Ang “Bag-ong” mga Apohan

“Giabiabi Ka sa Balay ni Lola ug Lolo—Ang mga Bata Padahanon Samtang Maghulat Ka.” Mao kanay mabasa sa karatula diha sa ganghaan sa balay ni Gene ug Jane.

APAN, sulod ug dili ka makakita ug tigulang nga magtiayon nga naglingkod sa mga siyang tuwangtuwang. Hinunoa, makaplagan nimo ang daw batan-on, lagsik nga magtiayon nga nag-edad ug mga 40 anyos. Nga wala gayod magsalikway sa ilang mga papel ingong mga tigulang, si Gene ug Jane madasigong midawat sa pagkaapohan. “Tinuod, usa kini sa ginagmayng mga timailhan sa kinabuhi nga nagkatigulang ka na,” matod ni Gene, “apan usa kini sa mga ganti, ang balos sa pag-alima sa imong mga anak—mga apo.”

Ang usa ka karaang proverbio nag-ingon: “Ang purongpurong sa mga tigulang nga lalaki mao ang mga apo.” (Proverbio 17:6) Ang mga apohan ug mga apo kasagarang nagpahimulos ug usa ka linain kaayong bugkos sa gugma ug kasuod. Ug sumala sa magasing Generations, “ang wala-hitupnging gidaghanon sa mga tawo sa Amerikanhong katilingban maoy mga apohan.” Ang rason? “Nag-uswag nga gidahom nga gitas-on sa kinabuhi ug bag-ong mga kinaiya diha sa siklo sa kinabuhi sa pamilya,” misaysay ang artikulo. “Ang mga kausaban sa mortalidad ug pertilidad nagkahulogan nga ang gibanabanang tres-kuwartos sa mga hamtong ang mahimong mga apohan . . . Kadaghanang edad-edaran nga mga tawo ang mahimong mga apohan sa mga edad nga 45.”

Ang bag-ong kaliwatan sa mga apohan mitungha sa pipila ka nasod. Apan, daghan ang nakakaplag sa ilang kaugalingon nga labi pa gayong nalangkit sa pag-atiman sa ilang mga apo. Pananglitan, ang anak nga lalaki ni Gene ug Jane ug kanhing umagad nga babaye nagdiborsiyo ug parehong dunay katungod sa pag-atiman sa bata. “Naningkamot kami sa pagtabang pinaagi sa pag-atiman sa among apo samtang nagtrabaho ang among anak,” misaysay si Jane. Sumala sa usa ka surbi, ang mga apohan sa Tinipong Bansa nga nag-akatar sa ilang mga apo moaberids ug mga 14 ka oras sa matag semana sa paghimo niana. Mokabat kini sa kantidad nga 29 bilyong dolyares nga trabaho sa usa ka tuig!

Unsang mga kangaya ang nasinati sa mga apohan karon? Unsa ang ilang mga kalisdanan? Ang mosunod nga mga artikulo mosusi niining mga pangutanaha.