Christmas Tree—Ang Sinugdanan Niini

DIHA sa daghang dapit sa kalibotan, ang Christmas tree maoy iladong simbolo sa Pasko ug sa komersiyo. Kini nahimong relihiyosong simbolo sukad pa sa unang bahin sa kasaysayan sa tawo.

Ang pamatuod sa pagkakaraan niini nga simbolo makita diha sa Bohuslän, usa ka probinsiya nga duol sa dagat sa kasadpan sa Sweden, ug sa kasikbit nga probinsiya sa Østfold sa Norway. Niining mga dapita, sa mga 5,000 ka lokasyon, dunay kapin sa 75,000 ka drowing nga gikagis diha sa bato, nga ang pipila pormag kahoy. Ang mga arkeologo nag-ingon nga daghan niini nga mga drowing gihimo tali sa mga tuig 1800 ug 500 B.C.E.a

Kining talagsaong mga drowing nagpadayag bahin sa pagtuo sa mga tawo nga nagkinabuhi sa wala pa matawo si Jesus sa Nasaret. Pananglitan, ang ubang mga tigdukiduki nagtuo nga sa karaang panahon diha sa mga dapit sa Sweden ug Norway karon, ang mga kahoyng pino gigamit ingong sagradong mga simbolo.

Nganong ang mga tawo nga nagpuyo niining amihanang mga dapit nga duol sa dagat nagdrowing man ug mga kahoyng pino diha sa bato? Ang ubang mga eskolar nag-ingon nga tingali ang usa ka rason mao ang pagkatalagsaon niining kahoya sa panahon sa wala pa si Kristo. Busa morag misteryo nga magpabiling lunhaw o “buhi” ang usa ka kahoy, samtang ang uban mangalarag sa tingtugnaw.

Diha sa daghang kultura sa kalibotan, ang mga kahoy nahimong simbolo sa kinabuhi, pagkaluwas, ug pagkawalay kamatayon. Mao sab kini ang hinungdan kon nganong ang mga larawan nga kaamgid gayod sa kahoyng pino gidrowing diha sa mga bato sa dapit sa Bohuslän ug Østfold sa dugay na kaayong panahon una pa nanaghan kining mga kahoya didto.

Ang librong Rock Carvings in the Borderlands, nga giimprenta sa tabang sa Swedish National Heritage Board, nag-ingon: “Ang mga drowing nga mga kahoy nga gikagis diha sa bato nagpakita nga sukad pa sa Bronze Age ang relihiyon ug kultura sa habagatang bahin sa Scandinavia kaamgid nianang sa tibuok Europe ug sa dakong bahin sa Asia. Ang relihiyon ug ang pagtuon bahin sa uniberso gipahiangay ngadto sa mga tawo kansang pangabuhi maoy pagpanguma ug pagpamuhig hayop. Sila nagsimba sa mao gihapong mga diyos, bisag lainlain ang mga ngalan niini.”

Ang The Rock Carving Tour, usa ka pulyeto nga giimprenta sa Bohusläns Museum, miingon: “Dili inadlaw-adlaw nga kinabuhi ang gilarawan sa mga nagdrowing. Kami nagtuo nga tingali ang mga drowing maoy matang sa pangadye ug orasyon para sa mga diyos.” Ang pulyeto midugang: “Ang ilang pagtuo maoy bahin sa walay kataposang siklo sa kinabuhi, pagsanay, kamatayon, ug pagkatawo pag-usab.”

Naghisgot bahin sa talagsaon nga simbolikong mga drowing, nga gihimo sa wala pa maimbento ang pagsulat sa amihanang Europe, ang ensiklopedia sa Sweden nga Nationalencyklopedin, nag-ingon: “May makitang malaw-ay nga mga drowing usab nga nagpamatuod nga dako gayong bahin ang kulto sa pagsanay diha sa relihiyon sa mga tawo sa Amihanan panahon sa Bronze Age.”

Dayag nga ang mga kostumbre bahin sa mga kahoyng pino mikaylap ug nahimong bahin sa kinabuhi diha sa daghang dapit. Ang Encyclopædia Britannica nag-ingon bahin sa Christmas tree: “Ang mga pagano sa Europe nagsimba na sa kahoy ug nagtuo gihapon niini bisag nahimo na silang Kristiyano.” Kini nagpabilin gihapon diha sa lainlaing mga rituwal ug mga kostumbre, lakip na “ang kostumbre . . . sa pagdekorar ug Christmas tree diha sa entrada o sa sulod sa balay panahon sa Pasko.”

Napopular kini sa 1841 sa dihang ang harianong pamilya sa Britain naggamit ug giadornohan nga kahoyng pino sa ilang pagselebrar sa Pasko. Karon ang Christmas tree popular kaayo sa tibuok kalibotan, ug milyonmilyon ang mamalit ug tinuod o artipisyal nga Christmas tree. Sa laing bahin, ang drowing diha sa mga bato sa Scandinavia nagpamatuod nga ang Christmas tree pagano ug sinugdanan.

[Footnote]

[Blurb sa panid 12]

Ang mga drowing diha sa bato nagpakita nga ang pagsimba sa mga pagano sa kahoyng pino nagsugod sa wala pa si Kristo

[Mga hulagway sa panid 13]

Ang mga drowing nga kahoy didto sa (1) Torsbo, (2) Backa, ug (3) Lökeberg, Sweden

[Credit Line]

Courtesy Stiftelsen för dokumentation av Bohusläns hällristningar