PAGPANIID SA KALIBOTAN

United States

Sa milabayng napulo ka tuig, ang mga security personnel sa erport nakakompiskar ug duolan sa 50 ka milyon nga gidiling mga butang, nagreport ang Department of Homeland Security sa U.S.A. Sa 2011, sila nakakompiskar ug kapin sa 1,200 ka pusil. Kadaghanan sa tag-iya niini miingon nga nakalimot sila nga may dala diay silang pusil.

Brazil

Ang mga opisyales sa departamento sa edukasyon nagbutang ug electronic chips sa mga uniporme sa mga estudyante aron masumpo ang “pagpamayabas.” Ang ginikanan makadawat ug text message dihang ma-detect sa sensor nga nakaabot na sa eskuylahan ang iyang anak, ug makadawat siyag lahi nga text message dihang ma-late ang bata ug kapig 20 minutos.

Norway

Ang Lutheran Church dili na opisyal nga relihiyon sa Norway. Sa unang higayon, ang Parliamento sa Norway nagkausa sa pagbag-o sa konstitusyon ug sa pagpaluag sa koneksiyon sa Gobyerno ug Relihiyon.

Czech Republic

Sa usa ka surbi, 2/3 sa mga empleyado sa Czech Republic nagtuo nga obligado sila sa pagtubag sa mga tawag sa cellphone, e-mail, o text message sa kompaniya bisag dili na oras sa trabaho. Kapin sa 1/3 nagtuo nga wala silay modo kon dili dayon nila kini tubagon.

India

Bisag misakag halos 50 porsiyento ang produksiyon sa pagkaon sa miaging 20 ka tuig ug miabot ug 71 ka milyong tonelada ang pondong bugas-humay ug trigo, ang India naglisod gihapon sa pagpakaon sa mga lungsoranon niini. Mga 40 porsiyento lang niini ang makaabot sa mga panimalay. Korapsiyon ug pagkausik ang hinungdan niini.