Tilawi ang Lamiang mga Potahe sa Thailand

TINAMPO SA MAGSUSULAT SA PAGMATA! SA MALAYSIA

SAMTANG maglakaw ka diha sa dalan sa Bangkok, Thailand nga punog mga tawo, manuhotsuhot dayon sa imong ilong ang manumbalay nga kahumot sa mga pagkaon nga giluto sa mga kosinero diha sa daplin sa dalan. Dili kalikayan nga maglaway ka gayod sa kahumot ug sa kanindot sa kolor sa ilang mga potahe.

Ang nagpalami sa mga pagkaon sa Thailand mao ang maayong klase sa mga panakot, gamot, dahon, ug mga liso nga ilang gigamit. Tungod niini, magsagol ang katam-is, kaaslom, kaparat, kapait, ug kahalang, ug dili nimo mapugngan ang imong kaugalingon sa pagtilaw niana. Nganong talagsaon man kaayo ang kalami sa mga potahe sa Thailand? Ang sekreto niini anaa sa ilang kasaysayan.

Impluwensiya sa Nagkalainlaing Nasod

Ang Thailand maoy hapitanan sa mga tawo nga mobiyahe paingon sa lainlaing dapit sa Asia. Sulod sa daghang siglo, ang mga tawo gikan sa Tsina, Laos, Cambodia, Indonesia, Uropa, ug uban pang nasyonalidad sagad mohapit sa Thailand, ug daghan kanila mipuyo na didto. Gidala niining mga tawhana ang kahumot ug kalami sa mga pagkaon sa ilang nasod.

Sa unang panahon, gitudloan sa mga biyahedor gikan sa India ang mga taga-Thailand kon unsaon paggamit ug curry sa ilang mga potahe. Sa ika-16 nga siglo, ang mga Portuges nagdalag mga sili ug lagmit kamatis usab. Sa pagkakaron, daghan kaayog lamas ang mga potahe sa Thailand ug sagad duna kiniy dalag, berde, ug pula nga sili. Butangan usab nila kanag curry paste nga parehas ug kolor sa sili nga ilang isagol. Sama sa naandang mga pagkaon sa Sidlakan, ang curry ug sili ang makapahalang sa ilang mga potahe.

Klaseklaseng Potahe nga Lainlaig Lami

Ang pagkaon sa Thailand sagad adunay sabaw, salad, ginisa, curry, mga sawsawan, init nga kan-on, ug pangsiragana nga may sangkap nga asukar ug itlog. Mogamit usab silag tuno ug unod sa lubi sa paglutog mga panghinam-is.

Sama sa ubang lugar, ang sekreto sa lamiang pagkaon sa Thailand mao ang preskong mga sangkap niana. Diha sa ilang mga merkado, daghan kaayog baligyang preskong prutas, utanon, isda, ug mga panakot nga sama sa tanglad, coriander, ahos, luy-a, galangal, cardamom, sambag, ug cumin. Duna usay lainlaing klase sa sili ug suwa, nga importante kaayong sangkap sa ilang mga potahe.

Kon ikaw mobisita sa Thailand o kaha gusto nimong tilawan ang ilang mga potahe diha sa inyong dapit, sulayi ang kinaham sa mga taga-Thailand nga tom yam goong, ang sinabaw nga pasayan nga halang ug aslom-aslom. Tilawi usab ang halang nga atsara, ang sotanghon nga may tinap-anang manok o pato, hiniwang karneng baboy, ug isda nga gihumol sa mga panakot. Ang Ma ho, nga nagkahulogang “nagdagan nga mga kabayo,” maoy sinagol nga karneng baboy, lukon, ug mani, nga gipaibabaw sa preskong pinya ug gidekorasyonag sili nga pula ug mga dahon sa coriander. Kon gusto kag siragana, tilawi ang linung-ag nga pilit nga isuwa sa tuno ug mangga.

Unsa ang kinamaayohang paagi sa pagkaon sa mga potahe sa Thailand? Sa ubang bahin sa nasod, nabatasan na nga kinamoton ang pilit nga kan-on dayon isawsaw kana sa mga sawsawan una nimo ihungit. Mahimo sab kang mogamit ug chopstick sa mga potahe nga dunay pansit. Apan kon maglisod ka paghungit, pagkutsara na lang.

Naghinamhinam ka na bang motilaw sa mga potahe niining maanindot nga nasod sa Asia? Kon mao, panahon na nga imong tilawan ang mga pagkaon nga lagmit wala pa gayod nimo matilawi​—ang lamiang mga pagkaon sa Sidlakan.

[Mga hulagway sa panid 23]

1 Ang Tom yam goong

2 Sotanghon nga may ginagmayng karneng baboy ug mga pasayan

3 Halang nga atsara

4 Ang Ma ho

5 Pilit nga may tuno ug mangga