Usa Ako ka Mausikong Anak Kanhi

Sumala sa giasoy ni Meros William Sunday

Ako gitudloan sa paghigugma sa Diyos sukad pa sa pagkamasuso; apan pag-edad nakog 18 anyos, ako mirebelde ug mibiya sa balay. Sulod sa 13 ka tuig ako nagkinabuhi sama sa mausikong anak sa sambingay ni Jesus. (Lucas 15:11-24) Ako nahimong tigbaligya ug droga ug hapit nadaot ang akong kinabuhi. Paasoya ko kon unsay nakapabag-o sa akong kinabuhi ug kon unsay nakaingon sa akong pagbalik.

AKO natawo niadtong 1956 sa Kristohanong mga ginikanan, ang ikaduha sa siyam ka anak. Kami nagpuyo sa Ilesha, usa ka lungsod sa habagatan-kasadpang Nigeria. Ang akong Papa nagdako nga Katoliko, apan sa 1945 gihatagan siya sa iyang uyoan ug libro nga The Harp of God.a Human mabasa kini, gipangita ni Papa ang mga Saksi ni Jehova. Sa 1946 siya nabawtismohan, mao man usab si Mama dili dugay human niana.

Nahinumdom ko nga sa bata pa ko lawom kaayo ang akong pagtuo kang Jehova ug masiboton kaayo ko sa pagsangyaw uban sa akong mga ginikanan. Gitun-an ko ni Papa sa Bibliya. Panagsa, tun-an sab ko ni Alice Obarah, kansang bana maoy nagapanawng magtatan-aw sa among lugar. Gusto sa akong mga ginikanan nga mahimo kong bug-os-panahong ministro. Apan, misugyot si Mama nga moeskuyla usa ko sa hayskul.

Apan, pagsugod nakog tungha sa edad nga 16 anyos, ako dili-maalamong nakighigala sa mga isigka-estudyante nga walay pagtahod sa mga prinsipyo sa Bibliya. Pagkadakong sayop kadto! Wala madugay, ako nagsugod sa pagpanigarilyo ug sa pagkinabuhi nga imoral. Ako nakaamgo nga ang akong bag-ong estilo sa kinabuhi dili uyon sa gitudlo kanako diha sa Kristohanong mga tigom, busa miundang ko sa pagtambong sa mga tigom ug sa pagpakigbahin sa balay-balay nga ministeryo. Naguol pag-ayo ang akong mga ginikanan, apan wala na nako tagda ang pagbati sa uban.

Ako Mibiya sa Balay

Human sa duha lamang ka tuig sa hayskul, ako mibiya sa among balay ug mipuyo sa balay sa akong mga higala diha sa kasilinganan. Usahay moyuhot ko pagsulod sa balay, dad-on ang bisan unsang pagkaon nga akong madala, ug dayon mobiya. Sa kaguol, wala na bayri ni Papa ang akong mga balayranan sa eskuylahan, nga naglaom nga magbag-o ko.

Apan niadtong higayona usab, nahimo kong eskolar. Ipadala sa akong esponsor gikan sa Scotland ang bayad sa eskuylahan ug usahay padad-an usab akog mga gasa nga patabanan ug kuwarta. Sa kasamtangan, duha sa akong mga igsoon ang miundang usab sa pagpakig-uban sa mga Saksi ni Jehova, nga nakahatag ug grabeng kaguol ngadto sa akong mga ginikanan. Makadaghang higayon nga mihangyo kanako si Mama nga maghilak. Bisag kadto nakapaguol kanako, wala gihapon ko magbag-o.

Sa Dagkong Siyudad

Human migraduwar sa hayskul niadtong 1977, miadto ko sa Lagos ug nakatrabaho didto. Wala madugay human niana, nakakuwarta ko sa ilegal nga paagi ug nakapalit kog taksi. Kay daghan na kog kuwarta niadtong panahona, misugod ko paggamit ug droga ug magsige kog sulod sa mga naytklab ug mga pampaman. Wala madugay, gilaayan ko sa akong kinabuhi sa Lagos, ug niadtong 1981, mibalhin ko sa London. Gikan didto miadto ko sa Belgium, diin nagtuon kog Pranses ug mitrabaho nga partaym sa usa ka restawran. Apan, ang dakong bahin sa akong panahon akong gigugol sa pagpadalag mga sakyanan ug elektronikong mga himan ngadto sa Nigeria.

Si Papa misulat sa sangang buhatan sa mga Saksi ni Jehova sa Belgium ug mihangyo nga kontakon ko ug paningkamotan nga matun-an ko sa Bibliya. Apan sa matag higayon nga moduaw ang mga Saksi sa akong balay, ako silang balibaran. Ako misugod pagtambong sa simbahan diin kami mokaon, mag-inom, ug magdulag lainlaing mga dula human sa relihiyosong seremonyas.

Kinabuhi Ingong Tigbaligya ug Droga

Sa 1982, akong gipadala sa barko ang usa ka maluhong kotse ngadto sa Nigeria ug akoy nangunay sa piyer aron akong maseguro nga kini makalusot sa aduwana. Nadiskobrehan sa Aduwana sa Nigeria nga gipalsipikar ang dokumento sa buhis, busa ako gipriso sulod sa 40 ka adlaw. Gipiyansahan ako ni Papa aron makagawas. Kay nagkinahanglan kog kuwarta aron modaog sa kaso, mibalik ko sa Belgium nga nagdalag mga produkto, lakip ang pipila ka kilo sa marijuana. Human ko maabsuwelto sa pagpalsipikar sa dokumento sa buhis, misulod ko sa negosyo sa droga.

Sa usa ka biyahe, ako gidakop sa Netherlands. Ang mga opisyales sa imigrasyon nagdeport kanako, nga nagpasakay kanako sa ayroplano nga mibiyahe paingon sa Nigeria. Sa maong biyahe, nakahimamat kog laing mga tigbaligyag droga, ug nakigsosyo ko nila. Sa Enero 1984, mibalhin ko sa laing nasod sa Aprika. Kay makasulti man kog Pranses, ang pinulongan nga gigamit didto, dali ra kong nakaamigog mga polis, sundalo, ug mga opisyales sa imigrasyon. Busa among napayuhot ang linibo ka kilong marijuana nianang nasora.

Gidakop ug Gibilanggo

Dayon nasugamak na usab ako sa dakong problema. Nakigsabot ko sa usa ka kapitan sa kasundalohan nga tabangan ko sa pagpalusot ug droga sa erport sa maong nasod. Apan naulahi siya pag-abot mao nga nadakpan ko. Gikulata ug gipaantos kog maayo sa mga polis nga nawad-an kog panimuot. Gidala ko nila sa ospital ug gibiyaan nila ako didto kay nagdahom nga mamatay na ko. Apan nabuhi ko ug sa ulahi ako gikasohan, gisentensiyahan, ug gipriso.

Sa nakagawas ko sa prisohan, ang akong higala nga maoy akong gipabantay sa akong balay nagbaligya na diay sa tanan nakong kabtangan ug wala na magpakita. Aron makakuwarta, gisugdan nako pagbaligyag marijuana. Apan, napulo ka adlaw sa ulahi ako nadakpan na usab ug napriso sulod sa tulo ka bulan. Sa gibuhian ko, nasakit kog grabe nga hapit na usab akong mamatay. Apan, nakauli ra ko sa Lagos.

Mibalik sa Akong “Negosyo”

Sa Lagos, akong nahimamat ang pipila sa akong mga kasosyo, ug kami mipaingon sa India, diin kami mipalit ug heroina nga nagkantidad ug $600,000. Gikan sa Bombay (karon Mumbai) kami mibiyahe paingon sa Switzerland, dayon sa Portugal, ug sa kataposan sa Espanya. Nakakuwarta mig dako ug mibalik mi sa Lagos agi sa lainlaing rota. Sa hinapos sa 1984, ako miangkat na usab ug droga ug gibaligya kini. Pangandoy nako nga makatigom ug usa ka milyong dolyar ug dayon mopuyo sa Tinipong Bansa.

Sa 1986, gigasto nako ang tanan nakong kuwarta sa pagpalit ug puro nga heroina sa Lagos. Akong gidala kini sa laing nasod, apan nahiadto kini sa usa ka hakog nga tigbaligyag droga ug wala ko niya bayri. Kay nahadlok nga basin patyon ko, mibalik ako sa Lagos nga nagpakahilom na lang sa nahitabo. Ako nahugno, sa pinansiyal ug emosyonal. Sa unang higayon, akong gihinuktokan ang katuyoan sa kinabuhi. Akong gisukna ang akong kaugalingon, ‘Nganong nakasinati man ako niini nga mga kalisdanan?’

Pagbalik Ngadto sa Diyos

Usa ka gabii wala madugay human niana, miampo ko kang Jehova nga tabangan ko. Dayon, pagkabuntag nanuktok sa pultahan ang usa ka tigulang nga lalaki ug ang iyang asawa. Sila mga Saksi ni Jehova. Namati kog maayo ug midawat kog magasin. “Saksi sab ang akong mga ginikanan,” ako misaysay. “Si Alice Obarah nagtuon usab kanako sa Bibliya kaniadto.”

Ang tigulang nga lalaki, si P. K. Ogbanefe, mitubag: “Nakaila kaayo mi sa mga Obarah. Nag-alagad na sila karon sa sangang buhatan sa Nigeria sa Lagos.” Ila kong giawhag nga makigkita sa mga Obarah. Nadasig ko sa dihang nakigkita ko nila. Human niana, gitun-an ko ni Brader Ogbanefe sa Bibliya, ug sa wala madugay akong giusab ang akong daotang pagkinabuhi. Dili kini sayon kay ang dugay nga paggamit ug droga lisod buntogon. Bisan pa niana, ako determinado nga hinloan ang akong kinabuhi.

Apan, dihay daghan kaayong tentasyon ug pagpit-os! Ang mga higala konohay nako moadto sa balay nga magdalag makapahaylong mga tanyag. Dihay panahon nga mibalik ko sa pagpanigarilyo ug sa imoral nga buhat. Akong gisulti ang akong gibati ngadto sa Diyos diha sa pag-ampo. Wala madugay ako nakahunahuna nga niadtong panahona dili ko matabangan sa akong mga higala kay silay nakaingon nga nahisalaag ko. Akong naamgohan nga kinahanglan kong mobiya sa Lagos aron mouswag sa espirituwal. Apan maulaw kong mobalik sa Ilesha. Apan, sa ngadtongadto ako misulat sa akong Papa ug sa akong magulang nga lalaki ug mihangyo nga mopauli ko sa balay.

Gipasaligan ko ni Papa nga ila kong dawaton, ug giingnan ko sa akong igsoon nga tabangan ko niya sa pinansiyal. Busa napulo ka tuig human nako biyai ang akong mga ginikanan, ako mibalik. Mainiton nila akong gidawat. Nakaingon si Mama: “Salamat, Jehova!” Sa dihang miabot si Papa pagkagabii, siya miingon, “Si Jehova motabang kanimo.” Uban sa tibuok pamilya, siya miampo kang Jehova, nga naghangyo Kaniya nga tabangan ko karon nga mibalik na ko aron buhaton ang Iyang kabubut-on.

Paghulip sa Panahong Nausik

Akong gipadayon ang pagtuon sa Bibliya ug kusog ang akong pag-uswag; ako nabawtismohan niadtong Abril 24, 1988. Dayon, nahimo kong aktibo kaayo sa ministeryo. Sa Nobyembre 1, 1989, nagsugod ko pag-alagad ingong payunir—usa ka bug-os-panahong ebanghelisador. Sa 1995, ako gidapit sa pagtambong sa ikanapulo nga klase sa Tunghaan sa Ministeryal nga Pagbansay sa Nigeria. Dayon, sa Hulyo 1998, ako gitudlo ingong nagapanawng magtatan-aw nga nagduaw sa mga kongregasyon sa mga Saksi ni Jehova. Usa ka tuig sa ulahi, ako gipanalanginan ug usa ka asawa ug kauban sa nagapanawng buluhaton, si Ruth.

Ang ubang mga membro sa akong pamilya miuswag usab sa espirituwal. Usa sa akong mga igsoong lalaki, nga miundang usab sa pag-alagad kang Jehova, mibalik sa matuod nga pagsimba ug nabawtismohan. Nalipay ko nga nasaksihan ni Papa ang among pagbalik. Siya malipayong nag-alagad ingong ministeryal nga alagad hangtod sa iyang kamatayon sa 1993 sa edad nga 75 anyos. Si Mama padayong nag-alagad kang Jehova nga masiboton sa Ilesha.

Tanantanan, ako nakapanawg 16 ka kanasoran sa Uropa, Asia, ug Aprika sa pagpangitag bahandi. Ingong resulta, akong gitusaktusak ang akong kaugalingon ug daghang kasakitan. (1 Timoteo 6:9, 10) Sa dihang mahinumdom ko sa nangagi, magbasol kaayo ko kay akong giusikan ang dakong bahin sa akong kinabuhi diha sa droga ug imoralidad. Gibasolan nako ang kasakit nga akong gipahinabo kang Jehova ug sa akong pamilya. Apan, ako mapasalamaton nga ako nakaamgo niana. Ako determinado nga magpabiling maunongon kang Jehova ug mag-alagad kaniya sa walay kataposan.

[Footnote]

[Hulagway sa panid 13]

Ingong rebelyosong tin-edyer

[Hulagway sa panid 15]

Sa adlaw sa akong bawtismo

[Hulagway sa panid 15]

Uban sa akong asawa, si Ruth