PAGPANIID SA KALIBOTAN

Israel

Ang mga bata nga “natawo nga dunay depekto nga makita unta diha sa prenatal screening” dili na makakiha sa medikal nga mga awtoridad tungod sa “pagtugot kanila nga matawo,” matod pa sa report sa Haaretz.com. Apan ang mga ginikanan makakiha aron makapangayog danyos para sa mga gastos sa pagpadakog may depektong anak ug sa pagtagana sa [iyang] mga panginahanglan sa tibuok niyang kinabuhi.”

Australia

Sa Australia, 8 sa 10 ka magtiayon nagpuyopuyo una nagpakasal.

Greece

Sumala sa rekord sa Ministry of Health sa Greece, ang gidaghanon sa naghikog sa maong nasod misaka ug 40 porsiyento sa unang lima ka bulan sa 2011, kon itandi sa maong mga bulan sa 2010. Ang pagdaghan sa naghikog natunong sa pagsugod sa pagkahugno sa ekonomiya sa nasod.

United States

Halos 40 porsiyento sa pagkaon sa nasod ang nausik, sumala sa Natural Resources Defense Council. Pananglitan, gibanabana nga 7 porsiyento sa mga pananom dili maani, 17 porsiyento sa mga pagkaon sa restawran ug kapeterya dili kaonon, ug ilabay sa mga pamilya ang mga 25 porsiyento sa pagkaon nga ilang gipalit.

Madagascar

Ang kinagamyang tabili sa kalibotan nadiskobrehan ning bag-o pa didto sa Madagascar. Ang uban niining gagmayng brawon nga tabili, nga moabot ug 1.1 pulgadas, susamag gidak-on sa kuko. Kay nameligro man ang ilang puy-anan, sila nameligro usab nga mapuo.