanan sa tingpaniudto aron mopalit ug pagkaon, mas maayong magdalag gamayng balon ug pahimuslan ang kahigayonan nga mahimamat ug maestorya ang mga igsoon nga naglingkod sa imong duol!
7 Ang mga maniniid sagad makadayeg sa atong organisado kaayo ug hapsay nga mga kombensiyon, ilabina dihang masayran nilang ang tanang buluhaton gihimo sa mga boluntaryo. Ikaw ba ‘makatanyag sa imong kaugalingon nga kinabubut-on’ sa pagboluntaryo panahon sa kombensiyon? (Sal. 110:3) Sagad, tibuok nga mga pamilya ang moboluntaryo aron mabansay ang ilang mga anak sa pagtabang sa uban. Kon maulawon ka, ang pagboluntaryo sa kombensiyon maoy maayong paagi aron mahimamat ang ubang delegado. Usa ka sister ang mikomento: “Gawas sa akong pamilya ug sa pipila ka higala, diyutay ra kog kaila didto. Apan dihang mitabang kog panghinlo, nailaila nako ang daghang igsoon. Nalipay kaayo ko!” Mas makalilipay gayod dihang modaghan ang atong higala pinaagi sa pagboluntaryo sa kombensiyon. (2 Cor. 6:12, 13) Kon wala pa ka sukad makaboluntaryo, pangutana sa mga ansiyano kon sa unsang paagi mahimo kang kuwalipikado sa pagboluntaryo.
8 Imbitaha ang Uban sa Pagpamati sa Kamatuoran: Sama sa nangaging mga tuig, tulo ka semana una ang kombensiyon, makig-ambit ta sa kampanya sa pagpangimbitar sa uban aron motambong niana. Paningkamotan sa kongregasyon nga ang imbitasyon mapanagtag sa tibuok nilang teritoryo kon posible. (Tan-awa ang kahong “Unsaon Nato Pagtanyag ang Imbitasyon?”) Ang mabiling imbitasyon angayng dad-on ngadto sa kombensiyon. Kini gamiton sa mga delegado sa di-pormal nga pagsangyaw diha sa dapit sa kombensiyon.
9 Duna bay misanong niining tinuig nga kampanya? Sa usa ka kombensiyon, gitabangan sa atendant ang usa ka magtiayon sa pagpangitag kalingkoran. Sila miingon nga sila nakadawat ug imbitasyon ug “naghunahuna nga daw makaiikag kadto.” Busa midrayb silag 320 kilometros aron makatambong! Sa laing kahimtang, usa ka sister nga namalaybalay mihatag sa imbitasyon ngadto sa usa ka lalaki nga daw mausisahon bahin sa kombensiyon. Busa gisaysay sa sister ang imbitasyon kaniya. Pila ka adlaw sa ulahi, nakit-an sa sister ang maong lalaki ug usa niya ka higala didto sa kombensiyon nga nagbitbit nag basahon nga giluwatan sa kombensiyon!
10 Ang regular nga mga pista maoy mahigugmaong tagana ni Jehova aron tabangan ang mga Israelinhon sa ‘pag-alagad kaniya sa paaging walay-ikasaway ug sa kamatuoran.’ (Jos. 24:14) Sa susama, ang atong pagtambong sa tinuig nga mga distritong kombensiyon makatabang nato nga ‘magpadayon sa paglakaw diha sa kamatuoran’ ug maoy hinungdanong bahin sa atong pagsimba. (3 Juan 3) Hinaot panalanginan ni Jehova ang paningkamot sa tanang mahigugmaon sa kamatuoran nga motambong ug bug-os nga makabenepisyo sa kombensiyon!
6. Unsay usa ka paagi aron mapahimuslan ang atong Kristohanong panaghiusa panahon sa kombensiyon?
7. Unsa ang mga rason sa pagboluntaryo kon itugot sa atong kahimtang?
8. Sa unsang paagi atong maimbitar ang uban sa pagtambong sa kombensiyon?
9. Pag-asoy ug mga eksperyensiya nga nagpamatuod nga ang atong tinuig nga kampanya sa pagpanagtag ug imbitasyon dunay maayong mga resulta.
10. Nganong hinungdanon ang pagtambong sa atong tinuig nga mga distritong kombensiyon?
[Blurb sa panid 3]
Ang atong maayong panggawi diha sa dapit sa kombensiyon makadayandayan sa kamatuoran
[Blurb sa panid 3]
Tulo ka semana una ang kombensiyon, makig-ambit ta sa kampanya sa pagpangimbitar sa uban aron motambong niana
[Kahon sa panid 4]
Unsaon Nato Pagtanyag ang Imbitasyon?
Aron makobrehan ang teritoryo, kinahanglang mubo ra ang atong isulti, nga tingali moingon: “Maayong adlaw. Nakig-ambit mi sa tibuok-kalibotang pagpanagtag niini nga imbitasyon. Kini ang imong kopya. Mabasa nimo dinhi ang dugang impormasyon.” Magmadasigon. Dihang managtag sa hinapos sa semana, itanyag usab ang mga magasin kon kana haom.
[Kahon sa panid 5]
Mga Pahinumdom Sa 2012 Distritong Kombensiyon
◼ Oras sa Programa: Sa tulo ka adlaw, ang programa magsugod sa 8:20 s.b. Ang asembliyahanan pagabuksan sa 7:00 s.b. Dihang ipahibalo ang pasiunang musika, ang tanan kinahanglang manglingkod na aron ang programa makasugod nga hapsay. Ang programa sa Biyernes ug Sabado matapos sa 3:55 s.h., ug sa Dominggo 2:40 s.h.
◼ Parkinganan: Sa parkinganan sa asembliyahanan, ang unang makaabot maoy unang makaparking. Kay limitado man ang parkinganan, labing maayo nga mag-uban sa sakyanan ang mga igsoon imbes magdalag iyaiyang sakyanan.
◼ Pagreserbag Lingkoranan: Ang mga lingkoranan ireserba lang para sa mga kauban sa balay, sa sakyanan, o sa imong mga gitun-an sa Bibliya.—1 Cor. 13:5.
◼ Paniudto: Palihog pagbalon ug paniudto imbes mobiya aron mopalit ug pagkaon. Mahimong magdalag gamayng cooler nga ikabutang sa ilalom sa lingkoranan. Ayaw pagdalag dagkong cooler ug bildong mga sudlanan diha sa asembliyahanan.
◼ Donasyon: Atong ikapakita ang atong pagpabili sa mga kahikayan sa kombensiyon pinaagi sa pag-amot para sa tibuok-kalibotang buluhaton diha sa asembliyahanan. Ang mga tseke nga idonar diha sa kombensiyon kinahanglang payable to “Watch Tower.”
◼ Aksidente ug Emerhensiya: Kon may emerhensiya diha sa asembliyahanan, palihog duola ang usa ka atendant, kinsa magpahibalo dayon niini sa First Aid aron ilang masusi ang kahimtang sa igsoon ug matabangan siya. Kon gikinahanglan, sila motawag sa kinadul-ang ospital.
◼ Tambal: Kon nagtomar kag gireseta nga tambal, palihog tinoa gayod nga magdala kag igong suplay kay walay mabatonan diha sa kombensiyon. Ang mga indyeksiyon nga gigamit sa mga diabeteson kinahanglang ilabay sa basurahan nga para sa hazardous waste ug dili diha sa mga basurahan sa asembliyahanan.
◼ Sapatos: Kada tuig daghan ang madisgrasya tungod sa sapatos. Maayo nga magsul-ob ug kasarangan, sigo sa tiil nga sapatos aron luwas kang makalakaw sa rampa, agianang puthaw nga may lungag-lungag, hagdanan, ug uban pa.
◼ Pagrekord: Ang mga rekorder dili angayng ikonektar diha sa sound system o sa linya sa koryente sa asembliyahanan ug kini mahimo lamang gamiton sa paagi nga dili makabalda sa uban.
◼ Pagletrato: Kon mokuha kag letrato panahon sa sesyon, palihog ayaw paggamit ug flash o ayawg salipdi ang uban nga naminaw sa programa.
◼ Please Follow Up (S-43) nga Porma: Palihog isulat diha sa Please Follow Up nga porma ang impormasyon bahin sa mga tawong nagpakitag interes nga imong nasangyawan sa di-pormal nga paagi panahon sa kombensiyon. Ang mga magmamantala angayng magdalag usa o duha ka porma. Ang napil-apan nga mga porma mahimong ihatag sa Book Room o sa sekretaryo sa inyong kongregasyon inig-uli ninyo.—Tan-awa ang Nobyembre 2009 nga Atong Ministeryo sa Gingharian, panid 4.
◼ Restawran: Pasidunggi ang ngalan ni Jehova pinaagi sa imong maayong panggawi diha sa mga restawran. Paghatag ug tip kon mao kini ang naandan.
◼ Badge Card: Palihog itaod ang imong badge card panahon sa kombensiyon ug dihang magbiyahe ngadto-nganhi sa kombensiyon. Ang mga badge card mabatonan lang diha sa inyong kongregasyon. Pagkuha dayon niini alang kanimo ug sa imong pamilya.
◼ Bawtismo: Ang mga kandidato sa bawtismo kinahanglang magpahiluna na sa dapit nga gireserba kanila sa dili pa magsugod ang programa sa Sabado sa buntag. Ang matag kandidato kinahanglang magdalag humdonon nga dili salawayon ug tualya. Aron maseguro nga haom ang isul-ob sa mga kandidato, kinahanglang hisgotan kini uban kanila sa mga ansiyano nga maasayn sa pagrepaso sa mga pangutana sa librong Organisado.
◼ Pagboluntaryo: Mas magmalipayon pa kita kon kita moboluntaryo panahon sa kombensiyon. (Buh. 20:35) Ang tanang gustong moboluntaryo angayng moadto sa Volunteer Service Department sa kombensiyon. Ang mga bata nga wala pay 16 anyos makaboluntaryo usab kon ubanan sa ginikanan o sa laing hamtong ubos sa pagtugot sa ginikanan.