PAGTAAS SA PRESYO—UNSAY IMONG MAHIMO?

Dawata ang Realidad

Kon anam-anam ra ang pagsaka sa presyo sa mga pamaliton ug motaas ra pod ang atong suweldo, dili ra tingali kaayo nato mamatikdan ang epekto ani. Pero kon mokalit lag saka ang mga presyo ug mao ra gihapon ang atong suweldo, mabalaka tingali ta ug ma-stress, ilabina kon naa tay pamilya.

Dili nato mapugngan ang pagsaka sa mga galastohan. Pero kon dawaton nato nga ingon ani gyod ang kahimtang, makabenepisyo gyod ta.

KON NGANONG IMPORTANTE NI

Ang mga tawo nga modawat sa realidad nga dili gyod nila makontrol ang pagsaka sa mga presyo . . .

makapabiling kalmado. Kon kalmado ta, mas makahunahuna tag tarong ug makahimog mas maayong mga desisyon.
makalikay sa di maayong mga tinamdan bahin sa kuwarta, sama sa pagbalewala sa mga bayronon o pagpatuyang ug gasto.
makalikay sa mga di pagsinabtanay sa pamilya tungod lang sa kuwarta.
makakitag mga paagi aron makapadayon lang gihapon bisan sa kalisod, sama sa pagbadyet ug pagpalit sa kon unsa ra gyoy gikinahanglan.

ANG IMONG MAHIMO

Pag-adjust sa kahimtang. Dihang mokalit ug saka ang presyo sa mga pamaliton, mas maayong dili lang usa magsigeg gasto, kon posible. Ang uban magpalabi gihapon ug gasto bisag nagkalisodlisod na sila, nga sama bag gisugat nilag langoy ang suba bisag kusog kaayo nig sulog. Ang resulta, naproblema na hinuon sila. Kon naa kay pamilya, basig nabalaka pod ka kon unsaon pagtagana ang ilang panginahanglan, ug natural lang na. Pero hinumdomi ni: Mas gikinahanglan sa imong pamilya ang imong gugma, panahon, ug atensiyon labaw pa kay sa bisan unsang butang.

“Kinsa ba kaninyo ang makapalugway sa inyong kinabuhi bisag gamay lang pinaagi sa inyong kabalaka? Wala gayod!”—Lucas 12:25, Ang Pulong Sa Dios.

“Ayaw gayod kabalaka bahin sa sunod nga adlaw, kay ang matag adlaw dunay kaugalingong mga kabalaka. Ang mga problema karong adlawa mao ray hunahunaa.”—Mateo 6:34.

Kon magpalabi gihapon kag gasto bisag nagkalisodlisod na, morag gisugat nimog langoy ang suba bisag kusog kaayo nig sulog