Layo ba sa Peligro ang Imong Balay?—20 ka Butang nga Pagasusihon

“NAKAABOT na gayod kita sa balay!” Tingali makaginhawa ka ug luag inig-abot nimo gikan sa okupadong adlaw sa trabaho, malipayon nga miabot nga walay kabilinggan ug luwas diha sa balay. Apan tinuod ba gayod nga layo ka sa peligro? Sa kabaliskaran, ang ubang mga tawo nagaatubang ug grabeng mga kapeligrohan sa balay nga tingali sila wala makaamgo. Ilabina kadtong dunay gagmayng kabataan ang angayng maghatag ug mahunahunaong mga panagana aron mamenosan ang daghang aksidente diha sa balay. Pinaagi sa paggamit sa mosunod nga listahan, nganong dili susihon ang imong balay ug ilista ang bisan unsang mga kausaban nga kinahanglang himoon?

✔ Mga tanom. Kon duna kay gagmayng mga bata, paneguroa nga walay usa sa imong mga tanom ang makahilo. Hinumdomi, ang mausisaong mga batang gagmay mohungit ug bisan unsa sa ilang baba.

✔ Mga kortina. Ipataas ang mga pisi sa kortina nga dili maabot. Kini makasabod—ug makatuok pa—sa gagmayng mga bata.

✔ Mga hunos ug mga aparador. Hunahunaa ang pagtaod ug mga siradora. Makasanta kini sa mga bata sa paghikap ug hait nga mga gamit ug peligrosong mga produkto sa paghinlo.

✔ Hagdanan. Hayag ba kini ug walay mga balabag? Nakainstalar ka na ba ug mga ali aron dili mahulog ang gagmayng kabataan?

✔ Lutoanan. Ang kaptanan sa mga kaldero ug kalaha iliso palikod sa lutoan, ilabina samtang nagluto.

✔ Broiler. Limpiyohi kini kanunay. Ang mantikaon nga broiler pan makapahinabog sunog sa kosina.

✔ Fire extinguisher. Pagbaton ug labing menos usa diha sa balay, ug paneguroa nga ang tanan nga anaa sa hustong edad mahibalo sa paggamit niini.

✔ Mga kuna. Ang mga balabag kinahanglang dug-ol. Ang luna libot sa kutson kinahanglang dili dako nga mapaigo ang ulo sa masuso.

✔ Mga bentana. Ang mga balabag mopanalipod sa mga bata gikan sa pagkahulog ug daling matangtang sa usa ka hamtong engkaso dunay sunog.

✔ Mga bitamina ug mga medisina. Ibutang kini sa kinandadohan nga kabinet o sa dapit nga dili maabot sa mga bata.

✔ Bathtub. Ayaw gayod ibilin ang gamayng bata diha sa tub nga walay magbantay. Gamayng panahon—ug gamayng tubig—makalumos na sa bata.

✔ Mga microwave. Hinumdomi nga ang pagkaon daling moinit diha sa microwave. Ang gatas sa bata, pananglitan, makapaso bisag dili pa kaayo init ang botelya.

✔ Dapogan sa pagpainit sa balay. Ipatan-aw kanunay ang imong dapogan kon duna bay mga paghungaw sa carbon monoxide.

✔ Mga parilya. Paneguroa nga ang mga bata layo gikan sa parilya kon kini init pa.

✔ Pultahan sa garahe. Instruksiyoni ang mga bata nga dili modagan ilalom sa pultahan sa garahe samtang kini nagkanaog, ilabina kon kini dekoryente.

✔ Mga detektor sa aso. Hupti kining hinlo kanunay, ug susiha kini sa regular. Ilisi kinig baterya kada tuig.

✔ Mga kord sa koryente ug mga pansakanan. Ilabay ang daot nang mga kord sa koryente. Labing maayo kon ang wala gamitang mga pansakanan dunay mga tabon o mga suksok.

✔ Kasangkapan nga dekoryente. Ipalayo ang mga kasangkapan gikan sa kaligoanan o sa lababo. Ang gikonektar sa yuta nga awtomatik nga plangka makasanta sa pagkakoryente.

✔ Mga kaban sa dulaan. Butangi ang kaban sa dulaan ug usa o daghan pang mga lungag aron makalusot ang hangin ug mga bisagra aron dili kalit nga mosira ang tabon.

✔ Plansa. Hiposa ang imong plansa—apil ang nagbitaybitayng kord niini—nga dili maabot sa mga bata.