Sa Dihang ang Tanang Depekto Mahanaw Na
USA ka babaye nga naparalisis ang upat ka kasway kas-a miingon nga kadaghanang tawo duna lamay “temporaryong kahimsog sa lawas.” Pagkatinuod niana, kay sa madugay o madali, ang mga apan motungha diha kanatong tanan! Busa, dunay nagatubong panginahanglan alang sa mga antiyohos, mga contact lens, mga pustiso, mga hearing aid, elektronik nga mga pacemaker, ug mga artipisyal nga tuhod. Sumala sa giingon sa Roma 8:22, “ang tanang kalalangan padayong nagaagulo nga tingob ug tingob nga anaa sa kasakit hangtod karon.”
Busa, kitang tanan mahupayan sa saad sa Diyos nga ipasig-uli ang masinugtanong mga tawo ngadto sa hingpit nga panglawas diha sa usa ka matarong nga “bag-ong yuta.” (2 Pedro 3:13; Pinadayag 21:3, 4) Nag-ingon ang Isaias 35:5, 6: “Nianang panahona ang mga mata sa mga buta mangabuka, ug ang mga igdulungog sa mga bungol makadungog. . . . Ang piang mokatkat sama sa lagsaw, ug ang dila sa amang mosinggit sa kalipay.”
Ang Bibliya nagtagna nga ang “usa ka dakong panon” makalabang-buhi sa kalaglagan niining presenteng daotang sistema. (Pinadayag 7:9, 14; Salmo 37:10, 11, 29) Walay duhaduha human nianang maong kalaglagan, kadtong dunay grabeng mga depekto ug mga sakit makasinati ug dihadihang pagkaayo sa ilang mga depekto ug sakit! (Isaias 33:24) Ingong pasiuna sa pagpang-ayo nga mahitabo sa bag-ong yuta sa Diyos, si Jesus mihimog susamang mga pagpanambal sa dinhi pa siya sa yuta. (Itandi ang Marcos 5:25-29; 7:33-35.) Ang usa halos dili gani makahubit sa hilabihang kasadya nga bation sa mga tawo ug sa mga luha sa kalipay nga moagas unya samtang ang mga pungkol maglabay sa ilang artipisyal nga mga kasway, mga kratses, ug mga wheelchair! Sanglit himsog na ug lawas, makaabaga na unya sila sa ilang hinatag-Diyos nga asaynment sa pagtabang sa paghimo sa yuta nga usa ka paraisong puy-anan.—Lucas 23:43.
Kasamtangan, ang dunay mga depekto karon kinahanglan gihapong makigbisog sa ilang mga limitasyon. Si Nelson, usa ka tawong dunay depekto sa Canada, nag-ingon: “Sa dihang magsugod ako sa pagkaluoy sa akong kaugalingon, akong hunahunaon ang mga pulong ni Jesus sa Mateo 24:13: ‘Siya nga nakalahutay hangtod sa kataposan mao ang maluwas.’” Bisan pa sa ilang mga limitasyon, ang mga tawong dunay depekto mahimong kompleto ug himsog sa labing hinungdanong paagi—sa espirituwal—pinaagi sa paglahutay diha sa Kristohanong pagtuo.—Santiago 1:3, 4.
Ang mga Saksi ni Jehova nakatabang sa minilyon sa pagsagop niining pagtuoha. Si Dell, usa ka tawong dunay depekto nga gikutlo sa miaging artikulo, nag-ingon: “Halos dili nako ikapahayag ang akong gibati sa dihang akong nahibaloan nga ang mga depekto sa lawas nga sama sa akoa maoy temporaryo lamang gayod.” Oo, napalig-on sa maong paglaom, si Dell—ug daghang uban pa nga sama kaniya—halos dili matawag nga baldado.
[Hulagway sa panid 10]
Ang mga makalabang-buhi sa umaabot nga kalaglagan makapahimulos ug milagrosong pagkaayo sa ilang mga sakit ug mga depekto