Mga Himan nga Moedukar, Mopalihok, ug Mopalig-on

¹ Kini masangpoton sa pag-edukar sa mga tawo bahin sa Bibliya ug sa mga Saksi ni Jehova. Kini nagpalihok sa daghan sa pagbarog nga malig-on dapig sa kamatuoran. Kini nagpalig-on sa pagtuo ug sa pagpabili sa dedikadong mga tawo sa Diyos. Unsa man kini? Ang mga video nga gigama sa organisasyon ni Jehova. Nakita na ba nimo ang tanang napulo niini? Kanus-a? Gigamit ba nimo kini sa imong ministeryo? Sa unsang paagi ikaw makabenepisyo ug dugang gikan niining talagsaong mga himan?

² Ang Hulyo 1, 1999, artikulo sa Bantayanang Torre nga “Kanunayng Tun-i ang Pulong sa Diyos Ingong Pamilya” mihimog rekomendasyon sa ‘paggahin ug bahin sa panahon sa inyong pagtuon sa pagtan-aw ug usa ka bahin sa usa sa matulon-anong mga video sa Sosyedad . . . ug dayon hisgotan kana.’ Uyon nianang maayong tambag, ang usa ka laing video ipasiugda diha sa Tigom sa Pag-alagad matag ikaduha ka bulan. Among gidasig ang tanan nga makaarang sa pagbuhat niana sa pagtan-aw sa video diha sa balay sa dili pa kini hisgotan sa Tigom sa Pag-alagad.

³ Niining bulana atong sugdan ang unang video nga atong gigama, Jehovah’s Witnesses​—The Organization Behind the Name. Tan-aw ug paminaw alang sa mga tubag niining mga pangutanaha:

◼ Alang sa unsa ang mga Saksi ni Jehova naila pag-ayo?

◼ Ang tanang gibuhat sa Bethel nalangkit sa unsang kasulatan?

◼ Unsang talan-awon sa Bibliya ang imong nakita nga gipasundayag, giletratohan, ug gikoloran aron gamiton diha sa mga publikasyon?

◼ Unsay nakapadayeg kanimo bahin sa paagi sa pag-andam sa atong literatura?

◼ Gikan sa 1920 hangtod sa 1990, unsa ka daghang literatura ang giimprenta sa Sosyedad?

◼ Kinsa ilabina taliwala sa katawhan sa Diyos ang angayng mangab-ot aron mahimong takos alang sa pag-alagad sa Bethel?—Prov. 20:29.

◼ Sa unsang mga paagi ang pamilyang Bethel nagpakitag ekselenteng panig-ingnan alang sa tanang Saksi ni Jehova?

◼ Unsay nakapadayeg kanimo bahin sa buluhaton nga ginahimo sa Bethel sa pag-abot sa daghang tawo kutob sa maarangan sa maayong balita?

◼ Sa unsang paagi ang tibuok-kalibotang buluhaton gisuportahan sa panalapi?

◼ Unsang kalihokan ang mahimo natong suportahan nga masiboton, ug uban sa unsang espiritu?​—Juan 4:​35; Buh. 1:8.

◼ Unsay imong gibati bahin sa organisasyon nga nagpaluyo sa atong ngalan?

◼ Sa unsang paagi imong magamit kini nga video diha sa ministeryo?

Sa Disyembre atong sublion ang video nga The Bible—Accurate History, Reliable Prophecy.