Hupti ang Timbang nga Panglantaw sa Musika

ANG industriya sa musika karon maoy multibilyong-dolyar nga negosyo. Ang popular nga mga musikero ug ang ilang mga tigpasiugda nakasapig dako kaayo. Bisan pa niana, usa ka kamatuoran nga ang kawalay-kalipay, ahat nga kamatayon, ug paghikog maoy dayag diha sa kinabuhi sa pipila ka malamposon kaayong mga musikero. Ug gipasundayag sa makadaghan nga ang pipila ka musika makadaot sa moral, emosyonal, ug espirituwal nga kahimtang ug mahimong motultol sa mapintas, batok-katilingbang panggawi.

Bisan pa niana, kinahanglang mabatonan nato ang timbang nga panglantaw sa musika. Bisan tuod adunay daghang imoral ug makadaot niining matanga sa arte, ang pipila ka musika makapatugob sa kinabuhi sa usa ug magpahinabog usa ka sukod sa kangaya ug katagbaw. Kini makapausbaw kanato sa emosyonal ug espirituwal nga paagi. Tagda ang pipila lamang ka pananglitan.

Ang 150 ka salmo sa Bibliya maoy mga obra maestra sa literatura—lirikong mga balak, sagradong mga awit, ug mga pag-ampo. Karon kini ginabasa nga may kahimuot diha sa gatosan ka pinulongan. Bisan pa niana, ang karaang mga Hebreohanon wala lamang magbasa sa mga salmo; sila nag-awit niana. Subsob gibuhat nila kini uban ang matahom nga duyog sa musika—usa ka gamhanang paagi sa paglangkit sa kaalam sa ilang Diyos, si Jehova, sumala sa gipahayag sa mga pulong, uban sa emosyon nga ikapasa sa nabansayng mga mag-aawit ngadto sa mga mamiminaw. Inay kay paninugdan kaayo o kinaraan pa gani, ang kalidad ug estilo sa Hebreohanong musika dayag nga mas hamili kay nianang sa palibot nga mga nasod sa maong panahon.

Sa ulahi, ang mga Kristohanon sa unang siglo nag-awit ug mga salmo ug ubang sagradong mga awit sa pagdayeg sa Diyos ug sa pagdalag kahupayan sa napit-osang emosyon. Busa ang musika nakapatugob sa ilang kinabuhi. Ug pinaagi sa pag-awit sa pinasukad-sa-Bibliya nga mga awit, ilang gitisok nga mas lalom pa diha sa ilang kasingkasing ang kahibalo sa Diyos, nga ilang gikinahanglan sa paggiya sa ilang kinabuhi.—Mateo 26:30; Buhat 16:25.

Ang karaang mga Grego nagtuo nga ang musika nag-ugmad sa tawhanong personalidad ug naghimo sa lalaki ug babaye nga mas bug-os. Niining ika-20ng siglong kalibotan, nga nagpasiugda sa edukasyon diha sa siyensiya, ekonomiya, ug lohika, ang pag-ugmad sa emosyonal nga bahin sa personalidad pinaagi sa belyas artes subsob nga napasagdan.

Pagpabiling Timbang

Ang pagpamati sa usa ka maayong musika mahimong mapuslanon ug makapahimuot nga kasinatian. Bisan pa niana, ang usa ka tawo makabaton pa gani ug dugang kalipay pinaagi sa pagtugtog ug instrumento sa musika o pag-awit uban sa usa ka grupo sa mga higala. Ang kahibalo bahin sa musika mahimong magbukas ug dakong natad sa tinuod nga kalipay.

Siyempre, sama sa ubang maanindot nga mga butang sa kinabuhi, dunay panginahanglan sa pagkamakasaranganon, maayong panghukom, ug pagkamapilion niining bahina sa lulinghayaw. Kini tinuod dili lamang sa matang sa musika nga gipili kondili usab sa gitas-on sa panahon nga gigugol sa pagpamati o pagpatokar sa musika.

Kon ang usa ka matang sa musika nagsugod sa pag-apektar sa imong emosyon, mga lihok, ug relasyon sa negatibong paagi, nan pilia ang laing estilo. Panalipdi ang imong mga igdulungog aron mapanalipdan ang imong emosyon aron mapanalipdan ang imong kasingkasing ug hunahuna!

Tinuod kini ilabina maylabot sa mga liriko. Mahimong magsugod kini sa pag-umol kanimo sumala sa kagustohan niadtong dili nimo pareho ug panglantaw bahin sa kinabuhi ug moralidad, nga magpasiugda hinuon ug dili-diyosnon, imoral nga mga estilo sa kinabuhi. Sa pipila ka kahimtang bisan ang ulohan sa usa ka awit makapalihok sa sayop nga matang sa pagbati.

Ang Pulong sa Diyos, ang Bibliya, nagtambag niadtong kinsa magpahimuot kaniya nga “ipresentar ang [ilang] mga lawas nga usa ka halad nga buhi, balaan, dalawaton sa Diyos, usa ka sagradong pag-alagad uban sa [ilang] gahom sa pagpangatarongan.” (Roma 12:1) Dayag, ang atong emosyon maoy bahin nianang ‘buhi nga halad.’ Busa kon makaplagan man gani nato nga pinaagi sa gahom sa musika, ang atong emosyon nagsugod sa paglubog sa atong hinungdanong panghukom ug pangatarongan ug sayop nga magtumong sa atong mga lihok, nan panahon na sa pag-usab sa atong mga batasan sa pagpamati sa musika. Hinumdomi: Ang gahom sa musika makaapektar sa imong kasingkasing ug sa imong hunahuna—sa maayo o kaha sa daotan nga paagi!

[Kahon/Hulagway sa panid 10]

Pagpauswag sa Katakos sa Pagkat-on

“Ang panukiduki nagpakita nga ang regular nga pagpamati ug mananoy nga musika makapauswag sa katakos sa pagkat-on sa usa ka bata. Apan sa daghang panimalay, wala gayod silay madungog nga ingon niana.”—Audio, Marso 1999.