“Bag-o Kini nga Pamaagi!”

SI Soo-jeong, nga guidance counselor sa hayskul didto sa South Korea, nagpasalidag mga video diha sa jw.org website sa iyang klase. Siya miingon: “Ang mga estudyante nalingaw kaayo sa video nga Unsay Tinuod nga Higala? Human makatan-aw sa video, sila mikomento ug sama niini: ‘Wala gyod ko magdahom nga ingon diay niana ang panaghigalaay. Bag-o kini nga pamaagi sa pagtudlo!’ Ang uban miingon nga tan-awon nila kini nga website kon nagkinahanglan silag tambag.” Si Soo-jeong midugang: “Gisultihan nako ang akong kaubang mga titser bahin niini ug nalipay sila nga dunay ingon niini nga video nga magamit diha sa ilang mga klase.”

Ang laing video nga nakatabang sa mga estudyante sa South Korea mao ang whiteboard animation nga Sukli ang Bully nga Dili Makig-away. Usa ka lecturer nga nagtrabaho sa Juvenile Violence Prevention Foundation nagpasalida niini ngadto sa mga estudyante. “Daghang batan-on giganahan sa video tungod sa animation,” siya miingon. “Dugang pa, ang video praktikal kay gipakita niini kon unsay himoon kon daogdaogon sila ug kon sa unsang paagi malikayan kini.” Kini nga institusyon nangayog permiso sa paggamit sa video diha sa ilang mga lecture, nga ipasalida diha sa daghang eskuylahan sa elementarya ug sa hayskul. Sila gitugtan. Ang kapolisan usab naggamit ug mga video sa jw.org.

Ikaw among gidapit sa pagsusi niini nga website. Sayon kining ablihon, ug ang tanang audio, video, Bibliya, ug uban pang publikasyon ma-download nga walay bayad.