Makatuhop ug Sidlak sa Adlaw nga Pako sa Alibangbang

ARON dili magdepende ang tawo sa krudo o gasolina, ang mga siyentista naningkamot sa pagpadako sa kapasidad sa mga solar collector sa pagsikop ug sidlak sa adlaw. “Ang solusyon niini nga problema,” miingon ang usa ka siyentista, “tingali . . . naglupadlupad lang sa atong atubangan.”

Hunahunaa: Sa bugnawng panahon, bukharon sa alibangbang ang iyang pako aron mainitan sa adlaw. Ang mga pako sa ubang matang sa swallowtail nga alibangbang maayo kaayong mosikop ug motuhop sa sidlak sa adlaw. Ang sekreto nila anaa sa ilang itom nga pigment ug sa disenyo sa gigming kaayong naglut-odlut-od nga mga himbishimbis nga nagsapaw sa ilang pako. Ang mga himbishimbis dunay mga lungag nga sama nianang sa balay sa putyokan diin diha sa mga lungag molusot ang sidlak sa adlaw. Kining talagsaong disenyo sa himbishimbis magsikop ug sidlak sa adlaw, nga maoy magpaitom pag-ayo sa mga pako ug magpainit sa alibangbang.

“Ang pako sa alibangbang tingali maoy usa sa kinanipsan ug kinahuyangang gambalay diha sa kinaiyahan,” nag-ingon ang Science Daily, “apan nakapukaw kini sa mga siyentista sa pag-imbentog teknolohiya nga magpauswag sa kapasidad sa pagpatunghag hydrogen gas—sugnod sa umaabot nga dili makadaot sa kalikopan—gikan sa tubig ug sidlak sa adlaw.” Ang ubang posibleng gamit niini naglakip sa optical nga mga instrumento ug solar nga mga baterya.

Unsay imong hunahuna? Ang disenyo ba sa pako sa alibangbang nga makatuhop ug sidlak sa adlaw mitungha pinaagig ebolusyon? O kini ba gidisenyo?