Ang Pormag V nga Posing sa Cabbage White Butterfly

Sa dili pa molupad, ang butterfly o alibangbang nagkinahanglan sa kainit sa adlaw aron painiton ang mga kaunoran nga iyang gamiton sa paglupad. Pero kon magdag-om, ang cabbage white butterfly makaunag lupad sa ubang alibangbang. Nganong mahimo niya kana?

Hunahunaa: Sa dili pa molupad, daghang klase sa alibangbang ang magbulad sa adlaw nga ang mga pako nagtiklop o nagbukhad. Pero ang cabbage white butterfly magposing nga pormag V. Gipakita sa pagtuon nga aron moinit dayon ang iyang kaunoran, ibukhad niya ang iyang pako sa anggulo nga mga 17 degrees. Niini nga posisyon, ang enerhiya sa adlaw modirekta sa iyang kaunoran diha sa thorax, nga makapainit niini sa dili pa siya molupad.

Gisusi sa mga researcher sa University of Exeter, sa England, kon mahimo bang mas episyente ang mga solar panel kon ilang sundogon ang pormag V nga posing sa maong alibangbang. Dihang gihimo nila kana, ilang nakita nga ang napatungha nga enerhiya misakag halos 50 porsiyento.

Namatikdan sab sa mga researcher nga ang pako sa maong alibangbang maayo kaayong mopabanda ug kainit. Dihang gisundog sa mga researcher ang pormag V nga posisyon ug ang abilidad sa pako niini sa pagpabandag kainit, nakahimo silag mas gaan ug mas episyenteng mga solar panel. Tungod niini, si Propesor Richard ffrench-Constant, nga membro sa team sa mga researcher, nakaingon nga ang cabbage white butterfly “eksperto sa pagkuhag enerhiya gikan sa adlaw.”

Unsay imong hunahuna? Ang pormag V ba nga posing sa cabbage white butterfly mitungha pinaagig ebolusyon? O kini ba gidisenyo?