Pagkatulog—Unsa Kini Kaimportante?

● Ang bag-ong mga pagtuon nagpakita nga ang mga taga-North America matulog sa aberids nga pito hangtod sa pito ka oras ug tunga kada gabii.a Unsa kaimportante ang pagkatulog? Samtang matulog ka, imong masinati ang gitawag ug rapid eye movement matag 60 ngadto sa 90 minutos sa tibuok gabii. Nianang panahona, ang utok aktibo kaayo, ug ang mga tigdukiduki nagtuo nga mao kanay panahon nga ang utok magreper sa kaugalingon niini. Ang ubang eksperto nag-ingon nga kon mabalda kana ug maputol ang tulog, sa ngadtongadto kini makadaot sa lawas. Kini makaapektar sa pag-obra sa utok, nga moresulta sa dili maayong pagtrabaho ug sa daghang balatian.

Ang mga substansiya sama sa caffeine temporaryong makaalkontra sa hormone nga maoy mosignal nga kita kinahanglan nang matulog. Apan, ang atong utok makahimo sa pagpatulog kanato kon ang atong lawas kulag tulog, ug kana gitawag nga microsleep. Sumala sa The Toronto Star, “bisan unsa pay imong ginahimo, ang imong utok, nga kulag tulog, motagpilaw ug napulo ka segundos o kapin sa usa ka minuto matag karon ug unya.” Handurawa nga nagdrayb ka sa gikusgong 30 milyas (48 kilometros) kada oras ug nakatagpilaw kag diyes segundos. Nianang panahona, ang gilay-on nga nadagan sa sakyanan maoy kapin na sa gitas-on sa dulaanag potbol. Dugang pa, ang kakulag tulog makapahuyang sa imong immune system, tungod kay panahon sa pagkatulog ang lawas mopatunghag mga T cell nga maoy mopatay sa kagaw. Panahon usab sa pagkatulog, ang lawas mopatunghag leptin, usa ka hormone nga motabang sa pagkontrolar sa gana sa kaon. Sa pagkatinuod, ang lawas nagkinahanglag tulog sama ra nga kini nagkinahanglag nahiangayng ehersisyo ug pagkaon.

Kulang ka bag tulog tungod sa kadaghan sa imong trabaho, o kaha tungod sa mga kabalaka sa kinabuhi ug sa mga butang nga imong gitipigan alang sa umaabot? Ang maalamong hari nga si Solomon kas-a miingon: “Matam-is ang pagkatulog sa usa nga nagaalagad, walay sapayan kon diyutay o daghan ang iyang gikaon; apan ang kadagaya sa dato dili magpakatulog kaniya.”—Ecclesiastes 5:12.

[Footnote]