Ikaw “Katingalahan nga Pagkabuhat”!
SA DIHANG mamalandong ka sa talagsaong katakos sa lainlaing mananap, masina ka ba usahay kanila? Lagmit nangandoy ka nga makalupad sama sa albatross, makalangoy sama sa lumod, makakita sama sa agila, o makadagan sama sa cheetah (kamatang sa dagkong iring).
Oo, ang mga mananap adunay talagsaong mga katakos. Mao man usab kita! Sa pagkatinuod, ang lawas sa tawo gihubit ingong hingpit-pagkadisenyo nga makina. Siyempre, labaw pa kita kay sa makina. Tungod sa atong pagkamamugnaon, pagkamaukiton, ug pagkamapaagihon, kita makadisenyog mga makina nga makatabang nato sa paghimo sa halos tanan nga atong gusto. Kita makalupad nga mas paspas kay sa katulinon sa tingog (speed of sound); makanabigar sa ibabaw o sa ilawom sa halapad nga kadagatan; makasud-ong sa kawanangan sa distansiya nga 14 ka bilyong light-year; makalili sa buhi nga selula; ug makamugnag mga tambal, terapiya, ug teknolohiya nga motabang nato sa pagdayagnos ug pagtambal sa mga sakit.
Bisag wala ang maong mga makina ug teknolohiya, ang himsog, nabansay-pag-ayong mga tawo makahimog katingalahang mga butang. Pananglitan, diha sa mga Olympic Game ang mga gymnast, tigsalom, ice-skater, tig-ski, ug uban pa makapakitag talagsaong mga abilidad uban ang kaliksi, kaartistiko, kamamugnaon, ug katahom nga makapahingangha sa mga tumatan-aw.
Gipabilhan ba nimo ang linaing mga gasa nga imong nabatonan? Tinuod, dili ka tingali atleta sa Olympic, apan duna kay daghang gasa nga angay nimong pabilhan. Ang usa ka karaang magsusulat sa Bibliya nagpahayag sa iyang apresasyon sa Diyos diha sa usa ka awit: “Pagadayegon ko ikaw tungod kay sa makalilisang nga paagi ako katingalahan nga pagkabuhat.”a (Salmo 139:14) Nganong dili nimo kana palandongon samtang imong basahon ang sunod nga mga artikulo? Kini maghisgot nga mas detalyado sa pipila ka katingalahang butang maylabot sa lawas sa tawo, maingon man sa ubang mas hinungdanong mga hiyas nga nakapahimo natong talagsaon kaayo.
[Footnote]
a Kon interesado kang mahibalo sa kamatuoran bahin sa paglalang kontra ebolusyon, palihog basaha ang brosyur nga Gilalang ba ang Kinabuhi? ug The Origin of Life—Five Questions Worth Asking. Makakuha ka niini sa mga Saksi ni Jehova sa inyong lugar o sa magpapatik niining magasina.
[Kahon sa panid 3]
GIDISENYO NGA MAKADAGINOT UG ENERHIYA
Ang atong tul-id nga pagtindog ug paglakaw makadaginot ug enerhiya, kay dili kaayo mamuwersa ang atong kaunoran sa paghimo niana. Sa pagkatinuod, kita “mogamit lamang ug dugang 7% nga enerhiya sa dihang magtindog kay sa dihang maghigda,” matod sa tigdukiduki bahin sa neuroscience nga si John R. Skoyles. Siya miingon usab nga ang iro mogamit ug mga 70% nga dugang enerhiya sa dihang magtindog (gamit ang upat ka tiil) kay sa dihang maghigda.