Butang nga Mas Bililhon kay sa Atong Kinabuhi Karon

Sumala sa giasoy ni Murat Ibatullin

Niadtong 1987, ang Ministry of Health sa Russia nagpadala kanako sa Uganda, Africa. Miuyon ko nga motrabaho didto ingong doktor sulod sa upat ka tuig. Sa tinuod lang, dili gyod ko ganahang mobalik sa Russia, apan gusto nakong makabatog eksperyensiya aron makatrabaho ko sa mga nasod sama sa Australia, Canada, o sa United States. Apan pagka-1991, nausab ang akong plano, ug mibalik ko sa Russia. Pasaysaya ko kon ngano.

NATAWO ko niadtong 1953 sa siyudad sa Kazan’, ang kaulohan sa Republic of Tatarstan sa Central Russia. Ang akong ginikanan mga Tatar, ug kadaghanan sa Tatar mga Muslim. Akong mahinumdoman nga sa bata pa ko, akong makit-an ang akong mga apohan nga magluhod ug mag-ampo kang Allah. Aron dili sila madisturbo, pagawson mi sa akong mga uyoan ug iyaan, lakip na sa akong ginikanan. Ang akong ginikanan mobatig kaulaw kay sila mga komunista ug mga ateyista.

Sa nag-edad kog kuwatro anyos, nabiktima ko sa kataposang epidemya sa polyo sa Soviet Union. Sa bata pa ko, pirme kong dad-on sa ospital ug sa sanatoryum aron ipatsek-ap. Akong mahinumdoman si Lolo nga mag-ampo aron maayo ko. Gusto kong mohimsog sama sa ubang bata, busa bisag dunay diperensiya ang akong tiil, magdula kog saker, hockey, ug ubang esport.

Samtang nagdako ko, gusto kong mahimong doktor. Dili ko relihiyoso, dili pod ko ateyista. Wala lang gyod ko maghunahuna bahin sa Diyos. Nianang panahona, wala ko makaangay sa ideolohiya sa mga komunista ug sagad makigdebate ko sa akong amahan ug uyoan. Si Tiyo nagtudlog pilosopiya sa usa ka unibersidad, ug si Papa nagtrabaho sa State Security Committee, nga nailhang KGB. Paggraduwar nako sa medical school, gusto kong mahimong maayong neurosurgeon ug molalin sa laing nasod.

Nangitag Maayong Kinabuhi

Niadtong 1984, natapos nako ang doctoral thesis bahin sa pagdayagnos sa tumor sa utok. Dayon, niadtong 1987, ako gipadala sa Uganda sa usa ka ospital sa Mulago. Mibalhin ko niining matahom nga nasod kauban sa akong asawa nga si Dilbar ug sa among mga anak nga si Rustem ug Alisa, nga nag-edad niadto ug siyete ug kuwatro anyos. Ang trabaho sa klinika lisod kaayo nga naglakip sa pag-opera sa mga pasyenteng nataptag HIV. Sagad moadto ko sa lainlaing klinika sa nasod, sanglit duha lang mi nga neurosurgeon sa tibuok Uganda.

Usa ka adlaw niana, sa usa ka baligyaanag libro sa Uganda, kami ni Dilbar nakakitag Russian nga Bibliya sa unang higayon. Mipalit mig ubay-ubayng kopya aron ipadala sa among mga higala sa Soviet Union, kay niadtong panahona lisod kaayong makapalit ug Bibliya didto. Mibasa mig pipila ka kapitulo apan nalisdan mig sabot niana mao nga sa wala madugay miundang mi.

Apan sulod sa tulo ka tuig, kami moadto sa lainlaing simbahan sa Uganda ug maningkamot sa pagsabot kon unsay gituohan sa mga tawo ug kon unsay nakahimo sa ilang kinabuhi nga makahuloganon. Nakadesisyon pod kong magtuon ug Koran sa orihinal nga pinulongan niini. Gani, kami ni Rustem nagtuon ug Arabic. Human sa pipila ka bulan, makasulti na mig simpleng Arabic.

Nianang panahona, among nahimamat ang mga misyonaryo nga nagtudlog Bibliya, si Heinz ug Marianne Wertholz, nga taga-Germany ug Austria. Sa una namong panag-estoryahay, wala mi maghisgot ug relihiyon. Sama ra mi sa ubang mga taga-Europe nga nagkita sa Africa. Amo silang gipangutana kon nag-unsa sila sa Uganda ug among nahibaloan nga sila misyonaryo diay sa mga Saksi ni Jehova ug tuyo nila nga tabangan ang mga tawo nga makakat-on sa Bibliya.

Unya, akong nahinumdoman nga sa among klase sa pilosopiya sa unibersidad sa Russia, kami gitudloan nga ang mga Saksi usa ka sekta ug naghalad kono sa ilang mga anak ug nag-inom sa dugo niini. Akong gisuginlan si Heinz ug Marianne bahin niini, kay dili ko makatuo nga uyon sila nianang buhata. Kami ni Dilbar midawat sa librong Ikaw Mabuhing Walay Kataposan sa Paraiso sa Yuta, ug hapit namo kini mahurot ug basa sa pipila lang ka oras. Sa dihang mihunong kog basa ug nangutana kang Dilbar kon unsay iyang hunahuna, siya miingon nga nalipay kaayo siya sa iyang nabasa nga nanglimbawot ang iyang balhibo! Ako siyang giingnan nga parehas mig gibati.

Human niana, gusto ming makig-estorya pag-usab kang Heinz ug Marianne. Sa dihang nagkita mi, daghan mig nahisgotan. Ang among nakat-onan sa Bibliya mas nakatandog pa sa among kasingkasing. Gipaambit namo ang among nakat-onan sa among mga higala ug kauban sa trabaho. Lakip kanila ang embahador sa Russia, mga konsul sa Russia ug sa ubang nasod, ug ang usa ka hawas sa Vatican. Nakurat mi sa giingon sa maong hawas nga ang Daang Tugon kono “pulos tumotumo.”

Mibalik sa Yutang Natawhan

Usa ka bulan una mi mamalik sa Russia niadtong 1991, midesisyon mi ni Dilbar nga mag-Saksi. Naghunahuna mi nga pag-abot namo sa Kazan’ makapadayon ra mig tambong sa mga tigom. Apan nahigawad mi kay sulod sa tulo ka bulan wala mi makakitag Kingdom Hall ug wala pod mi nahimamat nga isigkamagtutuo! Busa midesisyon mi nga mosangyaw sa balay ug balay, nga maoy buluhaton sa mga Saksi ni Jehova sa tibuok kalibotan, bisag kami rang duha. Ingong resulta, nakasugod mig pipila ka pagtuon sa Bibliya, nga naglakip sa usa ka babaye nga na-Saksi sa ulahi.

Unya, giduaw mi sa usa ka edarang Saksi nga nakadawat sa among adres gikan sa mga Saksi sa Uganda. Mitambong dayon mi sa mga tigom nga gipahigayon sa usa ka gamayng apartment uban sa grupo nga gilangkobag 15 ka tawo. Si Heinz ug Marianne padayong nakigkomunikar namo ug miadto pa gani sila sa Kazan’ aron duawon mi. Sa ulahi, amo silang giduaw sa Bulgaria, ang sunod nilang asaynment, diin sila nag-alagad hangtod karon.

Ang Among Nasod Nagmabungahon

Mangita kog higayon nga ipaambit ang kamatuoran sa Bibliya sa akong mga kauban diha sa ospital nga akong gitrabahoan sa Russia. Sa paglabay sa panahon, daghan ang nanga-Saksi, ug ubay-ubay kanila mga kauban nako sa trabaho. Niadtong 1992, usa ka tuig sukad sa among pag-abot, ang mga Saksi sa Kazan’ nahimo nang 45; ug pagkasunod tuig, kapin na sa 100. Sa pagkakaron, ang Kazan’ aduna nay pito ka kongregasyon sa mga Saksi—lima ang nagsultig Russian, usa ang Tatar, ug usa ang sign language. Duna poy mga grupo nga nagsultig Armenian ug Iningles.

Niadtong 1993, mitambong kog seminar sa mga doktor didto sa New York City, diin nakahigayon ko pag-tour sa tibuok-kalibotang hedkuwarter sa mga Saksi ni Jehova sa Brooklyn. Nahimamat nako si Lloyd Barry, nga nagtabang sa pagdumala sa buluhatong pagsangyaw sa mga Saksi ni Jehova sa tibuok kalibotan. Bisag puliki, migahin siyag panahon sa pagpakig-estorya nako.

Among gihisgotan nga dunay panginahanglan sa mga literatura sa Bibliya sa Tatar nga pinulongan. Pipila ka tuig sa ulahi, giorganisar ang Tatar nga translation team didto sa Russia mao nga duna nay Tatar nga mga literatura. Pagkadako sa among kalipay sa dihang regular na ming makadawat sa magasing Bantayanang Torre, nga gigamit sa pagtuon sa Bibliya! Sa wala madugay, natukod ang unang Tatar nga kongregasyon.

Pag-opera nga Dili Daghang Dugo ang Mausik

Ako nagsunod sa tanang moral nga balaod sa Diyos, nga naglakip nianang mabasa sa Buhat 15:20 nga ang mga alagad sa Diyos ‘mag-ayad sa dugo.’ Ang bersikulo 29 nagdugang nga ang mga alagad sa Diyos kinahanglan nga “padayong magaayad sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas.”

Busa kon ang mga Saksi magpatambal, sila mohangyo sa mga doktor nga tahoron ang ilang baroganan maylabot sa dugo. Taudtaod kong membro sa Hospital Liaison Committee sa mga Saksi sa Kazan’.a Niadtong 1997, ang usa ka tuig nga si Pavel nga taga-Novosibirsk City kinahanglang maoperahan dayon, busa ang iyang inahan nangayog tabang namo. Nianang panahona, pipila lang ka eksperyensiyadong doktor sa Russia ang moopera nga dili moabonog dugo. Busa, mitabang mi sa pagpangitag doktor nga mogamit ug alternatibong paagi sa pagtambal.

Sa wala madugay nakakita mig heart-surgery clinic sa Kazan’ kansang mga doktor misugot nga moopera kang Pavel. Niadtong Marso 31, 1997, ang mga doktor milampos sa pag-opera sa abnormalidad sa iyang kasingkasing (tetralogy of Fallot) nga wala mag-abonog dugo. Pagka-Abril 3, ang mantalaang Vechernyaya Kazan nagtaho: “Maayo ra ang kahimtang sa bata ug dili na siya kinahanglang motomar ug tambal para sa kasingkasing . . . Ang inahan ni Pavlik [angga ni Pavel] nakaginhawag luag human sa onse ka bulan.” Sa wala madugay, si Pavel naulian ug nakalakaw-lakaw na sa pasilyo sa ospital.

Karon, si Pavel maayo nag panglawas ug nagkinabuhing normal. Ganahan siyang maglangoy-langoy, mag-ice skating, ug magdulag saker. Siya anaa na sa ikawalo nga grado sa eskuylahan ug nagtambongan kauban sa iyang inahan ingong membro sa kongregasyon sa mga Saksi ni Jehova sa Novosibirsk City. Human sa operasyon ni Pavel, ang mga doktor sa maong klinika malamposong nag-opera, nga wala mag-abonog dugo, sa ubay-ubayng Saksi nga dunay sakit sa kasingkasing. Sa Tatarstan padayong nag-uswag ang mga pamaagi sa pagtambal ug komon na ang pag-opera nga dili mag-abonog dugo.

Ang Akong Trabaho Karon

Kami sa akong asawa, ug ang ubang Saksi, nagtrabaho sa klinika nga nagtanyag ug modernong paagi sa pagpanambal sa mga pasyenteng dunay sakit sa nervous system ug sa kasingkasing. Kami nakigbahin sa lainlaing matang sa operasyon, nga ilabinang naggamit sa mga pamaagi nga dili daghang dugo ang mausik. Ako nagtrabaho ingong neuroradiologist ug padayong nanukiduki bahin sa noninvasive bloodless neurosurgery. Ingong propesor sa Department of Neurology and Neurosurgery sa State Medical University sa Kazan’, ako mohatag ug lektyur sa mga estudyante sa medisina ug sa mga doktor ug motabang nila nga makita ang mga bentaha sa pagtambal nga dili mogamit ug dugo.b

Ang akong asawa kauban nako sa klinika ingong ultrasound specialist. Ganahan mi sa among trabaho kay makatabang mi sa mga tawo. Apan mobati mig mas dakong katagbawan nga makita kon sa unsang paagi ang kamatuoran sa Bibliya nagaayo sa mga tawo sa espirituwal nga paagi. Malipay ming ipaambit sa uban ang saad sa Diyos nga sa dili madugay “walay pumoluyo nga moingon: ‘Ako masakiton.’”—Isaias 33:24.

[Mga footnote]

[Hulagway sa panid 12]

Nagtrabaho ingong doktor sa Africa

[Hulagway sa panid 13]

Sa dihang kami sa akong asawa misugod pagtuon sa Bibliya uban sa mga Saksi ni Jehova, 1990

[Hulagway sa panid 14]

Pagkita namo ni Lloyd Barry sa dihang miduaw ko sa Brooklyn, New York, 1993

[Hulagway sa panid 15]

Si Pavel ug ang iyang inahan karon

[Hulagway sa panid 15]

Nagsangyaw uban sa akong asawa, si Dilbar