Gidisenyo ba Kini?

Ang Mata sa Peacock Mantis nga Pasayan

● Ang peacock mantis nga pasayan, nga makaplagan sa Great Barrier Reef sa Australia, nakabaton sa labing komplikadong mata taliwala sa kahayopan. “Kini talagsaon kaayo,” matod pa ni Dr. Nicholas Roberts, “nga mas maayo pa kay sa bisan unsa nga naimbento sa tawo.”

Hunahunaa: Ang peacock mantis nga pasayan makakita sa polarized nga kahayag ug makaproseso niana sa paagi nga dili mahimo sa tawo. Ang polarized nga kahayag mahimong mopanaw sa tul-id nga linya o espayral. Dili sama sa ubang mananap, kini nga pasayan dili lang makakita sa duha ka porma sa polarized nga kahayag, ang tul-id nga linya ug ang espayral, kondili makahimo usab kini sa pag-usab sa porma sa kahayag. Tungod niana, mas maayo ang panan-aw niini nga pasayan.

Susama usab niana ang mga DVD player. Aron mabasa ang impormasyon, kinahanglang usbon sa DVD player ang polarized nga kahayag nga gitumong sa disc, gikan sa tul-id nga linya ngadto sa espayral, dayon balik na pod sa tul-id. Apan labaw pa niana ang mahimo sa peacock mantis. Ang DVD player makahimo lamang sa pag-usab sa pula nga kahayag—o sa asul diha sa mas modernong mga player—apan ang mata niini nga pasayan makahimo sa pag-usab sa halos tanang kolor.

Ang mga tigdukiduki nagtuo nga kon sundogon ang mata niini nga pasayan, ang mga inhenyero makahimog DVD player nga makabasa ug mas daghang impormasyon kay sa mga DVD player karon. Si Roberts miingon nga ang disenyo sa mata niini nga pasayan simple kaayo, ug mas maayo pa kay sa bisan unsang himan nga atong gisundog niana.

Unsay imong hunahuna? Ang talagsaong mata sa peacock mantis nga pasayan sulagma bang mitungha o kini ba gidisenyo?

[Picture Credit Line sa panid 24]

Courtesy Stephen Childs