“Ang Labing Malipayong Adlaw sa Among Kinabuhi”
ANG kasal maoy usa ka sadyang okasyon. Nag-ingon ang daghang magtiayon: “Kadto ang labing malipayong adlaw sa among kinabuhi.” Apan kini usab mahimong usa sa labing hago. Mahimong hilabihan ang kapit-osan ug kakapoy nga masinati sa kaslonong babaye ug lalaki ug ilang mga pamilya tungod sa tanang desisyon ug pagpangandam nga gikinahanglan, ug sa daghang tawong mahibalag sa kaslonong babaye ug lalaki sa maong adlaw.
Ang kasal magtimaan sa sinugdanan sa bag-ong kinabuhi alang sa parisan. Apan dili lamang sila ang apektado. Sanglit ang pagkaminyo sa anak babaye, anak lalaki, igsoong babaye, o igsoong lalaki sagad nagkahulogan nga ang usa ka minahal magtukod ug lain nga panimalay, sagad masinati sa pamilya ang nagkadaiyang mga pagbati.
Ang mga kostumbre sa kasal sa nagkalainlaing mga nasod magkalain, ug dili mahisgotan dinhi ang tanan. Hisgotan lamang niining mga artikuloha kon unsay naandan sa Kasadpanhon ug susamang mga nasod. Nianang dapita, mahimong gastoso kaayo ang pagpakasal. Ang pipila mogastog dakong salapi sa adlaw sa kasal, lakip ang pag-abang sa hawanan o restawran alang sa salosalo ug sa pagpaluto ug pagsilbi sa pagkaon. Gibanabana nga sa Italya ang aberids nga gastos sa kasal maoy kapig $10,000. Sa Hapon, sama sa ubang mga dapit, ang kantidad basin mas dako pa. Ang kaslonong babaye ug lalaki kasagaran dili mao ang moabaga sa gastos. Ilang mga ginikanan ang moabaga.
Ang mga kasal maoy negosyo nga dakog ganansiya. Ang daghang kompaniya mopasiugda sa ideya sa “hingpit” nga kasal, diin walay nakulang. Kon buot sabton, sila magpasabot, “kini ang labing malipayong adlaw sa imong kinabuhi!” Busa ilang itanyag ang daghang produkto ug mga serbisyo nga “kinahanglanon” aron mahimong “hingpit” ang imong dakong adlaw. Anaa tingali ang gihimong personal nga mga imbitasyon, imong “gipangandoy” nga boda, mga besti sa mga abay nga babaye, ug mga tuxedo o susamang mga terno alang sa mga abay nga lalaki. Unya, anaa usab ang mga bulak, maluhong mga kotse, tingali restawran diin ang salosalo isilbi, letratista, banda, ug ubang mga butang. Ang listahan sa tanan nga gusto tingali sa kaslonong babaye ug lalaki, ingon man ang nag-ubang listahan sa mga galastohan, makapabalisa sa daghang amahan.
Sa nagkadaiyang mga katilingban ang pagsunod sa tradisyon gipabilhan pag-ayo. Adunay naandang paagi diin ang bug-os nga serye sa kalihokan pagahimoon, ug gidahom nga sundon sa mga kaslonon. Oo, adunay daghang butang nga hinumdoman, apan mubo lamang ang panahon sa pag-organisar nianang tanan.
Makapahinam o makapaluya nga palaaboton? Bisan kon unsay imong tubag, ang pagpalandong sa tanan nga mahimong nalangkit sa usa ka kasal mopatunghag daghang pangutana. Unsay ipasabot sa pagpakasal karong mga adlawa? Gikinahanglan ba gayod kining tanan aron makasal “sa hustong paagi”? Sa unsang paagi mabuntog ang nagkalainlaing praktikal ug emosyonal nga mga suliran?
Bisan pa sa tanang kapit-osan, daghan ang malamposong nagplano sa mga detalye sa kasal ug nagkalipay sa maong okasyon. Ang ilang mga kasinatian basin makatabang sa uban nga nagapangandam sa pagsagubang sa samang okasyon. Gawas pa, adunay mga prinsipyo sa Bibliya nga makatabang sa dihang ginahimo ang mga plano sa kasal, aron ang maong adlaw mosangpot nga kahimut-anan, malipayon, ug makapalig-on alang sa tanan.