Ang Hunahuna sa Bibliya
Daotan ba ang Pag-inom ug Makahubog nga mga Ilimnon?
“ANG bino mabiaybiayon, ang makahubog nga ilimnon sabaan, ug ang matag usa nga mapahisalaag niini dili maalamon.” Kining tekstoha nga makita sa Proverbio 20:1, nagpaila ba nga daotan ang pag-inom ug makahubog nga mga ilimnon? Mao kanay hunahuna sa uban. Dugang pa, sila mopunting sa mga asoy sa Bibliya diin adunay daotang mga buhat tungod sa sobrang pag-inom ug makahubog nga mga ilimnon.—Genesis 9:20-25.
Anaa usab ang grabeng mga problema tungod sa sobrang pag-inom ug makahubog nga mga ilimnon—mga sakit nga sama sa cirrhosis sa atay, makapasubong mga aksidente, kalisod sa panalapi, pisikal, seksuwal, emosyonal nga pag-abuso sa pamilya, ug pagkadaot sa gisabak. Tingali tungod sa maong grabeng mga sangpotanan, “daghang relihiyon ang nagtudlo nga ang pag-inom ug makahubog nga mga ilimnon maoy daotan,” nag-ingon ang The World Book Encyclopedia. Apan, daotan ba ang pag-inom ug makahubog nga mga ilimnon? Gidili ba sa Bibliya ang pag-inom sa tanang matang sa makahubog nga mga ilimnon, bisag gamay lang?
Unsay Giingon sa Bibliya?
Ang Bibliya nagpasidaan gayod bahin sa daotang mga sangpotanan sa pagpatuyag inom ug makahubog nga mga ilimnon. Ang Efeso 5:18 nagtambag: “Ayaw kamo pagkahubog sa bino, nga niini adunay unodnong pagpatuyang.” Dugang pa, ang Proverbio 23:20, 21 nag-ingon: “Ayaw pagpakig-uban sa mga labihan ka hinginom ug bino, taliwala sa mga ulitan nga tigkaon ug unod. Kay ang palahubog ug ang ulitan modangat sa kakabos.” Ug ang Isaias 5:11 nagkanayon: “Alaot kadtong mobangon ug sayo sa buntag aron mangita lamang sila ug makahubog nga ilimnon, nga magpabilin hangtod sa lawom nga kagabhion mao nga ang bino magapainit kanila!”
Ang Bibliya naghisgot usab bahin sa kalipay ug mga kaayohan sa kasarangang pag-inom. Pananglitan, ang Salmo 104:15 nag-ingon nga ang usa sa mga gasa sa Diyos mao ang “bino nga makapalipay sa kasingkasing sa may-kamatayong tawo.” Ug ang balos sa maayong mga buhat, matod sa Ecclesiastes 9:7, mao ang ‘pagkaon sa imong pagkaon uban ang pagmaya ug ang pag-inom sa imong bino uban ang usa ka maayong kasingkasing.’ Kay nahibalo sa medisinal nga kaayohan sa pag-inom ug bino, giingnan ni Pablo si Timoteo sa dili na “pag-inom ug tubig, kondili pag-inom ug diyutayng bino alang sa imong tiyan ug sa subsob nimong pagkasakit.” (1 Timoteo 5:23) Ang katakos sa bino sa pagtabang sa usa ka tawo aron maagwanta ang kaguol gihisgotan sa Bibliya.—Proverbio 31:6, 7.
Dayag nga ang Bibliya wala magdili sa pag-inom ug makahubog nga mga ilimnon. Ang gisaway hinuon niini mao ang sobrang pag-inom ug ang paghuboghubog. Busa, gitambagan ni Pablo ang Kristohanong mga magtatan-aw, ministeryal nga mga alagad, ug ang edarang mga babaye nga kinahanglang dili mag-inom ug “daghang bino,” ug iyang gitambagan si Timoteo sa pag-inom lamang ug “diyutayng bino.” (1 Timoteo 3:2, 3, 8; Tito 2:2, 3) Ang tanang Kristohanon gipahinumdoman nga ang “mga palahubog” dili “makapanunod sa gingharian sa Diyos.”—1 Corinto 6:9, 10.
Angayng matikdan nga ang Bibliya naglangkit sa paghuboghubog sa pagkaulitan, nga nagtambag nga kining duha angayng likayan. (Deuteronomio 21:20) Kon ang maong tambag nagkahulogan pa nga dili na gayod kita angayng moinom ug makahubog nga ilimnon, dili ba nagpasabot usab kini nga daotan usab ang pagkaon ug kalan-on, bisag gamay lang? Sa pagkatinuod, ang paghinobra hangtod nga mahubog ug ang pagkaulitan maoy giingon sa Bibliya nga daotan—dili ang kasarangang pagkaon ug pag-inom.
Unsay Gihimo ni Jesus?
Si Kristo nagbilin ug “sulondan aron [kita] managsunod pag-ayo sa iyang mga tunob,” nag-ingon si apostol Pedro. “Siya walay nahimong sala.” (1 Pedro 2:21, 22) Busa unsay panglantaw ni Jesus bahin sa makahubog nga mga ilimnon? Buweno, ang una niyang milagro mao ang iyang paghimo sa tubig nga bino. Unsang matanga sa bino ang gihimo ni Jesus? Gidayeg sa “tagdumala sa kombira” ang bag-ong kinasal nga bana tungod sa milagrosong pagkahimo nga bino. Siya miingon: “Ang tanang tawo magpagawas pag-una sa maayong bino, ug sa dihang mahubog na ang mga tawo, ang ubos nga matang. Ikaw nagtipig hinuon sa maayong bino hangtod karon.”—Juan 2:9, 10.
Ang pag-inom ug bino maoy bahin sa pagsaulog sa Paskuwa, ug gigamit ni Jesus ang bino sa dihang gisugdan niya ang Panihapon sa Ginoo. Nagtunol sa kopa sa bino ngadto sa iyang mga tinun-an, siya miingon kanila: “Inom kamo gikan niini, kamong tanan.” Kay nahibalo nga hapit na siyang mamatay, siya midugang: “Dili na gayod ako moinom sukad karon sa bisan unsa niini nga produkto sa paras hangtod nianang adlawa sa dihang moinom ako ug bag-o niini kauban ninyo diha sa gingharian sa akong Amahan.” (Mateo 26:27, 29) Oo, nahibalo ang mga tawo nga si Jesus miinom ug bino.—Lucas 7:34.
Unsay Angay Natong Buhaton?
Bisan tuod wala idili sa Bibliya ang pag-inom ug makahubog nga mga ilimnon, wala kana magpasabot nga kita kinahanglang moinom. Dunay daghang katarongan nga ang usa dili moinom. Pananglitan, nahibalo ang usa ka alkoholiko kanhi sa mga kapeligrohan sa pag-inom bisag usa lang ka tagay. Ang usa ka babayeng mabdos lagmit dili moinom kay basig madaot ang iyang gisabak. Ug kay nahibalo nga ang makahubog nga mga ilimnon makaapekto sa imong panghukom ug kaalisto sa pagsanong, ang usa ka drayber dili moinom bisag gamay lang kay siya nahibalo nga mameligro ang iyang kinabuhi o ang kinabuhi sa ubang mga tawo.
Ang usa ka Kristohanon dili buot makapandol sa uban kansang tanlag nagsaway sa pag-inom. (Roma 14:21) Sa kamaalamon, siya dili moinom sa dihang makigbahin sa publikong ministeryo. Maayong hinumdoman nga ilalom sa Balaod sa Diyos sa karaang Israel, ang mga saserdote gidid-an sa “pag-inom ug bino o makahubog nga ilimnon” sa dihang mag-alagad sa templo. (Levitico 10:9) Gawas pa, diha sa mga nasod diin gidili o may restriksiyon ang pag-inom ug makahubog nga mga ilimnon, ang usa ka Kristohanon kinahanglang mosunod sa balaod.—Roma 13:1.
Bisan tuod personal nga desisyon ang pagtino kon moinom ba kita o dili, o unsa ka daghan ang imnon, ang Bibliya nagdasig gayod sa pagkamakasaranganon. Kini nagkanayon: “Kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos.”—1 Corinto 10:31.
NAPALANDONG BA NIMO?
◼ Unsang pasidaan ang giingon sa Bibliya bahin sa pag-inom ug makahubog nga mga ilimnon?—1 Corinto 6:9, 10.
◼ Miinom ba si Jesu-Kristo ug makahubog nga mga ilimnon?—Lucas 7:34.
◼ Unsay maggiya sa matuod nga mga Kristohanon bahin sa pagkaon ug pag-inom?—1 Corinto 10:31.