Dulot nga Epekto sa mga Video nga Mohatag ug Pamatuod
1 “Ang among anak nga lalaki nagtan-aw na sa video gikan pa sa panahong siya dili pa makamaong molakaw. Balikbalik niyang gitan-aw kana. Pagkaanindot gayod nga adunay mga himan nga mopatidlom ug gugma kang Jehova diha sa atong mga anak!” Unsa nga video ang gipasabot niining Kristohanong ginikanan? Ang video nga nag-ulohang Noah—He Walked With God. Usa ka di-Saksing inahan kansang anak nga lalaki nakakita sa video nga Noah didto sa silingang balay nagpadalag $90 dolyares nga donasyon ngadto sa sangang buhatan ug nangutana kon duna pa ba kitay laing mga video alang sa mga bata. Ang mga video nga gigama sa organisasyon ni Jehova dunay dakong epekto sa mga bata ug tigulang.
2 Diha sa Pamilya: Human makatan-aw ang usa ka pamilyang Saksi sa Jehovah’s Witnesses Stand Firm Against Nazi Assault, ang inahan miingon: “Gipalandong ko sa tibuok adlaw kon sa unsang paagi gitabangan ni Jehova ang ordinaryong mga tawo nga makalahutay sa talagsaong mga butang! Ang paghunahuna niana nagpahinumdom kanako kon unsa ka gamay ang akong kaugalingong mga problema. Ang pagtan-aw niini nga video uban sa among mga anak nakatabang kanila nga mas tin-awng masabtan ang panginahanglan sa pagsalig kang Jehova. Pinaagi sa paghisgot niini uban kanila pagkahuman, natabangan namo ang among mga anak nga babaye nga mas pang masangkapan sa pagdumala sa bisan unsang mga pagpit-os ug mga paglutos nga mahimong ilang maagoman.”
3 Diha sa Eskuylahan: Ingong bahin sa taho, usa ka tin-edyer nga Saksi ang nagpasalida sa usa ka bahin sa video nga Stand Firm ngadto sa iyang klase. Kaniadto, ang iyang maestra nag-ingon nga wala gayod siya makauyon sa mga Saksi. Human makatan-aw sa maong video, siya miingon: “Kini bug-os nga nag-usab sa akong panglantaw bahin sa mga Saksi ni Jehova. Mosaad ko nga sa sunod higayon nga mobisita sila sa akong balay, mamati ko nila ug magsugod sa pagtuon sa Bibliya uban nila!” Unsay nakapausab sa iyang panglantaw bahin kanato? Siya nag-ingon nga tungod sa atong “tinuod nga gugma ug pagkamaunongon.”
4 Diha sa Ministeryo: Usa ka sister nakahimamat ug usa ka babaye kinsa nagduhaduha sa pagdawat ug literatura, bisan tuod aduna siyay mga pangutana bahin kanato ug sa atong mga gituohan. Mibalik ang sister nga dala ang video nga Jehovah’s Witnesses—The Organization Behind the Name ug gipasalida kana alang sa babaye ug sa iyang bana. Nakadayeg kaayo silang duha ug miuyon nga magtuon sa Bibliya. Ingong resulta sa maayong pamatuod nga nahatag kanila, sila misugod sa pagpahiuyon sa ilang kinabuhi sa kabubut-on sa Diyos.
5 Gigamit mo ba ang atong mga video aron mabatonan nila ang kinamaayohang epekto?