Mga Nitibong Amerikano ug ang Bibliya

SUKAD nga gisulong sa mga Uropanhon ang kayutaan sa Amerika, daghan ang misulay sa pagtudlo sa mga Nitibong Amerikano sa Bibliya.

Sukad sa ika-17ng siglo, ang tibuok Bibliya gihubad ngadto sa unom ka pinulongan sa Indian sa Amerika del Norte. Ang una mao ang Bibliya ni John Eliot, nga giimprenta sa 1663 alang sa Massachusett nga mga Indian duol sa Boston ug Roxbury, Massachusetts. Nga misulat diha sa Encyclopedia of North American Indians, si Harvey Markowitz nag-ingon: “Bisan pag daghang historyano karon ang nagduhaduha sa kasinsero sa pagsulod sa kadaghanang tigkolonisar sa [usa ka] kasabotan [sa ato pa, “sa ‘pagsibilisar’ sa ‘mga luog’ sa Bag-ong Kalibotan”], ang hugot nga pagkakomitido ni Eliot napamatud-an sa napulog-lima ka tuig nga siya naghago sa pagkat-on ug Massachusett nga pinulongan ug sa paglaraw ug paagi sa pagtitik sa mga pulong aron sa paghimog kopya sa Bibliya. Giisip ni Eliot kining maong malisod nga buluhaton ingong ‘usa ka sagrado ug balaang buluhaton, nga pagatamdon uban ang kahadlok, kamaampingon, ug dakong pagtahod.’”

Bisan pag ang mga bahin sa Bibliya gihubad ngadto sa ubang mga pinulongan sa Nitibong Amerikano, mikabat ug duha ka gatos ka tuig una pa ang sunod nga kompletong Bibliya gipatik, usa ka bersiyon sa Cree sa Kasadpan (1862) sa mga kauban sa British ug Foreign Bible Society. Ang ubang mga hubad misunod sa wala madugay: Inuit sa Sidlakang Artiko (1871); Dakota, o Sioux sa Sidlakan (1880); ug Gwich’in, pinulongan sa sikbit-artikong Amerika (1898).

Ang kinabag-ohan nga kompletong Bibliya mao ang hubad nga Navajo, gipatik sa 1985 human sa 41 ka tuig nga pagpangandam ug pagtambayayong tali sa duha ka sosyedad sa Bibliya. Ang mga bahin sa Hebreo ug Gregong Kasulatan naglungtad na karon sa labing menos 46 ka pinulongan sa Indian.

Kinsay Nanguna?

Si Markowitz miingon: “Makahuloganon . . . nga ang buluhaton sa paghubad sa Bibliya sa dakong bahin maoy kanunayng panlimbasog sa Protestante.” Ang mao gihapong magsusulat nagpadayon sa pag-ingon nga una pa sa Ikaduhang Konseho sa Batikano (1962), ang Iglesya Katolika “wala magdasig sa pag-apod-apod sa mga Bibliya taliwala sa mga membro, nga nagtuong ang mga layko kulang ug hustong . . . pagbansay aron makabaton ug tul-id nga mga pagbadbad sa biblikanhong mga teksto.”

Nagkadaiyang mga sosyedad sa Bibliya ang nalangkit karon sa labing menos 20 ka proyekto alang sa paghubad ngadto sa mga pinulongan sa mga Nitibong Amerikano sa Amerika del Norte, apil ang Cheyenne, Havasupai, Micmac, ug Zuni. Usa ka bag-ong bersiyon sa Gregong Kasulatan ang ginaandam alang sa Navajo nga katawhan. Ang ubang mga hubad ginaandam alang sa mga Indian sa Sentral Amerika ug Amerika del Sur.

Ang mga Saksi ni Jehova dili kaanib sa bisan unsang Protestanteng mga organisasyon. Hinunoa, sila aktibo taliwala sa tanang Nitibong Amerikano, ug ingong resulta, daghang Nitibong Amerikano ang nagasanong sa mga kamatuoran sa Bibliya mahitungod sa “bag-ong mga langit ug usa ka bag-ong yuta,” diin magpuyo ang pagkamatarong. (2 Pedro 3:13) Ang mga Saksi naggamit sa mga Bibliya nga mabatonan karon diha sa nitibong mga pinulongan sa kayutaan sa Amerika. Naggamit usab sila ug mga literatura sa Bibliya nga gihubad sa Watch Tower Society diha sa ubay-ubayng pinulongan sa Nitibong Amerikano, lakip ang Aymara, Cree, Dakota, Guarani, Inuktitut, Iroquois, Navajo, Quechua, ug siyam pa ka ubang mga pinulongan.—Tan-awa ang Pagmata! sa Septiyembre 8, 1996.

[Hulagway sa panid 25]

Ang “Jehova” mabasa diha sa Navajo nga Bibliya sa Salmo 68:4