Mga Batan-on Nangutana . . .

Nganong Dili Nako Mabatonan ang mga Butang nga Gusto Nako?

“Dunay pipila ka butang nga nindot kaayo, ug gusto nakong mabatonan kana; apan ang akong mga ginikanan dili makaarang niana.”—Mike.

DUNA bay mga butang nga gusto kaayo nimo apan dili mabatonan? Tingali nangandoy ka pag-ayo nga makabaton nianang bag-ong stereo, niadtong sapatos nga ginasul-ob sa tanang batan-on, o usa ka bag-ong karsones nga dunay marka sa iladong tigdisenyo. Ang pipila sa imong isigkaingon nanag-iya—ug mapagarbohong nagpakita—sa maong mga butang. Busa kon giingnan kang dili makaarang niana ang imong mga ginikanan, lagmit mahigawad ka.

Apan bisan tuod medyo normal nga magtinguha ug pipila ka materyal nga mga butang, alang sa daghang batan-on ang pangandoy nga makabaton niana hapit nang maghinobra. Dakong bahin niini dayag nga maoy resulta sa propaganda sa palaumagian sa balita. Ang madanihong paanunsiyo sa TV, magasin, ug sa radyo naghatag ug mensahe nga gawas kon isul-ob nimo ang usa ka matang sa mga sinina o gamiton ang mga produkto nga dunay usa ka marka sa nagdisenyo, ikaw pakyas kaayo. Aw, ang mga tin-edyer mogasto ug kapin sa 100 ka bilyong dolyar kada tuig sa Tinipong Bansa lamang!

Unya anaa ang pagpit-os gikan sa mga isigkaingon. “Sa mabangis yanong kalibotan sa mga batan-on,” matod sa artikulo sa magasing Marketing Tools, “ang pagkahimong gihunahuna nga wala sa uso diha sa hut-ong sa katilingban nga imong gitinguha dili lamang maoy pagkapakyas nga makab-ot ang mga sukdanan sa imong mga isigkaingon, o bisan pagkasinalikway: kana maoy timailhan sa Pildiro.” Ang yawi sa pagkahimong nunot sa uso? Sa daghang pundok mao kana ang pagpanag-iya sa kinamaayohan ug sa kinaulahian sa materyal nga mga butang. Ug kon dili ka makaarang niana? “Lisod gayod kaayo,” miadmitir ang usa ka Kristohanong batan-on. “Moadto ka sa tunghaan nga nagsul-ob ug sinina nga walay marka sa iladong tigdisenyo, ug ang tanan magsulogsulog kanimo.” Miadmitir ang laing batan-on, “mibati akong wala dawata sa akong mga isigkaingon.”

Ang susamang mga kapit-os bation tingali sa mga batan-on nga nanagpuyo sa nagakaugmad nga mga nasod, diin ang mga tawo naghago ug daghang oras aron lamang makabaton sa lisod nga paagi sa sukaranang mga kinahanglanon sa kinabuhi. Kon tinuod kini sa imong pamilya, tingali kinaiyanhong mangandoy ka ug mas maayong paagi sa kinabuhi. Sanglit nakakita ug mga salida sa TV ug sa sine gikan sa mas adunahang kanasoran, tingali nagsugod ka sa pagpangandoy ug mahalong mga sinina, balay, ug kotse nga gipasiugda nianang maong mga salida ug mga pelikula. Tungod kay ang maong mga butang morag dili gayod makab-ot, tingali mayugot ka o maguol pa gani.

Nagpuyo ka man sa kabos nga nasod o sa adunahan nga nasod, ang pagkasuko o pagkahigawad tungod kay dili ka makabaton sa pipila ka butang makadaot lamang kanimo. Mahimong motultol usab kini sa kanunayng pagpakig-away sa imong mga ginikanan. Ang pangutana mao, Unsaon nimo pagsagubang?

Timbang nga Panglantaw sa Materyal nga mga Butang

Una, amgohi nga dili tinguha ni Jehova nga Diyos nga ang iyang katawhan magpuyo sa kakabos o dili makabaton sa mga butang nga gikinahanglan gayod nila. Kon buot hunahunaon, gibutang sa Diyos si Adan ug Eva, dili sa labayanag basura, kondili sa usa ka matahom nga tanaman nga puno sa mga kahoy nga tilinguhaon sa mga mata. (Genesis 2:9) Sa ulahi, ang pipila ka alagad sa Diyos, sama kang Abraham, Job, ug Solomon, nanag-iyag daghang materyal nga kabtangan. (Genesis 13:2; Job 1:3) Aw, si Solomon nakapanag-iya ug daghan kaayong bulawan nga ang salapi giisip nga “walay bili” panahon sa iyang paghari!—1 Hari 10:21, 23.

Apan, sa katibuk-an kadaghanan sa katawhan sa Diyos may kasarangang panginabuhi. Si Jesu-Kristo mismo kabos; wala gani siyay ‘dapit nga kapahilunaan sa iyang ulo.’ (Mateo 8:20) Bisan pa niana, wala ka gayod makabasa nga si Jesus nagreklamo nga dili siya makaabot sa mga butang nga gusto niya. Hinunoa, siya nagtudlo: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ . . . Kay nahibalo ang inyong langitnong Amahan nga gikinahanglan ninyo kining tanang butanga. Nan, padayong pangitaa nga una ang gingharian ug ang iyang pagkamatarong, ug kining tanang ubang mga butang idugang kaninyo.”—Mateo 6:31-33.

Wala kini magpasabot nga ang Diyos obligadong motagbaw sa mga pangandoy sa usa alang sa mga sinina nga dunay marka sa iladong tigdisenyo o sa elektroniks nga mga kasangkapan. Ang Diyos magtagana sa atong mga panginahanglan—dili na kinahanglan sa atong mga gusto. Mao kanay hinungdan kon nganong giawhag kita sa Bibliya nga magmakontento sa “pagkaon ug sapot.” (1 Timoteo 6:8) Apan atubangon nato kini, ang pagpabiling kontento dili sayon. “Ikaw adunay kanunayng pakigbugno tali sa imong mga gusto ug mga kinahanglanon,” miadmitir ang usa ka batan-on nga ginganlag Mike. Gawas pa sa atong kaugalingong hakog nga mga hilig, kinahanglang makigbugno kita sa impluwensiya sa dakong kaaway sa Diyos, si Satanas nga Yawa. (1 Juan 5:19) Ug usa sa iyang labing karaan nga mga lansis mao ang pagpabati sa mga tawo nga nakulangan sila sa usa ka butang. Si Eva sa ingon nahaylo sa paghunahuna nga siya gihikawan—bisan tuod nagpuyo siya sa usa ka hingpit nga paraiso!—Genesis 3:2-6.

Unsaon nimo paglikay nga mahulog sa kahimtang nga dili-kontento? Morag ordinaryong paminawon, apan daghang katarongan sa pag-ihap sa imong mga panalangin. Ayawg papugong sa negatibong mga hunahuna mahitungod sa wala nimo mabatoni. Paghunahuna nga positibo, ug pahinumdomi ang imong kaugalingon kon unsay imong nabatonan. (Itandi ang Filipos 4:8.) Si Mike nagpahayag niana niining paagiha: “Dunay daghang butang nga gusto gayod nako, apan dili ko maghunahuna niana.”

Makatabang usab nga mahimong maduhaduhaon sa malansisong mga paanunsiyo nga magpahimulos sa imong mga emosyon.a (Proverbio 14:15) Una mohinapos dayon nga “mamatay” ka kon wala kanang bag-ong sapatos o kanang compact disc player, sulayi ang pagtimbangtimbang sa kalmadong paagi. Pangutan-a ang imong kaugalingon: ‘Gikinahanglan ko ba gayod kini? Kini ba dunay praktikal nga katuyoan? Igo na ba gayod ang akong nabatonan?’ Ilabinang magmabinantayon sa mga paanunsiyo nga nagpasiugda sa dungog sa pagpanag-iya. Ang mga pulong ni apostol Juan nga makaplagan sa 1 Juan 2:16 makapahinuklog: “Ang tanang butang nga anaa sa kalibotan—ang tinguha sa unod ug ang tinguha sa mga mata ug ang mapagawalong pagpasundayag sa kahinguhaan sa kinabuhi sa usa—wala magagikan sa Amahan, kundili nagagikan sa kalibotan.”

Sa Dihang Nagkinahanglan Ka Gayod sa Usa ka Butang

Komosta kon dunay usa ka butang nga gikinahanglan gayod nimo? Sa dili pa makigsulti sa imong mga ginikanan bahin niana, palandonga daan ang maong butang. Magmaandam sa pagsaysay sa tukma kon nganong gikinahanglan nimo kining butanga, unsay imong giplanohang gamit niini, ug nganong mibati kang makabenepisyo kini kanimo. Tingali ang imong mga ginikanan makakaplag ug paagi sa paglakip niana diha sa badyet sa pamilya. Apan komosta kon dili nila mahimo kana, labing menos sa pagkakaron? Tingali wala kay laing kapilian kondili magpailob. (Ecclesiastes 7:8) Kini maoy “makuyaw nga mga panahong lisod sagubangon,” ug daghang ginikanan ang dili gayod makaabot sa tanang butang nga pangayoon tingali sa ilang mga anak. (2 Timoteo 3:1) Kon likayan nimong mangayo sa imong mga ginikanan sa dili makataronganong paagi, sa pagkatinuod medyo mapasayon nimo ang ilang malisod nga tahas.

Bisan pa niana, basin makahimo ka sa unang lakang. Pananglitan, nagdawat ka ba ug alawans? Nan sulayi ang pagkat-on kon unsaon pagbadyet ang imong salapi nga mainampingon aron makadaginot ka ug bahin niana kada bulan. Basin posible pa alang kanimo ang pagdeposito sa duol nga bangko. (Itandi ang Lucas 19:23.) Mao kana ang gihimo sa usa ka batan-ong babaye nga si Abigail. Siya miingon: “Akong ibutang ang akong salapi sa duha ka lainlaing pundok—ang usa akong ideposito sa bangko ug ang lain akong gastoon.” Kon naa ka na sa hustong edad, basin sulayan pa gani nimo nga mohimog pipila ka popanahon nga trabaho o dili-bug-os-panahong trabaho.b Bisan unsay mahitabo, kon makita sa imong mga ginikanan nga gusto gayod nimong mopalit ug usa ka butang ug nga mahunahunaon ka sa pagdaginot, basin matukmod sila sa pagbayad ug bahin sa kantidad, kon posible man kana.

Ang paghimog mga kausaban sa paagi nga ikaw mamalit mahimong magdala usab kanimog kaayohan. Pananglitan, kon ang usa ka butang mahal ra kaayo, mahimong posible nga mohangyo. Kon dili mahimo, paghulat kon ibaratilyo ba ang maong butang. Panan-aw sa ubang mga tindahan aron masusi kon makakaplag ka sa samang butang sa mas kubos nga presyo. Pagkat-on sa pagsusi pag-ayo sa mga butang kon de-kalidad ba; usahay ang mga produkto nga walay marka maoy maayong paliton.c

Pagkat-on sa Pagkakontento

Ang Proverbio 27:20 nagpasidaan: “Ang Sheol ug ang dapit sa kalaglagan mismo dili matagbaw; ni ang mga mata sa tawo matagbaw.” Oo, maingon nga ang lubnganan dili matagbaw, ang ubang mga tawo kanunayng gusto ug dugang pa—bisan pag unsa na ka daghan ang ilang nabatonan. Likayi kanang hinakog nga sumbanan sa panghunahuna. Ngadtongadto, ang kadalo magpahinabo lamang ug kapakyasan ug kagul-anan. Usa ka batan-on nga ginganlag Jonathan nag-ingon: “Kon ang imong kalipay kanunayng gipasikad sa pagpanag-iyag mga butang, dili ka gayod malipay. Kanunayng dunay butang nga bag-o nga gusto nimo. Kinahanglang makakat-on ka sa pagkalipay kon unsay imong nabatonan.”

Kon kontento ka, makasagubang ka sa pagpit-os gikan sa mga isigkaingon. Ang batan-ong si Vincent miingon: “Tungod lamang kay may nakita ako nga nagsul-ob ug sapatos nga dunay marka sa iladong tigdisenyo wala magpasabot nga kinahanglang molakaw ako ug mopalit ug sapatos alang kanako.” Siyempre, matag karon ug unya, basin mahasol gihapon ka kon dili nimo mabatonan ang imong gusto. Apan ayawg kalimot nga si Jehova nahibalo sa imong mga panginahanglan. (Mateo 6:32) Ug sa dili na dugay nga umaabot, siya ‘magatagbaw sa tinguha sa matag buhing butang.’—Salmo 145:16.

[Mga footnote]

[Blurb sa panid 13]

“Moadto ka sa tunghaan nga nagsul-ob ug sinina nga walay marka sa iladong tigdisenyo, ug ang tanan magsulogsulog kanimo”

[Hulagway sa panid 14]

Mahimo kang magmalipayon bisan wala makabaton sa tanan nimong gusto